ខេត្តកំពង់ស្ពឺ ៖ សេចក្តីរាយការណ៍បឋមថា កាលពីព្រឹកថ្ងៃទី២៧ សីហា ឆ្នាំ២០២០ មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានរៀបចំបញ្ជូនខ្លួនជនសង្ស័យប្រុសស្រីចំនួន៥នាក់ទៅកាន់ស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងបញ្ជូនទៅតុលាការ ពាក់ព័ន្ធករណីជួញដូរគ្រឿងញៀន ដោយខុសច្បាប្រមាណជាង១គីឡូក្រាម ។
ជនសង្ស័យទាំង៥ នាក់នោះមាន៖
១-ឈ្មោះ អ៊ុក សូរិយា ភេទប្រុស អាយុ ៣៨ឆ្នាំ ជនជាតិ ខ្មែរ ។
២-ឈ្មោះ ជួន វណ្ណ: ភេទប្រុស អាយុ ៣៦ឆ្នាំ ជនជាតិ ខ្មែរ ។
៣-ឈ្មោះ កេត សាវ៉ន ភេទប្រុស ៦២ឆ្នាំ ជនជាតិ ខ្មែរ ។
៤-ឈ្មោះ វង្ស ង៉ហុង ភេទស្រី អាយុ ៣០ឆ្នាំ ជនជាតិ វៀត ណាម ។
៥-ឈ្មោះ ឡុង ស្រីពេជ្រ ភេទស្រី អាយុ ២៩ឆ្នាំ ជនជាតិខ្មែរ ។
ទាក់ទិនករណីខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនបានឲ្យដឹងថា ក្រោមការដឹកនាំពីសំណាក់នាយឧត្តម សេនីយ៍ ម៉ក់ ជីតូ អគ្គស្នងការរងនគរបាលជាតិ កាលពី៧យប់ថ្ងៃទី២៤ សីហា ឆ្នាំ២០២០ កម្លាំងសមត្តកិច្ចជំនាញនៃការិយាល័យទី៤ ដឹកនាំដោយលោកឧត្តមសេនីយ៍ ឃឹង សារ៉ាត់ នាយករងមន្ទីរប្រឆាំគ្រឿងញៀន បានចុះទៅសហការជាមួយនគរបាលមូលដ្ឋានខេត្តកំពង់ស្ពឺ ក្រោមការសម្របសម្រួលពីលោកស្រី ចាត សូរស្មី ព្រះរាជអាជ្ញាអមសាលា ដំបូងខេត្ត បានបើកកិច្ចប្រតិបត្តិការបង្ក្រាបករណីរក្សាទុក ជួញដូរ គ្រឿងញៀនខុសច្បាប់មួយករណី ស្ថិតនៅភូមិសាស្ត្រផ្លូវជាតិលេខ៣ ក្នុងផ្ទះសំណាក់យីហោ លី ហេង ភូមិព្រៃកេះ ឃុំព្រៃវិហារ ស្រុកគងពិសី ខេត្តកំពង់ស្ពឺ ។
លទ្ធផលឃាត់ខ្លួនជនសង្ស័យ៥នាក់ និងចាប់យកវត្ថុតាងរួមមាន ៖សារធាតុញៀនប្រភេទម៉េតំហ្វេតាមីនចំនួន ១២៩៩.៥១ ក្រាម ស្មើ (ជាង១គីឡូ) ។ ក្រោយពេលឃាត់ខ្លួនជនសង្ស័យប្រុសស្រីទាំង៥នាក់ និងថ្នាំញៀនជាង១គីឡូក្រាម ត្រូវបានកម្លាំងសមត្តកិច្ចនាំមកកាន់មន្ទីរប្រឆាំងគ្រឿងញៀន ដើម្បីធ្វើការស្រាវជ្រាវរកបក្សពួក និងមេខ្លោងរហូតចប់ការស៊ើបអង្កេត បានបញ្ជូនជនសង្ស័យ និងវត្ថុតាងទៅសាលាដំបូងខេត្តកំពង់ស្ពឺវិញ។
ព័ត៌មានបន្តនឹងមានផ្សាយជូនបន្ត ។
ចែករំលែកព័តមាននេះ