រាជធានីភ្នំពេញ ៖ បុរសម្នាក់បានចុះពីលើរថយន្តមួយគ្រឿង រួចហៅម៉ូតូកង់៣ជិះទៅជ្រោយចង្វារ ដើម្បីរករថយន្តជិះបន្តដំណើរទៅខេត្តកំពង់ចាមទៀត ស្រាប់តែមិនស្រួលខ្លួន លុះក្រោយមកក៏បានដាច់ខ្យល់បាត់បង់ជីវិតនៅលើម៉ូតូកង់៣ បង្កការភ្ញាក់ផ្អើលតែម្តង។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១និង៤០នាទីរសៀលថ្ងៃទី២៦ ខែ…
រាជធានីភ្នំពេញ ៖ បុរសម្នាក់បានចុះពីលើរថយន្តមួយគ្រឿង រួចហៅម៉ូតូកង់៣ជិះទៅជ្រោយចង្វារ ដើម្បីរករថយន្តជិះបន្តដំណើរទៅខេត្តកំពង់ចាមទៀត ស្រាប់តែមិនស្រួលខ្លួន លុះក្រោយមកក៏បានដាច់ខ្យល់បាត់បង់ជីវិតនៅលើម៉ូតូកង់៣ បង្កការភ្ញាក់ផ្អើលតែម្តង។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១និង៤០នាទីរសៀលថ្ងៃទី២៦ ខែ សីហា ឆ្នាំ ២០២០ នៅចំណុចមុខហាងនំប៉័ងមួយកន្លែង ខាងកើតរង្វង់មូលតាព្រហ្ម ផ្លូវជាតិលេខ៦ ស្ថិតក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
បុរសរងគ្រោះពុំទាន់ស្គាល់អត្តសញ្ញាណនៅឡើយទេ មានអាយុប្រមាណជាង៣០ឆ្នាំ ។
តាមប្រភពព័ត៌មានបានអោយដឹងថា នៅមុនពេលកើតហេតុ គេឃើញបុរសរងគ្រោះម្នាក់ខាងលើនោះបានចុះពីលើរថយន្តតាក់ស៊ីមួយគ្រឿង ទំនងជាមកពីខេត្តតាកែវ បានឈប់នៅច្រមុះជ្រូកស្ទឹងមានជ័យ ហើយបានមកជិះម៉ូតូកង់៣មួយគ្រឿង ក្នុងតម្លៃ២ម៉ឺនរៀល ទៅសង្កាត់ជ្រោយចង្វារ ក្នុងគោលបំណងរករថយន្តតាក់ស៊ីជិះបន្តទៅខេត្តកំពង់ចាម។
តាមប្រភពព័ត៌មានបានឱ្យដឹងបន្តថា នៅពេលធ្វើដំណើរឡើងស្ពានជ្រោយចង្វារបានបន្តិច ស្រាប់តែបុរសរងគ្រោះប្រាប់អ្នករត់ម៉ូតូកង់៣ថា មិនស្រួលខ្លួនណែនទ្រូង ហើយ ត្រូវបានម៉ូតូកង់៣ ជិះទៅដល់កន្លែងកើតហេតុប្រុងឡើងរថយន្ត ស្រាប់តែជនរងគ្រោះដាច់ខ្យល់បាត់បង់ជីវិតតែម្តង ។
ក្រោយពេលកើតហេតុ សពជនរងគ្រោះត្រូវបាននគរបាលបញ្ជូនទៅតម្កល់ទុកនៅឈាបនដ្ឋានវត្តគៀនឃ្លាំងដើម្បីត្រួតពិនិត្យ ហើយរង់ចាំបងប្អូនមកទទួលយកទៅធ្វើបុណ្យតាមប្រពៃណី។
តាមការត្រួតពិនិត្យ នគរបាលបានអោយដឹងថា បុរសរងគ្រោះបានបាត់បង់ជីវិតដោយសារតែគាំងបេះដូង៕ (កែសម្រួលដោយ ៖ ធីតា)
ចែករំលែកព័តមាននេះ