ហូឡង់ ៖ កីឡាករ Daley Blind បាននិយាយថា បច្ចុប្បន្នរូបគេអារម្មណ៍ធូរស្បើយច្រើនហើយ បន្ទាប់ពីបានដួលសន្លប់ អំឡុងការប្រកួតមិត្តភាពមុនបើករដូវកាល ដែល…
ហូឡង់ ៖ កីឡាករ Daley Blind បាននិយាយថា បច្ចុប្បន្នរូបគេអារម្មណ៍ធូរស្បើយច្រើនហើយ បន្ទាប់ពីបានដួលសន្លប់ អំឡុងការប្រកួតមិត្តភាពមុនបើករដូវកាល ដែល Ajax យកឈ្នះ Hertha Berlin ដោយលទ្ធផល ១-០ កាលពីថ្ងៃអង្គារ៍កន្លងទៅ។
អតីតខ្សែការពារក្រុម Man United វ័យ ៣០ឆ្នាំរូបនេះ ត្រូវបានគ្រូពេទ្យធ្វើរោគវិនិច្ឆ័យថា មានជំងឺបេះដូងកាលពីខែធ្នូ ឆ្នាំ២០១៩ បន្ទាប់ពីមានអាការៈវិលមុខ អំឡុងពេលការប្រកួតក្របខណ្ឌ Champions League ទល់នឹងក្រុម Valencia ។ គេបានវិលត្រឡប់មកចូលរួមជាមួយក្រុមវិញកាលពីខែកុម្ភៈកន្លងទៅ បន្ទាប់ពីទទួលបានការព្យាបាលពីក្រុមគ្រូពេទ្យយ៉ាងយកចិត្តទុកដាក់។
សមាជិកក្រុមជម្រើសជាតិហូឡង់រូបនេះ បានបង្ហោះលើបណ្តាញសង្គមរបស់ខ្លួនកាលពីថ្ងៃពុធ ដើម្បីថ្លែងអំណរអរគុណដល់អ្នកគ្រប់គ្នា ជាពិសេសសម្រាប់ការគាំទ្រ និងលើកទឹកចិត្ត។ «អរគុណយ៉ាងច្រើន ចំពោះរាល់សារដែលខ្ញុំបានទទួល។ ខ្ញុំអាចនិយាយថា ខ្ញុំមិនអីទេ ហើយខ្ញុំមានអារម្មណ៍ល្អណាស់នៅពេលនេះ»។
ក្លិបម្ចាស់ជើងឯក Eredivisie រដូវកាល ២០១៩-២០ ក៏ចេញសេចក្តីប្រកាសមួយផងដែរ ដោយលើកឡើងថា គេនឹងត្រូវទទួលការពិនិត្យបន្ថែមទៀត ហើយនឹងរង់ចាំលទ្ធផលនៃការធ្វើតេស្តពីអាការៈជំងឺរបស់គេ មុនពេលអាចវិលត្រឡប់បន្តការហ្វឹកហាត់ជាមួយក្រុមវិញ៕ (ដកស្រង់ចេញពី BBC)
ចែករំលែកព័តមាននេះ