រាជធានីភ្នំពេញ ៖ កូនប្រុសដៃដល់សម្លាប់ម្តាយបង្កើតបានឃាត់ខ្លួនហើយ ស្ថិតនៅចំណុចដីឡូត៍មួយកន្លែង ខាងក្រោយសាលា IU ក្នុងសង្កាត់ភ្នំពេញថ្មី ខណ្ឌសែនសុខ ក្រោយប្រជាពលរដ្ឋប្រទះឃើញដើរស្រាតនិងស្គាល់ភិនភាគជននេះ តាមរយៈការចុះផ្សាយព័ត៌មានក៏ផ្តល់ដំណឹងជូនសមត្ថកិច្ចភ្លាមៗតែម្តង…
រាជធានីភ្នំពេញ ៖ កូនប្រុសដៃដល់សម្លាប់ម្តាយបង្កើតបានឃាត់ខ្លួនហើយ ស្ថិតនៅចំណុចដីឡូត៍មួយកន្លែង ខាងក្រោយសាលា IU ក្នុងសង្កាត់ភ្នំពេញថ្មី ខណ្ឌសែនសុខ ក្រោយប្រជាពលរដ្ឋប្រទះឃើញដើរស្រាតនិងស្គាល់ភិនភាគជននេះ តាមរយៈការចុះផ្សាយព័ត៌មានក៏ផ្តល់ដំណឹងជូនសមត្ថកិច្ចភ្លាមៗតែម្តង នាថ្ងៃដដែលថ្ងៃទី២៩ សីហា នេះ ដោយនាំមកកាន់អធិការដ្ឋានខណ្ឌពោធិ៍សែនជ័យ ដើម្បីចាត់ការបន្ត ។
សេចក្តីរាយការណ៍បន្តថា ក្នុងការប្រទះឃើញជនដៃដល់នេះ គឺក្នុងពេលគាត់បម្រុងចង់បញ្ចប់ជីវិតដោយចង.កនឹងដើមឈើ តែការប៉ងមិនបានសម្រេចទេ ព្រោះត្រូវកម្លាំងទៅដល់ទីនោះទាន់ ។
សូមរំលឹកថា បុរសដែលកូនជាជនដៃដល់កាត់ក្បាលម្តាយ គឺមានឈ្មោះអ៊ាម សំណាង អាយុ៣២ឆ្នាំ មុខរបរនិយោជិតក្រុមហ៊ុនម៉ូតូហុងដា ទើបបានមកស្នាក់នៅផ្ទះជួលកើតហេតុរយៈពេល២ខែហើយ ។ ចំណែកឯស្ត្រីជាម្ដាយរងគ្រោះឈ្មោះហាក់ សុខថា អាយុប្រហែល៦៥ឆ្នាំ អ្នកទាំង២នាក់ម្ដាយនិងកូនមានទីលំនៅក្នុងភូមិកោះប៉ែន ឃុំកោះមិត្ត ស្រុកកំពង់សៀម ខេត្តកំពង់ចាម។
សូមបញ្ជាក់ថា ស្ត្រីជាម្ដាយរងគ្រោះត្រូវបានកម្មការិនីដែលជួលផ្ទះនៅជិតនោះម្នាក់ បានប្រទះឃើញ ហើយក៏បង្កឲ្យមានការភ្ញាក់ផ្អើលនៅវេលាម៉ោង៦ព្រឹកថ្ងៃទី២៩ សីហា នេះ ស្ថិតនៅក្នុងបន្ទប់ជួលលេខ២០២ ជាន់ទី២ ផ្ទះលេខ៥៦ ផ្លូវលំ ក្រុមទី២ ភូមិចោមចៅទី៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
តាមប្រភពពីអ្នកស្នាក់នៅបន្ទប់ជួលក្បែរនោះក៏បានឲ្យដឹងដែរថា បុរសដែលជាឃាតករសម្លាប់ម្ដាយ ដោយកាត់ក្បាលនេះ បានស្នាក់នៅក្នុងបន្ទប់ផ្ទះជួលខាងលើម្នាក់ឯងនិងមានជំងឺប្រព័ន្ធប្រសាទ ហើយដោយសារតែកាលពីពេលថ្មីៗកន្លងទៅនេះដឹងថា ខ្លួនឯងមិនសូវស្រួលខ្លួន ត្រូវការមានមកជួយមើលថែ ។
បន្ទាប់មក នៅថ្ងៃទី១៩ សីហា ឆ្នាំ២០២០ ស្ត្រីជាម្ដាយបានចាកចេញពីផ្ទះនៅខេត្តកំពង់ចាមមក កាន់ផ្ទះជួលនេះ ដេកមើលថែកូនប្រុសរូបនេះ ។ លុះវេលាល្ងាចថ្ងៃទី២៨ សីហា មានមិត្តភក្ដិមកបបួលផឹកស៊ី ហើយបុរសនេះបានផឹកជុំមិត្តភក្តិ ។ ក្រោយមកស្រាប់តែជំងឺរើឡើង រហូតស្រាតសម្លៀកបំពាក់រត់ពេញប្លុកផ្ទះជួល បង្កឲ្យមានការភ្ញាក់ផ្អើលយ៉ាងខ្លាំង ។
ប្រភពបន្តថា ស្ត្រីជាម្ដាយរួមនិងអ្នកជិតខាងបាននាំគ្នាជួយចាប់ ។ ក្រោយមក នៅវេលាយប់ជ្រៅបន្តិច បានឮស្នូរក្ដូងក្ឌាំងនៅក្នុងបន្ទប់កើតហេតុ ប៉ុន្តែខណៈនោពុំមាននរណាបានចាប់អារម្មណ៍ចេញទៅមើលឡើយ ព្រោះនឹកស្មានថា បុរសនោះរើបំរះ ។ អ្នកជិតខាងដដែលបានប្រាប់ឲ្យដឹងបន្ថែមទៀតថា រហូតមកដល់ព្រឹកឡើងថ្ងៃទី២៩ សីហា កម្មការិនីដែលស្នាក់នៅក្បែរនោះ ដើរឆ្លងកាត់មុខបន្ទប់ជួលកើតហេតុក៏បានប្រទះឃើញស្ត្រីរងគ្រោះដេកស្លាប់ ដោយដាច់ក្បាលចេញពីដងខ្លួនបានត់ទៅហើយ ។
ចំណែកជនដៃដល់ជាកូនប្រុសបានរត់គេចខ្លួនបាត់ស្រមោល ទើបរាយការណ៍ជូននគរបាលចុះទៅពិនិត្យមើលជាក់ស្ដែង។ ពេលនោះ នៅមិនទាន់កំណត់ថា កូនប្រុសជាអ្នកកាត់ក្បាលម្ដាយនៅឡើយទេ លុះក្រោយពេលមកនគរបាលបានឆែកមើលកាមេរ៉ាសុវត្ថិភាពនៅជិតនោះអត់ឃើញមានអ្នកផ្សេងណាចេញចូលបន្ទប់នោះ ក្រៅពីអ្នកទាំង២នាក់ម្ដាយនិងកូននោះទេ ហើយក៏ឃើញកូនប្រុសរត់ចេញពីក្នុងបន្ទប់ជួលទាំងយប់ជ្រៅទើបនគរបាលកំណត់ថា កូនប្រុសរូបនេះគឺជាឃាតករសម្លាប់ម្ដាយដោយកាត់ក្បាលបែបនេះ ហើយនគរបាលកំពុងធ្វើការស្រាវជ្រាវដើម្បីចាប់ខ្លួនកូនប្រុសជាឃាតកររូបនោះហើយ។
ចែករំលែកព័តមាននេះ