ខេត្តពោធិ៍សាត់ ៖ បន្ទាប់ពីក្រុមប្រឹក្សាខេត្តនិងគណៈអភិបាលខេត្ត ប្រជុំពិនិត្យនិងអនុម័តលើ និមិត្តសញ្ញាខេត្តពោធិ៍សាត់ ដើម្បីសុំការសម្រេច ពីក្រសួងមហាផ្ទៃយកមកប្រើប្រាស់លើលិខិតរដ្ឋបាលជាផ្លូវការរួចមក ពេលនេះសម្តេចក្រឡាហោម ស ខេង…
ខេត្តពោធិ៍សាត់ ៖ បន្ទាប់ពីក្រុមប្រឹក្សាខេត្តនិងគណៈអភិបាលខេត្ត ប្រជុំពិនិត្យនិងអនុម័តលើ និមិត្តសញ្ញាខេត្តពោធិ៍សាត់ ដើម្បីសុំការសម្រេច ពីក្រសួងមហាផ្ទៃយកមកប្រើប្រាស់លើលិខិតរដ្ឋបាលជាផ្លូវការរួចមក ពេលនេះសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចដាក់ឱ្យប្រើប្រាស់ជាផ្លូវការហើយ តាមប្រកាសលេខ៣៤៧១ប្រ.ក ចុះថ្ងៃទី១៤ ខែសីហា ឆ្នាំ២០២០ ។
ក្នុងប្រកាសនេះ ត្រង់ប្រការ៣ បានចែងថា និមិត្តសញ្ញាខេត្តពោធិ៍សាត់ ត្រូវបានប្រើប្រាស់ជាផ្លូវការ ដាក់នៅកន្លែងធ្វើការងារ ដាក់នៅលើក្បាលលិខិត ឯកសារ និងស្រោមសំបុត្រផ្លូវការ ប្រើប្រាស់ក្នុងពិធីនានារបស់រដ្ឋបាលខេត្តពោធិ៍សាត់ និងប្រើប្រាស់ជាផ្លូវការក្នុងករណីផ្សេងៗទៀតដែលចាំបាច់ ។
ចំពោះនិមិត្តសញ្ញានេះមានធាតុផ្សំ «ទឹក ដី មនុស្ស និងប្រវត្តិសាស្ត្រ» ដែលបង្ហាញពីប្រភពធនធានធម្មជាតិដ៏សម្បូរបែបក្នុងការអភិវឌ្ឍ ផ្តើមចេញពីភាពឧស្សាហ៍ព្យាយាមរបស់ប្រជាពលរដ្ឋលើទឹកដីដ៏អំណោយផល ទើបយើងអាចកំណត់បានជានិមិត្តសញ្ញាសម្គាល់ខេត្តដូចខាង
ក្រោម ៖
ទី១-រូបមនុស្សជិះសេះស្ពាយដាវ ៖
តំណាងឱ្យវីរភាពដ៏អង់អាចក្លាហានរបស់ឧកញ៉ាពញាសួគ៌ា លោកតា ឃ្លាំង មឿង រួមទាំងក្រុមគ្រួសាររបស់លោក ដែលសុខចិត្តលះបង់ធ្វើពលីកម្មបូជានូវអាយុជីវិតឥតស្តាយស្រណោះ ដើម្បីបុព្វហេតុជាតិមាតុភូមិ សាសនា ព្រះមហាក្សត្រ និងជាគំរូដ៏ល្អមួយសម្រាប់ដល់មនុស្សជំនាន់ក្រោយ ឱ្យខិតខំការពារកសាងជាតិមាតុភូមិឱ្យបានគង់វង្ស និងរុងរឿង ។
ទី២-រូបតំបន់ជួរភ្នំក្រវាញ(ផ្ទៃខាងក្រោយរូបសេះ) ៖
ភ្នំក្រវាញជាឈ្មោះភ្នំមួយនៅក្នុងខេត្តពោធិ៍សាត់ សម្បូរទៅដោយធនធានរ៉ែធម្មជាតិ អនុផលព្រៃឈើ រុក្ខជាតិជាឱសថបុរាណ និងជាជម្រកនៃសត្វព្រៃគ្រប់ប្រភេទ។ ជួរភ្នំក្រវាញ គឺជាប្រភពនៃទឹកសម្រាប់ការងារកសិកម្ម សិប្បកម្ម ឧស្សាហកម្ម ព្រមទាំងជាប្រភពថាមពលវារីអគ្គិសនី និងជាតំបន់ទេសចរណ៍ធម្មជាតិដ៏សម្បូរបែបដ៏មានសក្ដានុពលនៃខេត្ត ។
ទី៣-រូបដីឬផែនថ្មដែលសេះឈរពីលើ ៖
តំណាងឱ្យធនធានរ៉ែធម្មជាតិដ៏សម្បូរបែបរបស់ខេត្តដូចជា ប្រភពរ៉ែថ្មកែវ ដែលជាថ្មមានតែមួយគត់នៅព្រះរាជាណាចក្រកម្ពុជា ជាថ្មដែលគេយកទៅច្នៃជាផលិតផលសិល្បៈសូនរូបផ្សេងៗ ។
ទី៤-ដើមពោធិ៍និងក្រូចពោធិ៍សាត់ ៖
ដើមពោធិ៍ គឺតំណាងឱ្យប្រវត្តិនៃឈ្មោះរបស់ខេត្តពោធិ៍សាត់ ដែលមកពីពាក្យដើមគឺ(ពោធិ៍-រសាត់) មានចំនួន១២សន្លឹក តំណាងឱ្យគុណអ្នកម្តាយ ។ ក្រូចពោធិ៍សាត់តំណាងឱ្យផលានុផលផ្លែឈើដែលត្រូវបានដាំក្នុងសម័យអាណានិគមនិយមបារាំង ក្នុងភូមិដប់បាត ស្រុកបាកាន ខេត្តពោធិ៍សាត់ ដំបូងគេនៅកម្ពុជា ដោយស្ថានីយស្រាវជ្រាវដើមក្រូចមុនឆ្នាំ១៨៦៣ ហើយមានចំនួន២១ផ្លែ តំណាងឱ្យគុណលោកឪពុក ។
ទី៥-ផ្ទៃទឹក និងត្រី ៖
តំណាងឱ្យបឹងទន្លេសាបដែលជាអាងស្តុកទឹកដ៏សំខាន់ និងជាដែនជម្រកមច្ឆជាតិគ្រប់ប្រភេទ ដែនជម្រកជីវចម្រុះ និងសម្រាប់បម្រើឱ្យតម្រូវការជីវភាពរស់នៅរបស់ប្រជាពលរដ្ឋទូទាំងខេត្តពោធិ៍សាត់ ។
ទី៦-រូបកួរស្រូវក្រងជារង្វង់ស្នែងក្របី ៖
បង្ហាញអំពីភាពសម្បូរបែបនៃដំណាំស្រូវ ដែលលាតសន្ធឹងលើផ្ទៃដីកសិកម្មដ៏ធំទូលាយ ជាគ្រឹះរឹងមាំសម្រាប់ខឿនសេដ្ឋកិច្ចជាតិ ។
ទី៧-បូ(ពណ៌ក្រហម ខៀវ និងបៃតង) ៖
តំណាងឱ្យជាតិដែលប្រជាពលរដ្ឋទាំងមូលនៅក្នុងខេត្តពោធិ៍សាត់ នាំគ្នាស្តារនិងលើកស្ទួយក្នុងការអភិវឌ្ឍជាតិលើគ្រប់វិស័យ ។
ទី៨-អក្សរ«ខេត្តពោធិ៍សាត់» ៖
បញ្ជាក់ថាប្រជាជនខេត្តពោធិ៍សាត់ គោរពយ៉ាងខ្ជាប់ខ្ជួន និងបំពេញភារកិច្ចជូនជាតិមាតុភូមិ ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដោយជ្រកក្រោមបាវចនា ជាតិ សាសនា ព្រះមហាក្សត្រ ។
ទី៩-ក្រវាញ ៖
គឺជារុក្ខជាតិផ្តល់នូវដើម ផ្កា និងផ្លែ សម្រាប់ប្រើប្រាស់ជាអាហារ និងឱសថមានឈ្មោះល្បីល្បាញជាយូរលង់ណាស់មកហើយ ជាមួយឈ្មោះជួរភ្នំក្រវាញនិងរបាំបេះក្រវាញ ។
និមិត្តសញ្ញាខេត្តពោធិ៍សាត់នេះ គឺជាសមិទ្ធផលប្រវត្តិសាស្ត្រមួយ ដែលកើតចេញពីការខិតខំប្រឹងប្រែងរួមគ្នារវាងក្រុមប្រឹក្សាខេត្តជាមួយគណៈអភិបាលខេត្ត ក្នុងអាណត្តិទី៦ឆ្នាំ២០២០ ពិសេសក្នុងពេលដែលឯកឧត្តម ម៉ៅ ធនិន ជាអភិបាលនៃគណៈអភិបាលខេត្តពោធិ៍សាត់ ៕
ចែករំលែកព័តមាននេះ