រាជធានីភ្នំពេញ ៖ បន្ទាប់ពីសេចក្តីសម្រេចរបស់សហភាពអឺរ៉ុបស្តីពីការដកផ្នែកខ្លះនៃប្រព័ន្ធអនុគ្រោះពន្ធលើគ្រប់មុខទំនិញ លើកលែងតែគ្រឿងសព្វាវុធ (Everything but Arms/EBA) សម្រាប់ផលិតផល សម្លៀកបំពាក់ ស្បែកជើង និងផលិតផលធ្វើដំណើរមួយចំនួនពីកម្ពុជា ហើយចូលជាធរមានកាល ពីថ្ងៃទី១២ សីហា ទើបកន្លងផុតទៅថ្មីៗនេះក៏ដោយសម្រាប់សហជីពក្នុងស្រុកមួយចំនួនយល់ថា គ្មានអ្វីគួរឱ្យចាប់អារម្មណ៍មិនថា កម្មករឬសហជីព ។
ប៉ុន្តែរឿងដែលគួរចាប់អារម្មណ៍ ឬជាបញ្ហាដែលកំពុងធ្វើឱ្យប៉ះពាល់ គឺផលិតផលដែលផលិតបាន ហើយអ្នកបញ្ជាទិញមិនទាន់ឱ្យមានការនាំចេញនៅឡើយ រក្សាទុកបន្តនៅតាមរោងចក្រ ដែលទទួលបានការបញ្ជាទិញ ។
លោកបណ្ឌិត ជូន មុំថុល ប្រធានសហព័ន្ធសហជីពខ្មែរបានឱ្យដឹងនៅថ្ងៃទី២៦ សីហានេះថា សញ្ញានៃការដក EBA នេះគ្មាននណាចាប់អារម្មណ៍សោះ តែឥលូវនេះបញ្ហាដែលគេចាប់អារម្មណ៍ ទីផ្សារ តែគ្មានអ្នកទិញខោអាវគេផលិតយកចេញទៅហើយ អត់មានអ្នកទិញ ។ ម្នាក់ៗសម្ងំនៅតែក្នុងផ្ទះអត់មិនហ៊ានចេញមកខាងក្រៅផ្ទះ ។
លោកបណ្ឌិត សង្កត់ធ្ងន់ដូច្នេះថា «បញ្ហា EBAនេះ ទាំងបងប្អូនកម្មករក្តី ទាំងខ្ញុំក្តី មិនមានការចាប់អារម្មណ៍សូម្បីតែបន្តិច ។ បញ្ហាដែលធ្វើឱ្យប៉ះពាល់ដល់ពួកយើង គឺរឿងកូវីដ-១៩នេះតែម្តង ខោអាវដេររួចអស់ហើយ អ្នកបញ្ជាទិញមិនទាន់យកទៅ» ។
បើតាមលោកបណ្ឌិត ស្ថិតក្នុងកាលៈទេសៈសព្វថ្ងៃនេះ «មានអ្នកបញ្ជាទិញខ្លះ គេឱ្យរក្សាទុកផលិតផលដែលបញ្ជាទិញទុកនៅកម្ពុជា អ្នកបញ្ជាទិញខ្លះ គេឱ្យបញ្ជូនទៅឱ្យគេ(នាំចេញ)តែយើងត្រូវចូលរួមចំណាយប្រាក់ខ្លះទៅដល់ការមើលថែលើផលិតផលនៅប្រទេសគេ» ។ ការពន្យាឬការបន្តរក្សាទុកទំនិញដែលផលិតរួចហើយ នៅតាមរោងចក្រ បើតាមការសង្កេតរបស់ប្រធានប្រធានសម្ព័ន្ធសហជីពប្រជាធិបតេយ្យកម្មករកាត់ដេរនៅកម្ពុជាយល់ឃើញថា វាមានចំនួនរោងចក្រច្រើនផលិតបានហើយ នៅពុំទាន់បាននាំចេញ ហើយអូសបន្លាយនេះវាអាចធ្វើឱ្យទំហំនៃការព្យួរការងារក៏ដូច ការបិទរោងចក្រអាចកើនឡើងខ្លះបន្ថែមទៀត ។
លោក អាត់ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរនៅកម្ពុជាលើកឡើងថា បើតាមការតាមដានមួយរយៈចាប់ពីថ្ងៃទី១២ សីហា នៅពេលដែលសហភាពអឺរ៉ុបសម្រេចដកផ្នែកខ្លះនៃប្រពន្ធអនុគ្រោះពន្ធលើគ្រប់មុខទំនិញលើកលែងតែគ្រឿងសម្ពាវុធ( EBA) មិនមានអ្វីប្រែប្រួលនោះទេ ។ មានន័យថា ស្ថានភាពនៅជាធម្មតាដដែល គឺខាងអ្នកបញ្ជាទិញមួយចំនួនគាត់បានឱ្យបង្កកទុកឬផលិតទុក រីឯអ្នកមួយចំនួនត្រូវបញ្ជូនផលិតផលចេញទៅតាមទីផ្សារដែលអាចនាំទៅបានដដែល។ លោកលើកឡើងថា« ក្រុមហ៊ុនឬរោងចក្រដែលផលិតបានហើយពុំទាន់បាននាំចេញទៅគឹមានច្រើនជាងក្រុមហ៊ុនដែលបាននាំចេញ។បើផលិតបានហើយមិនអាចនាំចេញទៅបានទេ នេះជាបញ្ហាធំ ធ្វើឱ្យការព្យួរការងារមានការកើនឡើងបន្ថែមហើយការបិទរោងចក្រក៏មានបន្ថែមដែរ»។
ពាក់ព័ន្ធនិងរោងចក្រដាក់ពាក្យព្យួរការងារនៅក្រសួងការងារ និងបណ្តុះបណ្តាលវិជ្ជាជីវៈ គិតមកដល់ត្រឹមថ្ងៃទី២៦ សីហានេះ បើតាមលោក ហេង សួរ បញ្ជាក់ថា«រោងចក្រកំពុងព្យួរសរុបមានចំនួន139 រោងចក្រ ស្មើនឹងកម្មករនិយោជិតសរុបចំនួន 62 576នាក់ ក្នុងនោះស្រី 52 009នាក់»។
យោងតាមសេចក្តីជូនដំណឹងរបស់សមាគមរោងចក្រកាត់ដេរនៅកម្ពុជាហៅកាត់ថា GMAC កាលពីថ្ងៃទី១២ សីហា២០២០កន្លងទៅនេះថា សេចក្តីសម្រេចរបស់សហភាពអឺរ៉ុប ស្តីពីការដកផ្នែកខ្លះនៃប្រពន្ធអនុគ្រោះពន្ធលើគ្រប់មុខទំនិញលើកលែងតែគ្រឿងសម្ពាវុធ EBA សម្រាប់ផលិតផលសម្លៀកបំពាក់ ស្បែកជើង និងផលិតធ្វើដំណើរមួយចំនួនពីប្រទេសកម្ពុជា ចូលជាធរមានចាប់ពីថ្ងៃទី១២ សីហា ២០២០។
សមាគមរោងចក្រកាត់ដេរនៅកម្ពុជា បានរៀបចំ ការណែនាំនេះសម្រាប់អត្ថប្រយោជន៍សមាជិកនិងអ្នកបញ្ជាទិញអន្តរជាតិ ដែលនឹងទទួលរងផលប៉ះពាល់ពីសេចក្តីសម្រេចនេះ។ការណែនាំនេះរៀបចំឡើងដើម្បីផ្តល់ភាពច្បាស់លាស់អំពីខ្សែបន្ទាត់ពន្ធលើផលិតផលដែលបាត់បង់អត្ថប្រយោជន៍EBA និងខ្សែបន្ទាត់ពន្ធលើផលិតផលដែលបន្តទទួលបានអត្ថប្រយោជន៍ពីការមិនយកពន្ធនិងមិនមានកូតាសម្រាប់ការនាំចូលទៅទីផ្សារសហភាពអឺរ៉ុប៕
ចែករំលែកព័តមាននេះ