ខេត្តបន្ទាយមានជ័យ ៖ កូនដើមក្ងោកជិត១.០០០ដើម កាលពីរសៀលថ្ងៃទី២៦ ខែសីហា ឆ្នាំ២០២០ ត្រូវបានយកទៅដាំនៅតាមមាត់អាងម្កាក់និងតាមដងផ្លូវជាតិលេខ៥៦ ក្នុងសង្កាត់ម្កាក់ក្រុងសិរីសោភ័ណ ដើម្បីលម្អតាមដងផ្លូវ ។
លោក ហ៊ឹល រ៉ាយ៉ា អភិបាលក្រុងសិរីសោ ភ័ណ ថ្លែងថា កូនដើមក្ងោកដែលបានដាំតាមខ្នងទំនប់អាងម្កាក់និងតាមដងផ្លូវលេខ៥៦នេះ នៅពេលចេញផ្កាពិតជាមានទេសភាពស្រស់ស្អាតពីធម្មជាតិ ។ លោកក៏សូមសម្តែងនូវការកោតសរសើរលោកជំទាវឧកញ៉ា ហេម ចិត្តា មហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ ប្រធានកិត្តិយសសមាគមនារីដើម្បីសន្តិភាពនិងអភិវឌ្ឍន៍ខេត្តបន្ទាយមានជ័យ និងឯកឧត្តម ស សុខា អនុប្រធានសហភាពសហព័ន្ធយុវជនកម្ពុជាទទួលបន្ទុកខេត្តព្រៃវែង ខេត្តបាត់ដំបង និងខេត្តបន្ទាយមានជ័យ និងលោកជំទាវ កែ សួនសុភី ស សុខា ដែលបានចូលរួមដាំកូនដើមក្ងោកដើម្បីលម្អក្រុងសិរីសោភ័ណ ។
ឯកឧត្តម អ៊ុំ រាត្រី អភិបាលខេត្ត ថ្លែងថា តាមការណែនាំរបស់ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធ ប្រឆាំងគ្រឿងញៀន និងជាប្រធានក្រុមថ្នាក់ជាតិចុះជួយមូលដ្ឋានខេត្តបន្ទាយមានជ័យ រដ្ឋបាលខេត្តបានខិតខំស្តារឡើងវិញក្នុងការដាំកូនរាំងទឹកនៅតាមតំបន់រមណីយដ្ឋានអាងជើងគ្រុស ស្រុកថ្មពួក និងដាំកូនដើមក្ងោកនៅតាមខ្នងអាងម្កាក់និងតាមដងផ្លូវនេះ ជាប្រយោជន៍ដ៏សំខាន់ដូចជា ទាញយកទឹកភ្លៀង ការពារខ្យល់និងលម្អតាមដងផ្លូវ ។ អាជ្ញាធរនិងបងប្អូនប្រជាពលរដ្ឋនៅតាមមូលដ្ឋាន ត្រូវចូលរួមថែរក្សាការពារឱ្យបានល្អផងដែរ ក្រោយពេលដាំរួចហើយ ។
មុននេះ កូនរាំងទឹកចំនួន១.២០០ដើមត្រូវបានដាំខ្នងទំនប់រមណីយដ្ឋានអាងជើងគ្រុស ស្ថិតឃុំបន្ទាយឆ្មារ ស្រុកថ្មពួក កាលពីរសៀលថ្ងៃទី២៥ ខែសីហា ឆ្នាំ២០២០ ។ ក្នុងឱកាសនោះ មានការចូលរួមពីលោកជំទាវឧកញ៉ា ម៉ៅ ម៉ាល័យ ភរិយាឯកឧត្តមឧបនាយករដ្ឋមន្ត្រី កែ គឹមយ៉ាន ឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្ត និងមន្ត្រីរាជការ កងកម្លាំងប្រដាប់អាវុធទាំង៣ស្ថាប័ន ។
ឯកឧត្តម អ៊ុំ រាត្រី មានប្រសាសន៍ថា កូនរាំងទឹកចំនួន១.២០០ដើម ដែលបានដាំលើខ្នងអាងតំបន់រមណីយដ្ឋានអាងជើងគ្រុសនេះ គឺដើម្បីឱ្យក្លាយជាតំបន់ធម្មជាតិមានព្រៃរាំងទឹកតាមមាត់អាង ពេលដែលធំមានម្លប់សម្រាប់ជ្រក ។ ការដាំកូនរាំងទឹកនេះពិតជាប្រយោជន៍ដូចជា ផ្តល់ម្លប់ និងតាញទឹកភ្លៀង ការពារខ្យល់កន្ត្រាក់ គឺទទួលផលបានគ្រប់បែបយ៉ាង ។
យើងទាំងអស់គ្នាត្រូវចូលរួមថែរក្សាកូនរាំងទឹកនេះឱ្យបានធំ បើយើងមិនបានចូលរួមដាំក៏ត្រូវចូលថែរក្សាដែរឲ្យបានល្អប្រសើរ ៕
ចែករំលែកព័តមាននេះ