រាជធានីភ្នំពេញ៖ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសម៉ាឡេស៊ី នៅថ្ងៃទី ២៩ ខែ សីហា ឆ្នាំ ២០២០ បានបន្តអំពាវនាវដល់ប្រជាពលរដ្ឋ ពលករ ពលការិនី សិស្សនិស្សិតកម្ពុជា និងអ្នកមកធ្វើការ ដែលកំពុងស្ថិតនៅក្នុងប្រទេសម៉ាឡេស៊ី សូមបន្តអនុវត្តតាមការណែនាំនានារបស់អាជ្ញាធរប្រទេសម្ចាស់ផ្ទះ ដើម្បីសុវត្ថិភាពផ្ទាល់ខ្លួនរបស់បងប្អូន រហូតដល់មានការជូនដំណឹងជាថ្មី។
សេចក្តីប្រកាសបានបន្តថា ដើម្បីទប់ស្កាត់ និងលុបបំបាត់ការរីករាលដាលនៃជំងឺកូវីដ១៩ ឱ្យទទួលបានជោគជ័យ រដ្ឋាភិបាលម៉ាឡេស៊ី បានសម្រេចបន្តសុពលភាព នៃការអនុវត្តបទបញ្ជារឹតបន្តឹងការធ្វើដំណើរជាមួយលក្ខខណ្ឌបន្ធូបន្ថយ (Recovery Movement Control Order-RMCO) រយៈពេល ៤ខែ បន្ថែមទៀត ដោយចាប់ពីថ្ងៃទី ០១ ខែ កញ្ញា រហូតដល់ថ្ងៃទី ៣១ ខែ ធ្នូ ឆ្នាំ ២០២០។
ក្នុងករណីចាំបាច់បន្ទាន់ បងប្អូនប្រជាពលរដ្ឋអាចទំនាក់ទំនង មកស្ថានទូតតាមលេខទូរស័ព្ទ (+60 168594868 ( កិច្ចការកុងស៊ុល), +60 1126263390 (កិច្ចការពលករ), និង +855 11460505 (កិច្ចការនិស្សិត) ។
សូមជម្រាបជូនផងដែរថា គិតត្រឹមថ្ងៃទី ២៨ ខែ សីហា ឆ្នាំ ២០២០ ប្រទេសម៉ាឡេស៊ីមានអ្នកឆ្លងជំងឺកូវីដ១៩ សរុបចំនួន ៩,៣០៦នាក់ ដែលក្នុងនោះ អ្នកជាសះស្បើយមានចំនួន ៩,០៣០ នាក់ អ្នកកំពុងសំរាកព្យាបាលនៅមន្ទីរពេទ្យមានចំនួន ១៥៥ នាក់ និងអ្នកស្លាប់សរុបមានចំនួន ១២៥ នាក់៕ (កែសម្រួលដោយ ៖ ធីតា)
ចែករំលែកព័តមាននេះ