ខេត្តតាកែវ ៖ កុំថ្ងូរថាក្រ…បើយើងមិនរក…មើលនែ ! ស្ត្រីម្នាក់បានច្នៃម៉ូតូដឹកបន្លែ គ្រប់ប្រភេទនិងសាច់ លក់ចល័តពីកន្លែងមួយទៅកន្លែងមួយ រឿងអីមិនញញឹមនឹងចំណូលជាទីពេញចិត្តព្រោះទីណាក៏មានម៉ូយចាំទិញដែរ ។ ខ្លាចតែខ្ចិលទ្រមក់…ហើយសាញមិនជំនះបង្កើតមុខរបរ ហើយស្រែកថាក្រ ស្រែកថាពិបាករកស៊ី ។ ជាក់ស្តែងប្រជាពលរដ្ឋមួយចំនួនរស់នៅតាមបណ្តាស្រុកនានាក្នុងខេត្តតាកែវភាគច្រើនជាស្ត្រី ចាប់យកមុខរបរលក់បន្លែ សាច់តាមម៉ូតូដឹកចងយ៉ាងរយីងរយោងដើម្បីជួយសម្រួលជីវភាព មិនចាំបាច់ធ្វើចំណាកស្រុក ចោលកូន ចោលប្រពន្ធ-ប្តីទេ។
អ្នកស្រី យឹម ចន្ថា អាយុ៤៥ឆ្នាំរស់នៅភូមិរវៀង ឃុំសំបួរ ស្រុកទ្រាំង ខេត្តតាកែវ ដែលកំពុងរៀបចំបន្លែគ្រប់មុខដាក់លើម៉ូតូយ៉ាងសំពីងសំពោង នៅកន្លែងលក់បន្លែបោះដុំនិងលក់រាយមួយ ស្ថិតនៅខាងជើងផ្សារតាកែវញញឹមស្រស់និយាយប្រាប់កោះសន្តិភាពថា គាត់ចាប់មុខរបរលក់បន្លែគ្រប់មុខគ្រប់ម៉ាក មានត្រីខ្លះ សាច់ជ្រូកខ្លះតាមម៉ូតូច្នៃនេះ អស់រយៈពេលជាង១០ឆ្នាំមកហើយ ។
ារៀងរាល់ថ្ងៃវេលាម៉ោងជាង៣ជិតភ្លឺ គាត់ជិះម៉ូតូចេញពីភូមិសំដៅមកផ្សារលក់បន្លែគ្រប់មុខដែលបោះ ដុំនិងលក់រាយនៅខាងជើងផ្សារតាកែវ ។ គាត់ទិញត្រី សាច់ជ្រូក សាច់គោបន្លែគ្រប់មុខដូចជាស្ពៃក្តោប ត្រកួន ត្រសក់ ស្ពៃ ប៉េងប៉ោះ ត្រយូងចេក ជីគ្រប់មុខ និងបន្លែផ្សេងៗទៀត ចងសំពីងសំពោងតាមម៉ូតូ ។ លុះដល់ម៉ោង៦គាត់ដឹកបន្លែទៅដាក់លក់នៅមុខផ្ទះ រហូតដល់ជិតម៉ោង៨ ទើបរើដាក់ក្នុងជាលដឹកតាមម៉ូតូជិះលក់ចល័តតាមភូមិនានារហូតដល់បាយថ្ងៃត្រង់ ទើបគាត់មកផ្ទះទោះលក់អស់ ឬមិនអស់ក៏ដោយទុកលក់បន្ត ។
អ្នកស្រី ចន្ថា បានបញ្ចាក់ថា មុខរបរលក់បន្លែត្រីសាច់ចល័តនេះត្រូវចំណាយដើមទុនអស់ពី៤០ទៅ៥០ម៉ឺនរៀល ហើយក្នុងមួយថ្ងៃអាចចំណេញ៤ឬ៥ម៉ឺនរៀល ហើយតាំងពីគាត់ចាប់យកមុខនេះមកធ្វើឲ្យជីវភាពគ្រួសាររបស់គាត់អាចរស់បានដោយមិនបាច់នាំគ្នាធ្វើចំណាកស្រុកបែកបាក់ប្តីប្រពន្ធនោះទេ ។
បុរសឈ្មោះ ស្រស់ អាយុជាង៤០ឆ្នាំ រស់នៅភូមិត្រាំ សង្កាត់រកាក្រៅ ក្រុងដូនកែវ ខេត្តតាកែវ ដែលរៀបនិងជិះម៉ូតូដឹកបន្លែចេញ បានឆ្លៀតប្រាប់ឲ្យដឹងថា ក្រោយពីធ្វើចំណាកស្រុកទៅប្រទេសថៃមួយរយៈមកឃើញថា មិនសូវកាក់កបគាត់ក៏ចាប់យកមុខ របរលក់ត្រី សាច់ជ្រូក សាច់គោនិងបន្លែស្រស់គ្រប់មុខលក់តាមម៉ូតូចល័តតាមភូមិ ឃុំនានានៅតាមជាយខេត្ត ។ គាត់ថា យ៉ាងហោចណាស់ក្នុងមួយថ្ងៃរកចំណូលតិចបំផុត៧ម៉ឺនរៀលដែរ តែវាចំណាយកម្លាំងពលកម្មក្នុងការបើកម៉ូតូពីជិតភ្លឺដល់រសៀលផងដែរ ។
លោក ស្រស់ បានបន្ថែមថា ក្រោយពីគាត់ចាប់មុខរបរនេះធ្វើឲ្យគ្រួសារមានជីវភាពធូរធាជាងមុនច្រើន មិនខ្វះខាតដូចកាលពីធ្វើចំណាកស្រុកទេ ។ កាលទៅចំណាកស្រុករាល់ខែរកលុយផ្ញើមកឲ្យប្រពន្ធចាយមិនគ្រាន់នោះទេ គឺខ្ជីមុនសងក្រោយរហូត ។ គាត់ថា ក្រោយមកក៏ត្រឡប់មកស្រុកកំណើតវិញ ហើយចាប់យកមុខរបរនេះចិញ្ចឹមគ្រួសារ រហូតមកដល់បច្ចុប្បន្ន វាមិនធ្វើជាមហាសេដ្ឋីទេ តែវាអាចដោះស្រាយប្រចាំថ្ងៃបានធូរ ។
លោក ជា ស្រស់ រំលឹកថា កុំថ្ងូរថាក្របើយើងមិនរក…សូម្បីតែគេជាស្ត្រីបានច្នៃម៉ូតូ ដឹកបន្លែ សាច់លក់ ចល័តពីកន្លែងមួយទៅកន្លែងមួយ រឿងអីមិនញញឹមនឹងចំណូល…ខ្លាចតែខ្ចិល ហើយសាញមិនជំនះបង្កើតមុខរបរ ហើយកុំស្រែកថាពិបាករកស៊ី ។ លោកថា ទោះបីហត់មែន ប៉ុន្តែក៏មិនខ្វះហូបដែរ គឺហូបឆ្ងាញ់ជាងចំណាកស្រុក ។ ព្រោះសាច់ដែលលក់រាល់ថ្ងៃ ទុកខ្លះធ្វើម្ហូបហូបឆ្ងាញ់គ្រប់ពេល ។
អ្នកស្រីចាន់ ស្រីនិងប្តីរស់នៅភូមិពង្រ ឃុំខ្វាវ ស្រុកទាំង ខេត្តតាកែវដែលកំពុងរៀបចំបន្លែដាក់លើម៉ូតូបានឆ្លៀតប្រាប់ថា ដឹកបន្លែគ្រប់មុខនិងត្រីសាច់គោ ជ្រូក យកទៅលក់នៅផ្ទះ ស្ថិតនៅភូមិពង្រ ឃុំខ្វាវ ស្រុកទ្រាំង ។ គាត់ថា ជារៀលរាល់ព្រឹកព្រលឹមវេលាម៉ោង៤គាត់និងប្តីជិះម៉ូតូច្នៃ ដាក់ជាលមកខាងជើងផ្សារតាកែវដែលជាកន្លែងលក់បន្លែបោះដុំនិងរាយ ។ គាត់ប្រកបមុខរបរនេះអស់រយៈពេលជិត១០ឆ្នាំ គឺគាត់ទិញយកទៅដាក់លក់នៅមុខផ្ទះរបស់គាត ។ ក្នុងមួយខែយ៉ាងហោចណាស់រកចំណូលមិនតិចពី៨០ម៉ឺនរៀលនោះទេ ។ គាត់ថា បើទោះបច្ចុប្បន្នជំងឺកូវីដ១៩ មិនទាន់ស្ងប់ស្ងាត់ក៏ពិតមែន តែវាមិនប៉ះពាល់ដល់មុខរបរលក់ដូររបស់គាត់ប្រចាំថ្ងៃដែរ ។ រយៈពេលជិត១០ឆ្នាំមកនេះគាត់សន្សំលុយពីការលក់បន្លែគ្រប់មុខ ត្រី សាច់គោជ្រូកអាចសាងសង់ផ្ទះឈើពីរខ្នងរួចរាល់ហើយដែរ មិនបាច់ចំណាកស្រុកទេ ។
អ្នកស្រី ចាន់ ស្រី បានបញ្ជាក់ថា ទីតាំងលក់បន្លែគ្រប់ប្រភេទនៅខាងជើងផ្សារតាកែវភាគច្រើនដឹកពីវៀតណាមមក ហើយភាគតិចណាស់ជាបន្លែរបស់ខ្មែរ ។ កន្លងមកនេះតាមអ្នកស្រីដឹងគឺមិនដែលឃើញមន្ត្រីកាំកុងត្រូលខេត្តចុះមកពិនិត្យគុណភាពបន្លែទាំងនោះម្តងណាឡើយ គាត់គិតថា សង្ស័យមានប្រើគីមីផងក៏មិនដឹង ព្រោះគ្មានមន្ត្រីជួយពិនិត្យសោះ ៕
ចែករំលែកព័តមាននេះ