ខេត្តកំពង់ចាម ៖ «អំពើជួញដូរមនុស្ស អំពើអាជីវកម្មផ្លូវភេទ និងការបន្តរាតត្បាតនៅជំងឺឆ្លងកូវីដ-១៩ ជាសកលគឺបានបង្កផលប៉ះពាល់ផ្នែកសេដ្ឋកិច្ចដល់ប្រជាពលរដ្ឋ ហើយផលប៉ះពាល់ផ្នែកសេដ្ឋកិច្ចនេះ នឹងបន្តរុញច្រានឲ្យប្រជាពលរដ្ឋមួយចំនួនឱ្យជួបប្រទះនឹងបញ្ហាលំបាកជីវភាព និងងាយស្រួលចាញ់បោកការអូសទាញរបស់មេខ្យល់ ដែលធ្វើការអូសទាញប្រជាពលរដ្ឋឲ្យធ្លាក់ខ្លួន…
ខេត្តកំពង់ចាម ៖ «អំពើជួញដូរមនុស្ស អំពើអាជីវកម្មផ្លូវភេទ និងការបន្តរាតត្បាតនៅជំងឺឆ្លងកូវីដ-១៩ ជាសកលគឺបានបង្កផលប៉ះពាល់ផ្នែកសេដ្ឋកិច្ចដល់ប្រជាពលរដ្ឋ ហើយផលប៉ះពាល់ផ្នែកសេដ្ឋកិច្ចនេះ នឹងបន្តរុញច្រានឲ្យប្រជាពលរដ្ឋមួយចំនួនឱ្យជួបប្រទះនឹងបញ្ហាលំបាកជីវភាព និងងាយស្រួលចាញ់បោកការអូសទាញរបស់មេខ្យល់ ដែលធ្វើការអូសទាញប្រជាពលរដ្ឋឲ្យធ្លាក់ខ្លួន ទៅក្នុងអន្ទាក់នៃទម្រង់ជួញដូរមនុស្ស និងអំពើអាជីវកម្មផ្លូវភេទ។
ជាមួយនោះស្នើឲ្យអាជ្ញាធរគ្រប់ លំដាប់ថ្នាក់ និងកងកម្លាំងត្រូវធ្វើការត្រួតពិនិត្យពិច្ច័យលើករណីនេះ និងយកចិត្តទុកដាក់ក្នុងការ ទប់ស្កាត់មិនឱ្យមានចំណាកស្រុក ដោយខុសច្បាប់» នេះជាប្រសាសន៍លើកឡើងរបស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត នាព្រឹកថ្ងៃទី២៥ សីហា ២០២០ ក្នុងសិក្ខាសាលាស្ដីពី កិច្ចរបស់មន្ត្រីនគរបាលយុត្តិធម៌ក្នុងសំណុំរឿងជួយដូរមនុស្ស និងអំពើធ្វើអាជីវកម្មផ្លូវភេទ ដែលបានប្រព្រឹត្តទៅនៅសណ្ឋាគារមួយកន្លែងក្នុង ក្រុងកំពង់ចាម។
លោក វង្ស ប៊ុនវិសុទ្ធ ព្រះរាជអាជ្ញានៃអយ្យការ អមសាលាដំបូងខេត្ត បានគូសបញ្ជាក់ឲ្យដឹងថា អំពីទិន្នន័យនៃសំណុំរឿង ជួញដូរមនុស្ស និងអំពើអាជីវកម្មផ្លូវភេទដែលអយ្យការអមសាលាដំបូងខេត្តកំពង់ចាម ទទួលបានក្នុងអំឡុងឆ្នាំ២០១៩ និង៨ខែដំបូងក្នុងឆ្នាំ២០២០។ ក្នុងឆ្នាំ២០១៩ ទទួលបានចំនួន ១៩សំណុំរឿង និងក្នុងរយៈពេល៨ខែដំបូងនៃឆ្នាំ២០២០នេះ ទទួលបានចំនួន១៣សំណុំរឿង។
អយ្យការអមសាលាដំបូងខេត្ត កត់សម្គាល់ដែរថាសំណុំរឿងនៃអំពើជួញដូរមនុស្ស និងធ្វើអាជីវកម្ម ផ្លូវភេទភាគច្រើនគឺជាជនរងគ្រោះ និងជនសង្ស័យជាបុគ្គលដែលជាប់សែស្រឡាយគ្នា ឬជាអ្នករស់នៅភូមិឃុំជាមួយគ្នា ហើយស្រុកចំនួន៣ ដែលតែងតែប្រឈមនឹង ករណីជួញដូរក្នុងនោះ មាន ស្រុកចម្ការលើ ស្រុកស្ទឹងត្រង់ និងស្រុកកងមាស។ ហេតុដូច្នេះហើយទើបអញ្ជើញលោកអធិការ នគរបាលស្រុកទាំង៣ឱ្យមកចូលរួមក្នុងសិក្ខាសាលា។ លោកព្រះរាជអាជ្ញាអមសាលាដំបូងខេត្ត មានប្រសាសន៍បន្តថា ការអរុណនៃសំណុំរឿងជួញដូរមនុស្ស និងអំពើធ្វើអាជីវកម្មផ្លូវភេទ ហាក់មិនមានការថយចុះនៅឡើយបើប្រៀបធៀបទិន្នន័យ២០១៩ និង៨ខែដំបូង ឆ្នាំ២០២០។
ទូរលេខមិនមានការថយចុះគឺជាចំណែកក្នុងការដាស់តឿន ឲ្យគ្រប់គ្នាបន្តសហការ និងប្រយុទ្ធប្រឆាំង ជាដាច់ខាតបន្ថែមទៀត នៅគ្រប់ទម្រង់នៃអំពើជួញដូរ។ អយ្យការអមសាលាដំបូងខេត្តកំពង់ចាម គឺបានកំណត់ករណីជួញដូរមនុស្ស និងអំពើធ្វើអាជីវកម្មផ្លូវភេទនេះគឺជាការងារអាទិភាពមួយ ក្នុងចំណោមការងារអាទិភាពផ្សេងទៀតដែលខ្លួននឹងត្រូវធ្វើការពិនិត្យឲ្យបានល្អិតល្អន់បំផុត ដោយហេតុថា បទល្មើសជួញដូរមនុស្ស និងអំពើធ្វើអាជីវកម្មផ្លូវភេទ គឺជាឧក្រិដ្ឋកម្មមួយ ដែលមានចរិតធ្ងន់ធ្ងរ ឲ្យជនរងគ្រោះភាគច្រើននៃអំពើនេះគឺជាស្ត្រីកុមារ និងក្រុមគ្រួសារដែលមាន ជីវភាពក្រីក្រ។
រូបលោកមានជំនឿថា ស្មារតីអនុវត្តច្បាប់ស្មារតីសហការ និងសាមគ្គីគ្នារវាងតួអង្គ និងភាគីដែលពាក់ព័ន្ធគឺពិតជានាំឲ្យយើងទទួលបាន ភាពជោគជ័យក្នុងការជួយសង្គ្រោះ ប្រជាពលរដ្ឋរបស់យើង ដែលធ្លាក់ចូលក្នុងអន្ទាក់នៃពួកមេខ្យល់ និងជនល្មើសនៃអំពើជួញដូរមនុស្ស និងអំពើអាជីវកម្មផ្លូវភេទរួមនឹងធ្វើការផ្ដន្ទាទោសលើជនទាំងនោះតាមបទបញ្ញត្តិច្បាប់។ ឯកឧត្តម អ៊ុន ចាន់ដា អភិបាលខេត្តកំពង់ចាមមានប្រសាសន៍ឲ្យដឹងដែរថា លេខាធិការដ្ឋាននៃគណៈកម្មាធិការ ប្រយុទ្ធប្រឆាំងការជួញដូរមនុស្សខេត្តកំពង់ចាមបានកំពុងដំណើរការយ៉ាងសស្រាក់សស្រាំ និងជាពិសេសជាងនេះទៅទៀត គឺបន្តយុទ្ធនាការក្នុងការអប់រំផ្សព្វផ្សាយអំពីអំពីទម្រង់ នៃអំពើជួញដូរមនុស្ស និងអាជីវកម្មផ្លូវភេទ ដោយសហការជាមួយគណៈបញ្ជាការឯកភាពស្រុកក្រុង ដើម្បីបញ្ជ្រាបចំណេះដឹង និងពន្យល់ពីហានិភ័យដែលអាចកើតឡើង ក្នុងអំពើជួញដូរមនុស្ស និងអំពើអាជីវកម្មផ្លូវភេទដល់ប្រជាពលរដ្ឋនៅតាមមូលដ្ឋាន។
ឯកឧត្តម អ៊ុន ចាន់ដា អភិបាលខេត្ត មានប្រសាសន៍បន្តថា ក្នុងនាមអាជ្ញាធរខេត្ត និងជាប្រធានគណៈកម្មាធិការប្រយុទ្ធប្រឆាំង ការជួញដូរមនុស្សខេត្ត រូបលោកប្រកាន់នូវជំហរដាច់ខាតដោយសហការជាមួយអយ្យការ អមសាលាដំបូងខេត្ត និងក្រុមការងារជំនាញនៃលេខាធិការដ្ឋានប្រយុទ្ធប្រឆាំងការជួញដូរមនុស្ស ក្នុងការប្រយុទ្ធប្រឆាំងនឹងអំពើជួញដូរមនុស្ស និងអំពើធ្វើអាជីវកម្មផ្លូវភេទ ដោយបង្កើនការទប់ស្កាត់ និងស្វែងរកបទល្មើស និងបង្ក្រាបកាន់តែម៉ឺងម៉ាត់ និងប្រុងប្រយ័ត្នជានិច្ច មិនអនុញ្ញាតឲ្យជនល្មើស អន្តរការី(មេខ្យល់)មានឱកាសពង្រីកសកម្មភាពបង្កភាពរងគ្រោះ ដល់ប្រជាពលរដ្ឋនៅក្នុងខេត្ត កំពង់ចាមឡើយ។
ជាមួយនោះក៏សូមអំពាវនាវឲ្យកងកម្លាំងប្រដាប់អាវុធ គ្រប់ថ្នាក់ខេត្តក្នុងខេត្តក៏ដូចជាអាជ្ញាធរក្រុងស្រុក សូមមេត្តាអង្កេត និងធ្វើការកត់សម្គាល់នូវទំនោនៃទម្រង់ ក្នុងការជួញដូរមនុស្ស និងអាជីវកម្មផ្លូវភេទ ក្នុងសម័យបច្ចេកវិទ្យាដែលមេខ្យល់ជនរងគ្រោះ អាណាព្យាបាលរបស់ជនរងគ្រោះ និងជនល្មើសបានធ្វើការទាក់ទងគ្នាតាមប្រព័ន្ធសង្គម ឬក្នុងទម្រង់ផ្សេងៗ ដែលបញ្ជាចៀសពីការតាមដាន ឬក្រសែភ្នែករបស់អាជ្ញាធរ។ អំពើជួញដូរមនុស្ស និងអំពើធ្វើអាជីវកម្មផ្លូវភេទ គឺជាឧក្រិដ្ឋកម្មមួយដ៏ធ្ងន់ធ្ងរពោលគឺជនរងគ្រោះមួយចំនួន បានធ្លាក់ចូលក្នុងអន្ទាក់នៃឧក្រិដ្ឋកម្មនេះគឺអាចប្រឈមនឹងការបាត់បង់សតិ ញៀនគ្រឿងញៀន ក្លាយជាស្ត្រីបម្រើផ្លូវភេទ នឹងកាន់តែអាក្រក់ជាងនេះទៅទៀតគឺការបាត់បង់អាយុជីវិត៕ ដោយ ៖ យ៉ាន់ ចាន់ថេត
ចែករំលែកព័តមាននេះ