ខេត្តមណ្ឌលគិរី ៖ នៅព្រឹកថ្ងៃទី២៥ ខែសីហា ឆ្នាំ២០២០ ក្រុមការងារអនុវត្តច្បាប់ចល័តនៃមន្ទីរបរិស្ថានខេត្តមណ្ឌលគិរី សហការជាមួយមន្ត្រីរដ្ឋបាលព្រៃឈើ និងកម្លាំងស្នងការដ្ឋាននគរបាលខេត្តមណ្ឌលគិរី បានប្រគល់សត្វទោច១ក្បាលទៅឲ្យឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ…
ខេត្តមណ្ឌលគិរី ៖ នៅព្រឹកថ្ងៃទី២៥ ខែសីហា ឆ្នាំ២០២០ ក្រុមការងារអនុវត្តច្បាប់ចល័តនៃមន្ទីរបរិស្ថានខេត្តមណ្ឌលគិរី សហការជាមួយមន្ត្រីរដ្ឋបាលព្រៃឈើ និងកម្លាំងស្នងការដ្ឋាននគរបាលខេត្តមណ្ឌលគិរី បានប្រគល់សត្វទោច១ក្បាលទៅឲ្យឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដើម្បីបន្តការថែទាំ ជួយសង្គ្រោះ និងស្ដារលទ្ធភាពនីតិសម្បទាឡើងវិញ បន្ទាប់ពីសត្វទោច១ក្បាលនេះពិនិត្យឃើញថា មានសភាពភ័យខ្លាច និងស្ត្រេសកម្រិតស្រាល។
គួររំលឹកថា កាលពីថ្ងៃទី២២ ខែសីហា ឆ្នាំ២០២០ ក្រុមការងារអភិរក្សសត្វព្រៃខាងលើបានទទួលយកសត្វទោច១ក្បាលនេះពីប្រជាពលរដ្ឋរស់នៅភូមិពូតាំង ឃុំសែនមនោរម្យ ស្រុកអូររាំង។ ទន្ទឹមនេះក្រុមការងារក៏បានពន្យល់អំពីលក្ខណៈបច្ចេកទេសច្បាប់ និងការអភិរក្សសត្វព្រៃប្រភេទមានដោយកម្រ មានដោយបង្គួរ និងជិតផុតពូជ ដើម្បីជំរុញឲ្យមានការចូលរួមអភិរក្សនិងការពារសត្វព្រៃនិងជីវៈចម្រុះទាំងអស់គ្នា។
សត្វទោចថ្ពាល់លឿង ជាថនិកសត្វស្ថិតក្នុងក្រុមប្រភេទមានដោយកម្រ មានឈ្មោះជាភាសាអង់គ្លេស Yellow-cheeked Gibbon ត្រូវបានកំណត់ក្នុងឧបសម្ព័ន្ធទី១ នៃអនុសញ្ញា CITES ហើយក៏ត្រូវ បានចាត់ចូលក្នុងបញ្ជី ក្រហម នៃអង្គការសហភាពអន្តរជាតិ អភិរក្សធនធានធម្មជាតិ (IUCN) ព្រោះពួកវាជាពពួកសត្វកំពុងរងគ្រោះថ្នាក់ ហើយក៏កំពុងប្រឈមនឹងការលួចប្រមាញ់របស់មនុស្ស និងការបាត់បង់ទីជម្រក។ ហេតុនេះ សូមរួមគ្នាថែរក្សា និងការពារសម្បត្តិធម្មជាតិ ព្រមទាំងសត្វព្រៃឲ្យបានឋិតឋេរគង់វង្ស និងយូរអង្វែង៕ (កែសម្រួលដោយ ៖ ធីតា)
ចែករំលែកព័តមាននេះ