ខេត្តព្រះសីហនុ ៖ កម្លាំងកងរាជអាវុធហត្ថខេត្ត បានបង្ក្រាបគ្រឿងញៀនជាបន្តបន្ទាប់ ចាប់
ខ្លួនជនសង្ស័យចំនួន១០នាក់ និងដកហូតថ្នាំញៀនមួយចំនួនធំនៅក្រុងព្រះសីហនុ ។
លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្ត បានឲ្យដឹងថា ៖ ករណីទី១-នាយប់ថ្ងៃទី២៥ ខែសីហា ឆ្នាំ២០២០ កម្លាំងកងរាជអាវុធហត្ថខេត្តចំនួន១៥នាក់ ដឹកនាំដោយលោកវរសេនីយ៍ត្រី ឡុង គឹមហួរ នាយការិយាល័យប្រឆាំងបទល្មើសគ្រឿងញៀន បានបង្ក្រាបករណីជួញដូរ រក្សាទុក និងប្រើប្រាស់សារធាតុញៀន នៅចំណុចផ្ទះសំណាក់សួគ៌ា ក្នុងភូមិ៣ សង្កាត់២ ក្រុងព្រះសីហនុ ។
ប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យចំនួន៤នាក់រួមមាន ៖ ១-ឈ្មោះ ប៊ូឌី ហ្គោណាវ៉ាន អាយុ២៥ឆ្នាំ ជនជាតិឥណ្ឌូណេស៊ី មុខរបរមិនពិតប្រាកដ, ២-ឈ្មោះ អាហ្គូស ស្ទែនតូ អាយុ២២ឆ្នាំ ជនជាតិឥណ្ឌូណេស៊ី មុខរបរមិនពិតប្រាកដ សីហនុ ៣-ឈ្មោះ រ៉ូបឺត បង់ហ្សូវីចាយ៉ា អាយុ២៤ឆ្នាំជនជាតិឥណ្ឌូណេស៊ី មុខរបរមិនពិតប្រាកដ និង៤-ឈ្មោះ ឡាយ សុខឃីម ភេទស្រី អាយុ២១ឆ្នាំ ជនជាតិខ្មែរ បម្រើការនៅខារ៉ាអូខេទាំង៤នាក់ស្នាក់នៅបណ្ដោះអាសន្នក្នុងភូមិ៥ សង្កាត់លេខ៤ ក្រុងព្រះសីហនុ ។
ជាមួយនឹងការចាប់ខ្លួននេះ កម្លាំងអាវុធហត្ថបានចាប់យកវត្ថុតាងរួមមាន ម្សៅសថ្លាចំនួន៤កញ្ចប់ ម្សៅពណ៌សប្រភេទខេចំនួន២កញ្ចប់ ថ្នាំគ្រាប់ពណ៌ផ្កាឈូក១គ្រាប់ ថ្នាំម្សៅចំនួន១៤កញ្ចប់ ថ្នាំដប(ទឹក)ពណ៌លឿង និងពណ៌ក្រហមចំនួន៩ដប(ថ្នាំសប្បាយ) ជញ្ជីង១ ដបសម្រាប់ជក់ចំនួន៣ ខ្សៀជក់ចំនួន២ លិខិតឆ្លងដែនចំនួន២ អត្តសញ្ញាណប័ណ្ណចំនួន២ ម៉ូតូ១គ្រឿង ប្រាក់៧០ដុល្លារ ទូរស័ព្ទដៃ៣គ្រឿងកាតធនាគារ និងថង់សម្រាប់វេចខ្ចប់គ្រឿងញៀនមួយចំនួន។
ករណីទី២-នាវេលាម៉ោងប្រមាណ៦ល្ងាច ថ្ងៃទី២៦ ខែសីហា ឆ្នាំ២០២០ បន្តឃាត់ខ្លួនជនសង្ស័យម្នាក់ទៀត នៅភូមិ១ សង្កាត់លេខ១ ក្រុងព្រះសីហនុ ឈ្មោះ កៅ ឃូលីង ភេទប្រុស អាយុ៣០ឆ្នាំ ជនជាតិចិន មុខរបរមិនពិតប្រាកដ តែស្នាក់នៅបណ្ដោះអាសន្នក្នុងភូមិ៦
សង្កាត់លេខ៤ ក្រុងព្រះសីហនុ ។
ជាមួយនឹងការចាប់ឃាត់នេះ សមត្ថកិច្ចក៏បានចាប់យកវត្ថុតាងរួមមាន កញ្ឆាក្រៀម២កញ្ចប់ ដបសម្រាប់ជក់ចំនួន៣ ខ្សៀសម្រាប់ជក់ចំនួន២ ទូរស័ព្ទដៃ១គ្រឿង និងជញ្ជីងសម្រាប់ថ្លឹងគ្រឿងញៀន១ ។
ករណីទី៣-នាវេលាម៉ោងប្រមាណ២និង៤៥នាទីរសៀលថ្ងៃទី២៧ ខែសីហា ឆ្នាំ២០២០ បានឃាត់ខ្លួនជនសង្ស័យចំនួន៥នាក់ទៀត សុទ្ធសឹងជាជនជាតិចិន រួមមាន ៖ ១-ឈ្មោះ ទីង ស៊ូវហ្វី ភេទប្រុស អាយុ៣០ឆ្នាំ មុខរបរមិនពិតប្រាកដ, ២-ឈ្មោះ សុង ជ័ងលឹង ភេទប្រុស អាយុ២៨ឆ្នាំ មុខរបរមិនពិតប្រាកដ, ៣-ឈ្មោះ លីវ ល័ងស៊ច ភេទប្រុស អាយុ២៩ឆ្នាំ មុខរបរមិនពិតប្រាកដ, ៤-ឈ្មោះ ហុង ឃ័ន ភេទប្រុស អាយុ២៣ឆ្នាំ មុខរបរមិនពិតប្រាកដ និង៥-ឈ្មោះ លីវ យាមីង ភេទប្រុស អាយុ៣០ឆ្នាំ មុខរបរមិនពិតប្រាកដទាំង៥នាក់ស្នាក់នៅបណ្ដោះអាសន្នក្នុងភូមិ១ សង្កាត់លេខ១ ក្រុងព្រះសីហនុ ។
វត្ថុតាងដែលសមត្ថកិច្ចចាប់យកជាមួយនឹងការចាប់ឃាត់ខ្លួននេះមាន ម្សៅពណ៌សប្រភេទខេ
១៦កញ្ចប់ កញ្ឆាក្រៀម១កញ្ចប់ លិខិតឆ្លងដែន២ក្បាល ទូរស័ព្ទដៃ៤គ្រឿង ជញ្ជីងសម្រាប់ថ្លឹងគ្រឿងញៀន១ ប្រាក់៣០០ដុល្លារ និងអំពូលភ្លើង១ ។
ជនសង្ស័យរួមជាមួយវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ