បាត់ខ្លួនប្រពន្ធទាំងរំលងអធ្រាត្រ ប្តីកាន់រូបថតប្រកាសស្វែងរក
- ស្វាយរៀង
ខេត្តស្វាយរៀង ៖ បុរសម្នាក់ឈ្មោះភាព ភាន់ អាយុ២៧ឆ្នាំ ជាកម្មករ មានទីលំនៅភូមិក្បាលថ្នល់ ឃុំត្នោត ស្រុកកំពង់រោទ៌ ខេត្តស្វាយរៀង…
ខេត្តស្វាយរៀង ៖ បុរសម្នាក់ឈ្មោះភាព ភាន់ អាយុ២៧ឆ្នាំ ជាកម្មករ មានទីលំនៅភូមិក្បាលថ្នល់ ឃុំត្នោត ស្រុកកំពង់រោទ៌ ខេត្តស្វាយរៀង បានប្រកាសស្វែងរកប្រពន្ធឈ្មោះស៊ឹមគង់ ហៅចរិយា អាយុ២៤ឆ្នាំ ជាកម្មការិនី បានបាត់ខ្លួនកាលពីវេលាម៉ោង១និង១០នាទីយប់រំលងអធ្រាត្រថ្ងៃទី២៦ សីហា ឆ្នាំ២០២០ នៅភូមិក្បាលថ្នល់ ឃុំត្នោត ស្រុកកំពង់រោទ៌ ខេត្តស្វាយរៀង មិនដឹងថា នាងទៅទីណា បើបងប្អូនណាបានឃើញនាងនៅទីណា តាមភិនភាគរូបថតនេះ សូមផ្តល់ព័ត៌មានផង។
ការអំពាវនាវរបស់បុរសជាប្តីខាងលើនេះបានកើតឡើងកាលពីវេលាម៉ោង២រសៀលថ្ងៃទី២៧ សីហា ២០២០ នៅភូមិក្បាលថ្នល់ ឃុំត្នោត ស្រុកកំពង់រោទ៌ ខេត្តស្វាយរៀង។
បើតាមប្រភពពីបុរសជាប្តីបានឲ្យដឹងថា មុនថ្ងៃកើតហេតុ វេលាម៉ោង២រសៀលថ្ងៃទី២៥ សីហា ឆ្នាំ២០២០ បុរសជាប្តីបានស្តីបន្ទោសប្រពន្ធមិនឲ្យទៅទាក់ទងធ្វើការនៅខាងអចលនទ្រព្យទេ ហើយក៏នាំប្រពន្ធឲ្យទៅធ្វើការនៅរោងចក្រវិញ ។ ពេលនោះស្ត្រីជាប្រពន្ធប្រកែក ដោយនិយាយប្រាប់ប្តីថា «រោងចក្រកាត់ដេរខោអាវ ខ្ញុំឈប់ធ្វើហើយ» ។
តាមប្រភពដដែលបានបន្តថា និយាយរួច បុរសជាប្តីក៏ដឹកឪពុកមាទៅឃុំច្រេស រហូតដល់ម៉ោង៧យប់ទើបត្រឡប់មកផ្ទះវិញ ។ បន្ទាប់មកប្តីក៏ដួសបាយហូបមុន រហូតដល់ម៉ោង៩យប់ ទាំងពីរនាក់ប្តីប្រពន្ធក៏នាំគ្នាដេកមួយស្របក់ក្រោយមក ស្ត្រីជាប្រពន្ធបានក្រោកឡើងទៅដួសបាយហូប ចំណែកបុរសជាប្តីបានដេកបន្តលង់លក់ ។
តាមប្រភពដដែលបានបន្តទៀតថា រហូតដល់វេលាម៉ោង១និង១០នាទីយប់រំលងអធ្រាត្រឈានចូលថ្ងៃទី២៦ សីហា ឆ្នាំ២០២០ ពេលប្តីក្រោកឡើង ស្រាប់តែបាត់ប្រពន្ធ មិនដឹងនាងចេញទៅណា បន្ទាប់មកប្តីក៏ក្រោកឡើងដើររក ប៉ុន្តែមិនឃើញនាងនៅក្នុងផ្ទះ ឬនៅក្នុងបរិវេណផ្ទះនោះទេ រហូតដល់ព្រឹកថ្ងៃទី២៦ សីហា ទើបប្តីប្រាប់ឪពុកក្មេកឱ្យរាយការណ៍ជូនសមត្ថកិច្ចនគបាលប៉ុស្ត៍រដ្ឋបាលឃុំត្នោតជួយអន្តរាគមន៍តាមរកតែម្តង។
ការតាមរកស្ត្រីជាប្រពន្ធខាងលើនេះ រហូតដល់ថ្ងៃទី២៧ សីហា ឆ្នាំ២០២០ នេះ ពុំទាន់លេចឮដំណឹងសោះ ទើបបុរសជាប្តីអំពាវនាវសូមឲ្យសមត្ថកិច្ចក៏ដូចមហាជន បើបានឃើញស្ត្រីជាប្រពន្ធដែលមានភិនភាគដូចរូបថតនេះ សូមជួយផ្តល់ព័ត៌មានឱ្យគាត់ផង តាមរយៈទូរសព្ទ័លេខ០៩៧ ២៣ ៤៣ ៩៩០ ។ ហើយបុរសជាប្តីបាននិយាយថា «បើប្រពន្ធសម្លាញ់បានឃើញដំណឹងនេះហើយ សូមត្រឡប់មកផ្ទះវិញ ប្តីចាំទទួល» ៕ (កែសម្រួលដោយ ៖ ធីតា)
ចែករំលែកព័តមាននេះ