ខេត្តព្រះសីហនុ ៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យដឹងថា ជនសង្ស័យចំនួន៩នាក់ រួមទាំងមេខ្លោងផង ដែលធ្វើសកម្មភាពលួចកាច់បំបែកសោ.កម៉ូតូដែលគេឱ្យឈ្មោះថា…
ខេត្តព្រះសីហនុ ៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យដឹងថា ជនសង្ស័យចំនួន៩នាក់ រួមទាំងមេខ្លោងផង ដែលធ្វើសកម្មភាពលួចកាច់បំបែកសោ.កម៉ូតូដែលគេឱ្យឈ្មោះថា ចោរកាច់កម៉ូតូ ត្រូវបានបង្ក្រាបជាបន្តបន្ទាប់ ក្នុងនោះមានទាំងអ្នកទទួលផលចោរកម្មផងដែរ ។
តាមរបាយការណ៍បញ្ជាក់ថា កាលពីល្ងាចថ្ងៃទី២៤ ខែសីហា ឆ្នាំ២០២០ នៅចំណុចភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ មានអំពើចោរកម្មលួចម៉ូតូ ដោយជនសង្ស័យធ្វើសកម្មភាពលួចម៉ូតូ១គ្រឿង ម៉ាក ហុងដា ធុនសេ១២៥ ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខកំពង់ស្ពឺ 1I-9447 ដែលជនរងគ្រោះចតទុកនៅលើផ្លូវ ។ ពេលកាច់សោ.កម៉ូតូបានហើយជិះគេចខ្លួនបាត់ដោយសុវត្ថិភាព ។
បន្ទាប់ពីទទួលបានបណ្តឹងរបស់ជនរងគ្រោះ កម្លាំងជំនាញ ផែននគរបាលព្រហ្មទណ្ឌ បានសហការជាមួយកម្លាំងអធិការដ្ឋានស្រុកព្រៃនប់ ធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី២៦ ខែសីហា ឆ្នាំ២០២០ វេលាម៉ោង៥និង៣០នាទីល្ងាច ទើបចាប់ឃាត់ខ្លួនបានជនសង្ស័យម្នាក់ នៅចំណុចផ្ទះជួលមួយកន្លែង ស្ថិតនៅក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងបន្តស្រាវជ្រាវតាមចាប់ឃាត់ខ្លួនបានជនសង្ស័យដែលជាបក្ខពួកបានចំនួន៣នាក់បន្ថែមទៀត នៅវេលាម៉ោង៩និង៣០នាទីយប់ថ្ងៃដដែលនៅចំណុចភូមិអាចម៍មឹក ស្ថិតនៅភូមិ៤ សង្កាត់៤ ក្រុងព្រះសីហនុ ។
ម្ចាស់ម៉ូតូឈ្មោះ នាវ សូថា ភេទប្រុស អាយុ៥៤ឆ្នាំ មុខរបរធ្វើស្រែ មានទីលំនៅភូមិត្រពាំងស្អុយ២ ឃុំអណ្តូងថ្ម ស្រុកព្រៃនប់ ខេត្តព្រះសីហនុ ។ បាត់ម៉ូតូ១គ្រឿង ម៉ាកហុងដា ធុនសេ១២៥ ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខ កំពង់ស្ពឺ 1I-9447 ។
បន្ទាប់ពីធ្វើការសាកសួរ ជនសង្ស័យដែលត្រូវបានចាប់ខ្លួនបានសារភាពថា នៅមានបក្ខពួកខ្លួនជាច្រើននាក់ទៀត ដែលជាជនសកម្មក្នុងការលួចកាច់កម៉ូតូក្នុងខេត្តព្រះសីហនុ កំពុងលាក់ខ្លួននៅផ្ទះមួយកន្លែងនៅក្នុងព្រៃភូមិថ្មី ស្ថិតនៅភូមិ៣ សង្កាត់៣ ក្រុងព្រះសីហនុ និងមានមេខ្លោងឈ្មោះ ឈិន សុផានិត ហៅពេជ្រធំ នៅពេលដែលលួចម៉ូតូបានគឺយកទៅផ្ទះនោះដើម្បីដោះបំបែកចេញ និងធ្វើសោថ្មី ។
កម្លាំងសមត្ថកិច្ចបានធ្វើការស្រាវជ្រាវតាមចាប់បក្ខពួករបស់ជនសង្ស័យ និងមេខ្លោងឈ្មោះ ឈិន សុផានិត ហៅពេជ្រធំ រហូតដល់រំលងអធ្រាត្រថ្ងៃទី២៨ ខែសីហា ឆ្នាំ២០២០ ទើបសមត្ថកិច្ចកំណត់បានទីតាំងផ្ទះដែលមេខ្លោងឈ្មោះ ឈិន សុផានិត ហៅ ពេជ្រធំ ព្រមទាំងបក្ខពួកកំពុងលាក់ខ្លួន ក៏បើកប្រតិបត្តិការដើម្បីខ្ចប់ដោយមានការចូលរួមសហការជាមួយកម្លាំងអធិការដ្ឋាននគរបាលក្រុង និងកម្លាំងអន្តរាគមន៍ពិសេសផងដែរ ។
នៅពេលដឹងថា កម្លាំងសមត្ថកិច្ចឡោមព័ទ្ធចាប់ខ្លួន ក្រុមចោរទាំងនោះ បាននាំគ្នារត់គេចខ្លួនចូលក្នុងព្រៃបាត់អស់ ។ កម្លាំងជំនាញបានធ្វើការរុករករហូតដល់ម៉ោង៨ព្រឹក ទើបចាប់ខ្លួនបានមេខ្លោងឈ្មោះ ឈិន សុផានិត ហៅពេជ្រធំ និងបក្ខពួកចំនួន២នាក់ទៀត ព្រមទាំងដកហូតបានម៉ូតូ៤គ្រឿង ក្នុងនោះមាន ៣គ្រឿង កំពុងដោះបំបែក ។ នៅវេលាម៉ោង៩យប់ថ្ងៃទី២៨ ខែសីហា ឆ្នាំ២០២០ នៅចំណុច ផែរ៉ូយ៉ាល់ ស្ថិតនៅភូមិ៣ សង្កាត់៣ ក្រុងព្រះសីហនុ បក្ខពួកចោរម្នាក់ទៀតក៏ត្រូវបានចាប់ខ្លួនដែរ ។
សូមបញ្ជាក់ថា បន្ទាប់ពីធ្វើការសាកសួរ ជនសង្ស័យបានសារភាពថា ម៉ូតូដែលលួចបានគឺយកទៅបញ្ជាំឲ្យឈ្មោះ រ៉ឹម មាទ ភេទប្រុស នៅម្តុំផ្លូវអូរ២ ហើយនៅវេលាម៉ោង១១ៈ០០ ថ្ងៃទី២៩ ខែសីហា ឆ្នាំ២០២០ កម្លាំងសមត្ថកិច្ចបានបន្តការស្រាវជ្រាវឃាត់ខ្លួនជនសង្ស័យម្នាក់ដែលទទួលផលចោរកម្ម នៅផ្ទះជួលមួយកន្លែង ស្ថិតនៅភូមិ៥ សង្កាត់៤ ក្រុងព្រះសីហនុ និងធ្វើការដកហូតបានម៉ូតូចំនួន៣គ្រឿង ដែលជាផលចោរកម្ម ។
ជារួមក្នុងកិច្ចប្រតិបត្តិការនេះ កម្លាំងសមត្ថកិច្ចបានធ្វើការឃាត់ខ្លួនបានជនសង្ស័យសរុបចំនួន ៩នាក់ ដែលមានឈ្មោះដូចខាងក្រោម៖
១-ឈ្មោះ ឈិន សុផានិត ហៅ ពេជ្រធំ ភេទប្រុស អាយុ៣៨ឆ្នាំ មុខរបរមិនពិតប្រាកដ ស្នាក់នៅ ភូមិ៣ សង្កាត់៣ ក្រុងព្រះសីហនុ (មេខ្លោង) ។
២-ឈ្មោះ សុះ សាក់រ៉នី ហៅ វីន ភេទប្រុស អាយុ២៤ឆ្នាំ ជនជាតិខ្មែរអ៊ិស្លាម មុខរបរមិនពិតប្រាកដ មានទីលំនៅ ភូមិអូរចំណារ ស្រុកព្រៃនប់ ខេត្តព្រះសីហនុ ។
៣-ឈ្មោះ ម៉ៅ ចាន់បូរ៉ា ហៅ យ៉ត ភេទប្រុស អាយុ២១ឆ្នាំ មុខរបរមិនពិតប្រាកដ មានទីលំនៅ ភូមិ៥ សង្កាត់៤ ក្រុងព្រះសីហនុ (សហចារី) ។
៤-ឈ្មោះ ប្រាក់ ទ្រី ហៅ ពេជ្រតូច ភេទប្រុស អាយុ២៤ឆ្នាំ មុខរបរមិនពិតប្រាកដ មានទីលំនៅ ភូមិ២ សង្កាត់១ ក្រុងព្រះសីហនុ (សហចារី) ។
៥-ឈ្មោះ សី សុភា ភេទប្រុស អាយុ ១៨ឆ្នាំ មុខរបរមិនពិតប្រាកដ មានទីលំនៅភូមិ២ សង្កាត់៤ ក្រុងព្រះសីហនុ (សហចារី) ។
៦-ឈ្មោះ អ៊ុច សីហា ភេទប្រុស អាយុ ១៧ឆ្នាំ មុខរបរ មិនពិតប្រាកដ មានទីលំនៅ មិនពិតប្រាកដ ។ (សហចារី) ។
៧-ឈ្មោះ វ៉ាន់ ចាន់សុធី ភេទប្រុស អាយុ៣២ឆ្នាំ មុខរបរ មិនពិតប្រាកដ មានទីលំនៅ ភូមិ៣ សង្កាត់៣ ក្រុងព្រះសីហនុ ។
៨-ឈ្មោះ ភួង រ៉ាវីន ភេទប្រុស អាយុ២៦ឆ្នាំ មុខរបរ មិនពិតប្រាកដ ស្នាក់នៅផ្ទះជួល ភូមិ៣ សង្កាត់៣ ក្រុងព្រះសីហនុ ។
៩-ឈ្មោះ រ៉ឹម មាទ ភេទប្រុស អាយុ ៣៤ឆ្នាំ មុខរបររកស៊ី ស្នាក់នៅផ្ទះជួល ភូមិ៥ សង្កាត់៤ ក្រុង-ខេត្តព្រះសីហនុ ។ (ទទួលផលនៃអំពើលួច) ។
វត្ថុតាងដែលត្រូវបានរឹបអូសមានក្បាំងម៉ូតូមួយចំនួន សម្ភារនិងគ្រឿងម៉ូតូមួយចំនួន ម៉ូតូចំនួន១០គ្រឿង ដែលមានម៉ាកលែត ពណ៌ស គា្មនផ្លាកលេខ ម៉ាក លែត ពណ៌ស-ខៀវ គា្មនផ្លាកលេខ ។ ម៉ាក VISION ពណ៌ក្រហម គា្មនផ្លាកលេខ ។ ម៉ាកហុងដាសេ១២៥ ស៊េរីឆ្នាំ២០០៩ ពណ៌ខ្មៅ ផ្លាកលេខភ្នំពេញ 1AF-7352 ម៉ាក CLICK ស៊េរីឆ្នាំ២០២០ ពណ៌ខ្មៅ គ្មានផ្លាកលេខ ។ ម៉ាកវីនន័រ ពណ៌ខ្មៅ បិតតែមពណ៌ស គា្មនផ្លាកលេខ ។ ម៉ាកវីនន័រ ពណ៌ខ្មៅ បិតតែមពណ៌ចំរុះ គា្មនផ្លាកលេខ ។ ម៉ាកស្មាស់ ពណ៌ខ្មៅ គា្មនផ្លាកលេខ ។
ម៉ាក WAVE RSX ពណ៌ខ្មៅ គា្មនផ្លាកលេខ និងម៉ាកហុងដា ធុនសេ១២៥ ស៊េរីឆ្នាំ២០១៦ ពណ៌ខ្មៅ ប្រើផ្លាកលេខក្លែងបន្លំ ដោយដោះផ្លាកលេខដើមព្រះសីហនុ 1G-9045 ចេញរួចយកផ្លាកលេខរបស់ម៉ូតូ ហុងដាសេ១២៥ ស៊េរីឆ្នាំ២០២០ ភ្នំពេញ1ID-2146 ដែលពួកវាលួចបាន យកមកដាក់បន្លំ ។ បច្ចុប្បន្ននគរបាល បានចាត់ការតាមនិតិវិធីបញ្ជូនទៅផ្តន្ទាទោសតាមច្បាប់៕
ចែករំលែកព័តមាននេះ