លោក សុន ឆ័យ អតីតតំណាងរាស្ត្រ អតីតគណបក្សសង្គ្រោះជាតិ ដែលល្បីឈ្មោះម្នាក់បានសរសេរលិខិតស្នើសុំសិទ្ធិធ្វើនយោបាយឡើងវិញទៅកាន់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង នៅថ្ងៃទី២៧ សីហានេះ ។
ក្នុងលិខិតដែលលោកបានចុះហត្ថលេខា លោកសុន ឆ័យ បញ្ជាក់ថា គាត់ជាបុគ្គលអតីតសមាជិកគណៈកម្មាធិការអចិន្ត្រៃយ៍គណបក្សសង្គ្រោះជាតិម្នាក់ដែលស្ថិតនៅក្នុងបញ្ជីហាមមិនឲ្យធ្វើនយោបាយរបស់តុលាការកំពូល ។
ដោយផ្អែកតាមមាត្រា៤៥ថ្មី (ស្ទួនមួយ)នៃច្បាប់ស្តីពីគណបក្សនយោបាយ លោកស្នើសូមសិទ្ធិធ្វើនយោបាយឡើងវិញ ។ តុលាការកំពូលបានសម្រេចរំលាយគណបក្សសង្គ្រោះជាតិ និងហាមមិនឲ្យសមាជិកជាន់ខ្ពស់ចំនួន ១១៨ នាក់ ធ្វើសកម្មភាពនយោបាយ ៥ ឆ្នាំ កាលពីថ្ងៃទី១៦ ខែវិច្ឆិកាឆ្នាំ២០១៧ ។ តែក្រោយពីមានការធ្វើវិសោធនកម្មច្បាប់ស្តីពីគណបក្សនយោបាយមកទល់ពេលនេះមាន មន្ត្រីជាន់ខ្ពស់អតីតគណបក្សប្រឆាំងធំមួយនេះចំនួន៩រូប ក្នុងចំណោម១១៨រូប នោះ បានដាក់ពាក្យសុំសិទ្ធិធ្វើនយោបាយឡើងវិញ ។
នេះមិនទាន់រាប់លោកសុន ឆ័យ ដែលទើបស្នើសុំនៅពេលនេះនោះទេ ។ លោកសុន ឆ័យមិនអាចទាន់ទងសុំការពន្យល់បន្ថែមបានទេនៅពេលនេះ៕
ចែករំលែកព័តមាននេះ