ខេត្តកំពង់ឆ្នាំង ៖ បើតាមសេចក្តីរាយការណ៍បានឱ្យដឹងថា សពស្ត្រីមិនស្គាល់អត្តសញ្ញាណម្នាក់ត្រូវបានគេប្រទះឃើញតាមទឹកហូរលាយឡំជាមួយនឹងកំប៉ោង បង្កឱ្យយមានការភ្ញាក់ផ្អើលដល់សមត្ថកិច្ចនគរបាលចុះទៅពិនិត្យដល់កន្លែងកើតហេតុ កាលម៉ោង12ថ្ងៃត្រង់ ថ្ងៃទី27 ខែសីហា នៅចំណុចទន្លេតូច ស្ថិតក្នុងភូមិកំពុងបាស្រូវ ឃុំជលសា ស្រុកជលគីរី ខេត្តកំពង់ឆ្នាំង ។
យោងតាមសេចក្តីរាយការណ៍ពីសមត្ថកិច្ចនគរបាលប៉ុស្តិ៍រដ្ឋបាលឱ្យដឹងថា សាកសពស្ត្រីខាងលើនេះ ត្រូវបានប្រជាពលរដ្ឋប្រទះឃើញអណ្ដែតតាមខ្សែទឹកទន្លេតូច និងបានរាយការណ៍ជូនសមត្ថកិច្ចចុះទៅពិនិត្យមើលក្រែងបានស្គាល់អត្តសញ្ញាណផងដែរ ។
សេចក្តីរាយការណ៍ដដែលបានឱ្យដឹងថា សពស្ត្រីរូបនេះមិនត្រូវបានគេស្គាល់អត្តសញ្ញាណនោះទេ តែបើតាមការសន្និដ្ឋានសាកសពស្ត្រីនេះអាចអាយុប្រមាណជា30ឆ្នាំ ស្លៀកខោខូវប៊យ ពណ៌ទឹកប៊ិច ពាក់អាវយឺតខាងក្នុងពណ៌ស និងអាវខាងក្រៅដៃវែងពណ៌ខៀវ ។
ក្រោយពេលកើតហេតុ សពស្ត្រីរងគ្រោះខាងលើត្រូវបាននគរបាលប៉ុស្តិ៍រដ្ឋបាលឃុំជលសារ ទាញមកដាក់ជិតច្រាំងទន្លេ ដើម្បីរង់ចាំសាច់ញាតិបងប្អូនតាមរក នឹងនាំយកទៅធ្វើបុណ្យតាមប្រពៃណីផងដែរ ។
ពាក់ព័ន្ធករណីនេះ លោកអធិការនគរបាលស្រុកជលគិរី សូមអំពាវនាវដល់បងប្អូនប្រជាពលរដ្ឋដែលមានបាត់សមាជិកគ្រួសារដូចមានភិនភាគខាងលើនេះ សូមអញ្ជើញមកទំនាក់ទំនងជាមួយប៉ុស្តិ៍នគរបាលរដ្ឋបាលឃុំជលសា ស្រុកជលគីរី ខេត្តកំពង់ឆ្នាំង ដើម្បីនាំយកសាកសពទៅរៀបចំធ្វើបុណ្យទៅតាមប្រពៃណី ៕
ចែករំលែកព័តមាននេះ