ខេត្តសៀមរាប ៖ ខណៈពលរដ្ឋខ្មែរហាក់មានទំនោការទទួលទានបន្លែសុវត្ថិភាពដាំដុះដោយកសិករខ្មែរច្រើនឡើងៗ គេកត់សម្គាល់ឃើញថា សន្ទុះនៃការចងក្រងសហគមន៍សម្រាប់ការដាំបន្លែសុវត្ថិភាព ដើម្បីផ្គត់ផ្គង់ទីផ្សារក៏មានចំនួនកើនឡើងផងដែរ ។
ជាក់ស្តែង យោងតាមប្រធានមន្ទីរកសិកម្ម រុក្ខាប្រមាញ់ និងនេសាទបានថ្លែងឲ្យដឹងនៅថ្ងៃទី ៣០ ខែសីហា ឆ្នាំ២០២០ នេះបានឱ្យដឹងថា ក្នុងខេត្តសៀមរាបនេះមាន ៥៥ សហគមន៍កសិកម្មបានចុះបញ្ជីរួច (សហគមន៍ផលិតស្រូវពូជ ស្រូវចំណី ចិញ្ចឹមសត្វ ផលិតចំណីសត្វ បន្លែ វារីវប្បកម្ម និងសេវាកម្មធាតុចូលកសិកម្ម) ដោយមានទុនសរុប ៣ ៧៧៣លានរៀល មានសមាជិក ៧ ៩៧៩នាក់ ស្ត្រី ៦៣៤៦នាក់។
ដោយឡែក ស្រុកសូត្រនិគម មានសហគមន៍កសិកម្មចំនួន ៧ ក្នុងនោះមានសហគមន៍ ២ ផលិតបន្លែសុវត្ថិភាព មានសមាជិក ១០៦២នាក់ ស្ត្រី ៨៦៨នាក់ ទុនសរុប ៥២០លានរៀល។
លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ បានបន្តថា «ពីមួយឆ្នាំទៅមួយឆ្នាំអាជីវកម្មនេះមានការវិវឌ្ឍន៍រីកចម្រើនជាបន្តបន្ទាប់ ដោយសារមានមន្ទីរកសិកម្ម រុក្ខាប្រមាញ់ និងនេសាទ អង្គការ និងគម្រោងកម្មវិធីផ្សេងៗ បានមកជួយជាបច្ចេកទេស និងសម្ភារចាំបាច់សម្រាប់ដោលរុញឲ្យផលិតកម្មបន្លែសុវត្ថិភាព ការចិញ្ចឹមមាន់ ត្រី និងស្រូវពូជទទួលបានជោគជ័យដូចបានឃើញនាពេលនេះ។ ពីផ្ទៃដី ១ហិតា នៅពេលចាប់ផ្តើម បច្ចុប្បន្នផ្ទៃដី ៥ហិតា ពោរពេញដោយផ្ទះសំណាញ់ រោងមាន់ និងស្រះចិញ្ចឹមត្រី ដោយបានរៀបចំផែនការដាំ និងចិញ្ចឹមប្រចាំថ្ងៃ ខែ និងឆ្នាំ មានបច្ចេកទេសដាំ ចិញ្ចឹម យកចិត្តទុក ដាក់ ឧស្សាហ៍ព្យាយាម មានគោលដៅច្បាស់លាស់ និងក្តាប់បានពីតម្រូវការទីផ្សារ ធ្វើឲ្យគាត់ទទួលបានជោគជ័យ»។
លោកបានបន្តថា ត្រង់ចំណុចនេះ លោកបានផ្តាំទៅកសិករ ដែលកំពុងផលិតគួរអនុវត្តតាមគាត់ ដើម្បីទទួលបានភាពជោគជ័យ ក្នុងវិស័យកសិកម្មស្របពេលដែល វិស័យមួយចំនួនកំពុងរងផលប៉ះពាល់ដោយសារជំងឺឆ្លងកូវីដ-១៩។
ដោយមានការអញ្ជើញចូលរួមពីលោករដ្ឋមន្ត្រី វេង សាខុន បានបញ្ជាក់ជូនសមាជិកសហគមន៍ថា « សមិទ្ធផលទាំងអស់នេះគឺកើតចេញពីការខិតខំប្រឹងប្រែង យកចិត្តទុកដាក់របស់រាជរដ្ឋាភិបាល តាមរយ:ក្រសួង និងមន្ទីរកសិកម្ម រុក្ខាប្រមាញ់ និងនេសាទ ម្ចាស់ជំនួយ ដៃគូអភិវឌ្ឍ អ្នកអនុវត្តគម្រោង រួមផ្សំជាមួយការយកចិត្តទុកដាក់អនុវត្តបច្ចេកទេស បានត្រឹមត្រូវរបស់លោកពូ ឈាវ ហុង។ និងបានបង្កលក្ខណ:ងាយស្រួលឲ្យបងប្អូនប្រជាពលរដ្ឋ ប្រកបរបរធ្វើស្រែចំការ ចិញ្ចឹមសត្វ ត្រី និងដាំដំណាំតាមលទ្ធភាពរៀងៗខ្លួន ដើម្បីនិរន្តរភាពនៃកំណើនសេដ្ឋកិច្ចក្នុងគ្រួសារ។
ស្ថិតក្នុងស្ថានភាពនៃជំងឺឆ្លងកូវីដ-១៩ លោករដ្ឋមន្ត្រីបានស្នើសុំឲ្យប្រជាពលរដ្ឋខិតខំប្រឹងប្រែងបន្ថែមទៀតលើការងារបង្កបង្កើនផល ធ្វើយ៉ាងណាបង្កើនបរិមាណផលិត ធានាគុណភាព លើកកំពស់សមត្ថភាពកែច្នៃវេចខ្ចប់ ដើម្បីធ្វើការប្រកួតប្រជែង ឆ្លើយតបតាមសេចក្តីត្រូវការទីផ្សារ និងចំណង់ចំណូលចិត្តអ្នកបរិភោគ កំណើនចំណូលគ្រួសារ និងកាត់បន្ថយភាពក្រីក្រ ជាពិសេសកាត់បន្ថយការនាំចូល។
ការដាំ ដំណាំ ការធ្វើវារីវប្បកម្ម និងការចិញ្ចឹមសត្វបានផលហើយ លោករដ្ឋមន្ត្រី បានណែនាំឲ្យមន្ទីរ ជួយធ្វើការបណ្តុះបណ្តាលបច្ចេកទេស បន្ថែមលើការអនុវត្តតាមការធ្វើកសិកម្មល្អ (GAP) ការអនុវត្តផលិតកម្មកសិកម្មតាមកិច្ចសន្យា ធ្វើយ៉ាងណាបង្កើនការជឿទុកចិត្តពីអតិថិជន តាមរយ:គុណភាព សុវត្ថិភាពនៃផលិតផល និងបង្កើនតម្លៃបន្ថែម ហើយក៏គួរពង្រឹងបច្ចេកទេសវេចខ្ចប់ និងផ្តល់ស្លាកសញ្ញាសម្គាល់ច្បាស់លាស់ចៀសវាងការបន្លំគុណភាព៕
ចែករំលែកព័តមាននេះ