ជប៉ុន ៖ លោក Hiromu Inada អាយុ ៨៧ឆ្នាំ ដែលមានវិញ្ញាបនប័ត្រដាក់នៅលើជញ្ជាំងផ្ទះរបស់លោក ដោយបានបញ្ជាក់ថា លោកគឺអត្តពលិកកីឡាទ្រីយ៉ាត្លុង ចំណាស់ជាងគេបំផុតនៅលើពិភពលោក ប៉ុន្តែបុរសជនជាតិជប៉ុនរូបនេះ នៅតែបន្តធ្វើការហ្វឹកហាត់យ៉ាងសកម្ម ហើយសង្ឃឹមថានឹងបន្តការប្រកួតប្រជែងរហូតដល់វ័យ ៩០ឆ្នាំ។
រំលឹកជូនថា នៅឆ្នាំ ២០១៨ ក្នុងវ័យ៨៥ឆ្នាំ និង៣២៨ថ្ងៃ លោក Inada បានធ្វើដំណើរទៅកាន់ទីក្រុង Kailua-Kona នៅរដ្ឋហាវ៉ៃ សហរដ្ឋអាមេរិក ដើម្បីចូលរួមការប្រកួតកម្មវិធី World Championship Ironman ដែលអ្នកចូលរួមទាំងអស់ សុទ្ធតែមានអាយុក្មេងជាងលោក។ ដោយឡែកការលុបចោលព្រឹត្តិការណ៍នេះ កាលពីខែតុលា ដោយសារការរីករាលដាលនៃកូវីដ១៩ មិនបានធ្វើអោយលោកបោះបង់ចោលមហិច្ឆិតា ដើម្បីប្រកួតប្រជែងនោះទេ។ ហើយលោកកំពុងរក្សាកាលវិភាគហ្វឹកហាត់ដ៏សកម្ម សម្រាប់ការវិលត្រឡប់ទៅកាន់កោះហាវ៉ៃ នៅឆ្នាំក្រោយម្តងទៀត។
លោកបានថ្លែងប្រាប់ Reuters ឱ្យដឹងថា «គោលដៅរបស់ខ្ញុំ គឺជើងឯកពិភពលោកឆ្នាំក្រោយនៅហាវ៉ៃ។ ខ្ញុំត្រូវតែចូលរួមជាដាច់ខាត។ ហើយខ្ញុំពិតជាចង់បំបែកឯតទគ្គកម្មពិភពលោក សម្រាប់ការប្រកួតប្រជែងនៅវ័យចាស់ជាថ្មីម្តងទៀត។ នេះជាគោលដៅបច្ចុប្បន្ន និងធំបំផុតរបស់ខ្ញុំ»។
សូមបញ្ជាក់ថា World Championship Ironman ត្រូវបានគេចាត់ទុកជាព្រឹត្តិការណ៍កីឡា ស៊ូទ្រាំដ៏ស្វិតស្វាញបំផុត ដែលតម្រូវឱ្យអត្តពលិកហែលឆ្លងទឹក ៣,៨៦គីឡូម៉ែត្រ, ជិះកង់ ១៨០,២៥គីឡូម៉ែត្រ និងរត់ម៉ារ៉ាតុង ៤២,១៩គីឡូម៉ែត្រពេញលេញ៕
ចែករំលែកព័តមាននេះ