ព្រៃវែង ៖ ព្រៃវែងជាខេត្តមួយដែលផលិតស្រូវនាំមុខគេក្នុងប្រទេសកម្ពុជា ។ ប្រទេសវៀតណាម ដែលជាប់ព្រំដែនខេត្តនេះ តែងតែទទួលទិញស្រូវពីកសិករនៅក្នុងខេត្តព្រៃវែង ។ របាយកាណ៍របស់មន្ទីរកសិម្មខេត្តបានឲ្យដឹងថា គិតចាប់ពីថ្ងៃទី២២…
ព្រៃវែង ៖ ព្រៃវែងជាខេត្តមួយដែលផលិតស្រូវនាំមុខគេក្នុងប្រទេសកម្ពុជា ។ ប្រទេសវៀតណាម ដែលជាប់ព្រំដែនខេត្តនេះ តែងតែទទួលទិញស្រូវពីកសិករនៅក្នុងខេត្តព្រៃវែង ។ របាយកាណ៍របស់មន្ទីរកសិម្មខេត្តបានឲ្យដឹងថា គិតចាប់ពីថ្ងៃទី២២ ខែឧសភា ដល់ថ្ងៃទី២៣ ខែសីហា ឆ្នាំ២០២០ គឺក្នុងរយៈពេលប្រមាណ១មួយខែនេះ ស្រូវពលរដ្ឋក្នុងខេត្តព្រៃវែង បាននាំ ចេញទៅវៀតណាមសរុប ២៦១,៨១១ តោន ក្នុងនោះប្រភេទស្រូវ IR504 មានតម្លៃ ១ ០២០ រៀល ស្រូវ OM5451មានតម្លៃ ៩២០ រៀល។
អង្គភាពជំនាញខេត្តបានបូកសរុបថា បើគិតពីចុងខែមិថុនា ដល់ចុងខែសីហានេះ ស្រូវពលរដ្ឋខេត្តព្រៃវែងបាននាំចេញទៅប្រទេសវៀតណាម បានប្រមាណ ៥៥០,៤៨៨ តោន ។ មានទីផ្សារលក់កសិផលជារឿងសំខាន់សម្រាប់កសិករ ប៉ុន្តែអ្នកជំនាញកសិកម្មបានលើកឡើងថា លក់ស្រូវមូលតែម្តងខាតជាងការលក់អង្ករ ។ លក់ស្រូវខាត ដោយហេតុថា នៅពេលគេកិនស្រូវយកអង្ករមានសំណល់អង្កាម និងកន្ទុកដែលអាចច្នៃធ្វើចំណីសត្វ និងជីកសិកម្មបាន ។ ដូច្នេះបើលក់ស្រូវ គឺខាតវត្ថុធាតុទាំងនោះ ម្យ៉ាងទៀតការលក់ស្រូវដោយផ្ទាល់មិនបានតម្លៃដូចលក់អង្ករនោះទេ ។
លោក យ៉ង សាំងកុមារ ដែលមានជំនាញខាងកសិកម្ម ធ្លាប់បានលើកឡើងពីការខាតបង់រវាងការលក់ស្រូវនិងអង្ករនេះ កាលពីពេលកន្លងមក ។ កម្ពុជាបាននាំចេញអង្ករចំនួន ៤២៦ ០៧៣ តោន ក្នុងរយៈពេល ៧ខែ នៅក្នុងឆ្នាំ២០២០ ដែលគិតជាកំណើន មានប្រមាណជា ៣៨.៣៣% ធៀបទៅនឹងរយៈពេលដូចគ្នា ឆ្នាំ២០១៩ ។
សហព័ន្ធស្រូវអង្ករកម្ពុជាបានឲ្យដឹងថា « បើយើងប្រៀបធៀបកំណើនក្នុងរយៈពេលប្រាំឆ្នាំចុងក្រោយ (២០១៥-២០១៩) នោះ យើងឃើញថា កំណើននៃការនាំចេញរបស់យើង ក្នុងរយៈពេល៧ខែ ដូចគ្នាទៅនឹងឆ្នាំ២០២០នេះ មានភាពមិននឹងនរ ដែលមានមធ្យមភាគក្រោម១%» ។ ស្ថាប័នជំរុញការនាំអង្ករចេញខាងលើនេះបញ្ជាក់ថា នៅឆ្នាំ២០២០ក្នុងដំណាក់កាលនៃជំងឺកូវីដ១៩ រីឯអង្ករសរីរាង្គនៅមានទំនោរកំណើនជាបណ្តើរៗ ។ សំរាប់៧ខែក្នុងឆ្នាំ ២០២០នេះ អង្ករក្រអូបមានកំណើនប្រមាណជិត ៣២% ហើយអង្ករស មានកំណើនកើនជាង៨២% ហើយអង្ករសរីរាង្គមានកំណើនជាង ១៦% បើប្រៀបទៅរយៈពេលដូចគ្នា ក្នុងឆ្នាំ២០១៩ ៕
ចែករំលែកព័តមាននេះ