ខេត្តបន្ទាយមានជ័យ ៖ បុរសម្នាក់បានត្រូវគេប្រទះឃើញបាត់បង់ជីវិត ក្នុងថ្លុកឈាម កាលពីវេលាម៉ោងប្រមាណ៩និង៣០នាទីព្រឹកថ្ងៃទី២៨ ខែសីហា ឆ្នាំ២០២០ នៅអូរកងរ៉ក់ ស្ថិតនៅចម្ងាយប្រមាណ៤គីឡូម៉ែត្រ និរតីភូមិថ្មី…
ខេត្តបន្ទាយមានជ័យ ៖ បុរសម្នាក់បានត្រូវគេប្រទះឃើញបាត់បង់ជីវិត ក្នុងថ្លុកឈាម កាលពីវេលាម៉ោងប្រមាណ៩និង៣០នាទីព្រឹកថ្ងៃទី២៨ ខែសីហា ឆ្នាំ២០២០ នៅអូរកងរ៉ក់ ស្ថិតនៅចម្ងាយប្រមាណ៤គីឡូម៉ែត្រ និរតីភូមិថ្មី ឃុំស្វាយចេក ស្រុកស្វាយចេក ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា បុរសដែលបាត់បង់ជីវិតខាងលើនេះត្រូវបានគេស្គាល់ថាឈ្មោះ ឈី អាយុ៥១ឆ្នាំ មានទីលំនៅក្នុងភូមិសូរិយា សង្កាត់និមិត្ត ក្រុង ប៉ោយប៉ែត ។ ចំណែកជនសង្ស័យឈ្មោះ ភី ចម ភេទប្រុស អាយុ៤៨ឆ្នាំ មាន ទី លំនៅក្នុងភូមិ-សង្កាត់ជាមួយគ្នា។
អ្នកទាំង២នាក់ ជាអ្នកស៊ីឈ្នួលចាំចម្ការដំឡូងមី នៅចំណុចអូរកងរ៉ក់ ក្នុងឃុំស្វាយចេក ឲ្យឈ្មោះ សុខ ចាន់វុទ្ធ ភេទប្រុស អាយុ៣៩ឆ្នាំ មានទីលំនៅក្នុងភូមិ សង្កាត់ជាមួយគ្នាដែរ ។
លោកអធិការបញ្ជាក់ថា នៅយប់ថ្ងៃកើតហេតុនោះ បុរសទាំង២នាក់បានផឹកស្រាជាមួយគ្នានៅនឹងខ្ទមចាំចម្ការ ។ លុះពេលស្រវឹងរៀងៗខ្លួន ក៏ទាស់ពាក្យសម្តីគ្នានិងឈានដល់កើតមានអំពើហិង្សា ដោយឈ្មោះ ភី ចម បានយកចបសម្រាប់កាប់ជម្រះស្មៅវាយឈ្មោះ ឈី ។
ពេលនោះ ជនរងគ្រោះបានរត់គេចមកក្រៅខ្ទមហើយដួល រួចក៏ត្រូវជនដៃដល់កាប់ត្រូវក្បាលជាច្រើនកន្លែង បណ្តាលឲ្យបាត់បង់ជីវិតនៅក្នុងថ្លុកឈាមតែម្តង ។
ក្រោយពីធ្វើសកម្មភាពរួចហើយ ជនដៃដល់ក៏មិនបានរត់គេចខ្លួនទេ គឺបាននៅដេកក្នុងខ្ទម លុះ
ព្រឹកឡើងមានអ្នកស្រុកទៅចម្ការក្បែរនោះប្រទះឃើញសពជនរងគ្រោះ ក៏រាយការណ៍ប្រាប់សមត្ថកិច្ចឲ្យទៅពិនិត្យ ហើយកម្លាំងកងរាជអាវុធហត្ថមូលដ្ឋានស្រុកស្វាយចេក ក៏បានឃាត់ឈ្មោះ ភី ចម ដើម្បីសួរនាំ ។
នៅចំពោះមុខសមត្ថកិច្ច ជនដៃដល់មិនបានសារភាពពីទង្វើរបស់ខ្លួនជាអ្នកប្រព្រឹត្តនោះទេតែខោដែលស្លៀកមានប្រឡាក់ឈាម និងត្រូវបានកងរាជអាវុធហត្ថមូលដ្ឋានស្រុកស្វាយចេកកសាងសំណុំរឿងបញ្ជូនទៅបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធីច្បាប់ ។ ចំណែកសពជនរងគ្រោះ ត្រូវបានប្រគល់ជូនក្រុមគ្រួសារដើម្បីធ្វើបុណ្យតាមប្រពៃណី ៕
ចែករំលែកព័តមាននេះ