រាជធានីភ្នំពេញ ៖ កសិដ្ឋានចិញ្ចឹមសត្វ និងបង្កាត់ពូជដំណាំបន្លែនានា កំពុងត្រូវប៉ាន់នាពេលបច្ចុប្បន្ននេះ ជាពិសេសក្នុងយុគ្គសម័យ ។ យ៉ាងណាមិញ ងាកមកមើលការចិញ្ចឹមកន្ធាយ តាមបែបធម្មជាតិវិញម្តង…
រាជធានីភ្នំពេញ ៖ កសិដ្ឋានចិញ្ចឹមសត្វ និងបង្កាត់ពូជដំណាំបន្លែនានា កំពុងត្រូវប៉ាន់នាពេលបច្ចុប្បន្ននេះ ជាពិសេសក្នុងយុគ្គសម័យ ។
យ៉ាងណាមិញ ងាកមកមើលការចិញ្ចឹមកន្ធាយ តាមបែបធម្មជាតិវិញម្តង ពិតជាមិនងាយស្រួលនោះទេ ប្រសិនបើរើសយកពេលវេលា ទីតាំង ចំណី និងរយៈពេលមិនគ្រប់ខែយកមកចិញ្ចឹមឲ្យបានត្រឹមត្រូវនោះ ។ តាមរយៈបទពិសោធន៍ខ្លះៗ របស់ម្ចាស់កសិដ្ឋានកន្ធាយភ្នំរាប បានចែករំលែកបទពិសោធន៍របស់លោកថា កន្ធាយទាល់តែមានអាយុចាប់ពី ២ខែឡើងទៅ ទើបអាចងាយស្រួលចិញ្ចឹម អ៊ីចឹងពេលញាស់ហើយ ក្នុងរយៈពេលនេះត្រូវនៅក្នុងកសិដ្ឋានមិនអាចទាន់លក់បានទេ ។
លោក កែវ ផានិត បានរៀបរាប់ថា «ពីមុនខ្ញុំខ្វះបទពិសោធន៍ក្នុងការចិញ្ចឹមកន្ធាយ យកអាកូនតូចៗ មានអាយុ២អាទិត្យមកចិញ្ចឹមមានអីដាក់អស់ៗ ។ ដល់ពេលឥឡូវ ខ្ញុំបានធ្វើទាំងការចិញ្ចឹម និងការបង្កាត់ពូជ ។ ដូចនេះ ខ្ញុំរើសតែកូនកន្ធាយអាយុ២ខែជាងមកចែកជាកូនពូជដល់បងប្អូន ងាយស្រួលយកទៅចិញ្ចឹមព្រោះ ចេះស៊ីចំណីហើយ ។ រីឯចំណី យើងប្រើសាច់ត្រីតូចៗហាន់វាឱ្យតូចៗ និងមួយវិញទៀត យើងអាចចិញ្ចឹមកូនត្រីតូចៗក្នុងស្រះនឹងផងដែរ ដែលវាអាចចាប់ស៊ីខ្លួនវាបាន ដូចជា ត្រីក្រឹម ឬកូនកំពឹសជាដើម បូករួមជាមួយបន្លែមួយចំនួនដែលវាអាចស៊ីបានដូច ត្រកួន និងកញ្ជែត ជាដើម ប៉ុន្តែយើងក៏ប្រើប្រាស់ចំណីគ្រាប់ៗ ដូចចំណីត្រីផងដែរ» ។
លោកបានបន្តថា កាលពីដើមលោកចិញ្ចឹក្នុងស្រះ ប៉ុន្តែពិបាកក្នុងការប្រមូលផល ដូចនេះលោកបានធ្វើស្រះប៊េតុង (ស៊ីម៉ង់)។ លោកបានបន្តថា កាលពីក្នុងឆ្នាំ ២០១៩ ដែលលោកទើបតែចាប់ផ្តើមសកិដ្ឋានថ្មីៗ លោកនៅមិនទាន់យល់ដឹងឱ្យស៊ីជំរៅនោះទេ ទើបធ្វើឱ្យលោក មានបញ្ហាខ្លះៗផងដែរ។ លោកបន្តចែករំលែងទៀតថា «ដំបូងឡើយ ខ្ញុំមិនទាន់យល់ច្បាស់ដូចនេះកូនកន្ធាយរបស់ខ្ញុំជាង ១០០ក្បាលត្រូវបានងាប់ ដោយការជ្រើសរើសពេលវេលាមិនសាកសម គឺខ្ញុំបានចាប់ផ្តើមក្នុងរដូវភ្លៀង កូនកន្ធាយខ្លាចភ្លៀង (ពីព្រោះវាជាភ្លៀងអាស៊ីត)។ មានគេប្រាប់ខ្ញុំដែរ ថាគេចាប់ផ្តើមចិញ្ចឹមពីខែកុម្ភៈទៅដល់ខែឧសភា តែខ្ញុំចង់ប្រញាប់បើកឱ្យហើយ ទើបវាទៅជាបែបនេះ។
ចឹងភ្លាមៗ ខ្ញុំចាប់ផ្តើមស្រាវជ្រាវនឹងរៀន និងបានបង់ប្រាក់ខ្លះៗ ដើម្បីឱ្យអ្នកជំនាញដែល ខ្ញុំបានទិញកន្ធាយគាត់ (មកពីប្រទេសវៀតណាម) មកបង្រៀនយើង ហើយនឹងរៀនពី youtube ផងដែរ»។ ក្នុងឆ្នាំ២០១៨ រយៈពេលមួយឆ្នាំពេញ លោកបានសិក្សា ពីសត្វកន្ធាយនេះ ទើបលោកសម្រេចចិត្តធ្វើអាជីវកម្មចិញ្ចឹមសត្វនេះ ក្នុងឆ្នាំ ២០១៩ ។
ម្ចាស់កសិដ្ឋានកន្ធាយ ដែលមានវ័យ៣៨ឆ្នាំរូបនេះ បានបន្តថា«ខ្ញុំបានសិក្សារៀនពីវា ហើយពេលនោះដែរ ខ្ញុំក៏បានចិញ្ចឹមសត្វនេះជាលក្ខណៈគ្រួសារចិញ្ចឹមលេងៗ ។ បន្ទាប់មកខ្ញុំបានសម្រេចចិត្តចាប់ផ្តើមចិញ្ចឹម ដើម្បីជាអាជីវកម្ម ដោយខ្ញុំបានប្រើទុន ជិត ១០០០ ដុល្លារក្នុងរៀបចំកន្លែង និងជាង ៥០០ ដុល្លារអាមេរិកទៀតជាទុន ដើម្បីទិញកូនកន្ធាយ យកមកចិញ្ចឹម ដោយក្នុងតំលៃ កន្ធាយ ១ក្បាល ៤០០០រៀល ស្មើរ១ដុល្លារ ដូចនេះខ្ញុំទិញ ៥០០ក្បាល។ កន្ធាយខ្ញុំទិញ ពូជពីប្រទេសវៀតណាម ដោយសារពូជមកពីប្រទេសថៃវាថ្លៃ»។
លោកបន្តថាបច្ចុប្បន្ន ក្នុងមួយខែអាចរកប្រាក់ចំណូលបាន ៨លានរៀលផងដែរ ដោយក្នុងកសិដ្ឋានរបស់លោក បង្កាត់ពូជកន្ធាយ ដើម្បីយកកូនលក់ និងកន្ធាយធំៗ សម្រាប់បរិភោគ ហើយលោកថា ប្រជាជនខ្លះ បើទិញអាធំគាត់យកទៅបរិភោគ ហើយប្រជាជនភាគច្រើនដែលមកទិញ គឺទិញកូន ដើម្បីយកទៅចិញ្ចឹមនិងលក់បន្ត។ សម្រាប់ការលក់យកសាច់ ភាគច្រើនលោកលក់ទៅឱ្យភោជីយដ្ឋាន។ លោកថាបន្ទាប់ពីអ្នកភូមិទិញកូនយកទៅចិញ្ចឹម លោកតែងតែណែនាំ និងប្រាប់ពីបច្ចេកទេសចិញ្ចឹមផងដែរ។ កន្ធាយតូចលោកលក់ជាក្បាល ដោយក្នុងតំលៃ១ក្បាល ៨០០០រៀល និងអ្នកមកទិញយកទៅចិញ្ចឹមម្តងៗ ម្នាក់ទិញ ៥០ ក្បាលឡើងទៅ។
រីឯកន្ធាយធំលោកលក់ ក្នុងតំលៃរាយ និងដុំ ដោយឡែកក្នុងការលក់រាយ អាស្រ័យទៅលើទំងន់១ក្បាល ៤ម៉ឺន ៥ម៉ឺន និង៦ម៉ឺនរៀល នេះសម្រាប់អ្នកគាត់ទិញយកទៅបរិភោគជាគ្រួសារ ប៉ុន្តែសម្រាប់ហ៊ាង លោកលក់ជាគីឡូក្រាមវិញ ព្រោះគាត់យកជាប្រចាំ ដូចនេះលោកលក់ ១គីឡូ ១៣ ដុល្លារអាមេរិក។ លោកបន្ថែមថា «ទើបតែក្នុងឆ្នាំ ២០២០នេះទេ ដែលលោកមានអ្នកស្គាល់ច្រើន ក៏ព្រោះលោកបង្កើតផេក ក្នុងការលក់ ការលក់របស់លោកមានសភាពធម្មតា ដោយការកម្ម៉ង់ទិញពីហ៊ាងនៅតែបន្ត គ្រាន់តែក្នុងសប្តាហ៍មុន មិនសូវមានអ្នកចូលក្នុងហ៊ាង ព្រោះគេដើរកំសាន្តអស់»។
សូមជំរាបផងដែរថា បច្ចុប្បន្នកសិដ្ឋានមាន ទីតាំងនៅភូមិកន្លែងគល់ សង្កាត់ពន្សាំង ខណ្ឌព្រែកភ្នៅ រាជធានីភ្នំពេញ។ លោកមាន អាងដែលធ្វើពីស៊ីម៉ង់ ចំនួន ២ និងកន្លែងញាស់និងដាក់កូនតូចៗរបស់សត្វកន្ធាយ ដោយប្រើប្រាស់ដី កន្លះហិតា ៕
ចែករំលែកព័តមាននេះ