រាជធានីភ្នំពេញ៖ មន្ត្រីជំនាញ បានអះអាងថា គ្រាន់តែប្រឡាយបឹងត្របែកមួយ គឺមានសំរាមដែលត្រូវកាយ និងកើបយកទៅចាក់ចោលនៅទីលានចាក់សំរាមមិនតិចជាង១០០ឡាននោះទេ ដែលមានទម្ងន់ប្រមាណ៤០០តោន ដែលត្រូវបានកាយ និងកើបយកទៅចាក់ចោលជារៀងរាល់៣ខែម្តង ទោះជាអាជ្ញាធរមានការអប់រំណែនាំយ៉ាងណាក៏ដោយ ក៏នៅតែមានប្រជាពលរដ្ឋមួយចំនួនបោះសំរាមចូលក្នុងប្រឡាយ និងមួយផ្នែកសំរាមបានហូរតាមទឹកភ្លៀងចូលក្នុងប្រឡាយក៏ដោយសារការមិនទុកដាក់សំរាមអោយបានត្រឹមត្រូវផងដែរ ។
លោក ដួង ចាន់សារ៉ាត់ ប្រធានអង្គភាពលូទឹក និងបូមទឹក នៃមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យកោះសន្តិភាពដឹងនៅថ្ងៃទី២៦ ខែសីហា ឆ្នាំ២០២០នេះថា អង្គភាពលូទឹក និងបូមទឹក មន្ទីរសាធារណការនិងដឹកជញ្ជូនរាជធានីភ្នំពេញ បានប្រើប្រាស់គ្រឿងចក្រកាយ និងកើបដឹកសំរាមជាច្រើនចេញពីប្រឡាយបឹងត្របែក ដើម្បីបើកមុខទឹកឱ្យហូរបានលឿនចុះទៅស្ថានីយងាយស្រួលក្នុងការបូមទឹកចេញរំដោះការលិចលង់ដោយជំនន់ទឹកភ្លៀង។
លោកបន្តថា ក្រោមការណែនាំដោយយកចិត្តទុកដាក់ពីលោក ឃួង ស្រេង អភិបាលរាជធានីភ្នំពេញ មន្ទីរសាធារណការ បានយកចិត្តទុកដាក់ក្នុងការស្តារ និងកាយ កើបសំរាមពីប្រឡាយចំនួន៣ គឺប្រឡាយបឹងត្របែក ប្រឡាយបឹងសាឡាង និងប្រឡាយបឹងទំពុនជាប្រចាំ ដែលប្រឡាយនេះ ពិតជាមានសារៈសំខាន់ក្នុងការរំដោះជំនន់ទឹកភ្លៀងចេញទៅក្រៅក្រុង ប៉ុន្តែត្រូវបានប្រជាពលរដ្ឋ មើលមិនឃើញពីសារៈសំខាន់ និងបែរជាយកសំរាមទៅបោះចូលក្នុងប្រឡាយនោះទៅវិញ ។
លោក ដួង ចាន់សារ៉ាត់ បានអោយដឹងទៀតថា សម្រាប់ខែប្រាំងមិនសូវសំបូរសំរាមទេ ប៉ុន្តែនៅខែវស្សាដែលមានភ្លៀងធ្លាក់ជាបន្តបន្ទាប់ ធ្វើឱ្យសំរាមហូរមកកាន់តែច្រើនបណ្ដាលឱ្យសំរាមកកស្ទះនៅក្នុងប្រឡាយតែម្តង ។
លោកបន្តថា តាមគម្រោងរបស់រដ្ឋបាលរាជធានីភ្នំពេញក្នុងរយៈពេល៣ខែធ្វើការកាយស្ដារ និងកើបសំរាមដឹកចេញម្ដង តែបើសំរាមច្រើនហើយកកស្ទះខ្លាំងយើងអាចធ្វើការកាយកើបដឹកចេញជាក់ស្ដែង មិនបាច់ចាំដល់ខែ ឬថ្ងៃឈប់សម្រាកនោះទេ ដើម្បីធ្វើយ៉ាងណាសម្រួលអោយប្រពន្ធ័ទឹកហូរបានលឿន ។
ចំណែកលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញធ្លាប់មានប្រសាសន៍អោយដឹងថា ប្រឡាយបឹងត្របែក ពិសេសនៅក្រោយស្ថានីយបឹងត្របែកត្រូវបងប្អូនប្រជាពលរដ្ឋយកសំរាមទៅបោះចោលរហូតមើលមិនឃើញទឹកក្នុងប្រឡាយ ទៅហើយ ។ ដោយមើលឃើញពីបញ្ហាប្រឈមនេះ មន្ទីរសាធារណការ និងដឹកជញ្ជូនរាជធានីភ្នំពេញ ក្រោមការណែនាំពីលោក ឃួង ស្រេង អភិបាលរាជធានីភ្នំពេញ បានឱ្យមន្ត្រីជំនាញដាក់គ្រឿងចក្រចុះកាយភ្លាមៗតែម្តង ដើម្បីធ្វើយ៉ាងណាអាចបូមទឹករំដោះបាន និងបញ្ជៀសការលិចលង់ជូនប្រជាពលរដ្ឋ ៕ (កែសម្រួលដោយ ៖ ធីតា)
ចែករំលែកព័តមាននេះ