រាជធានីភ្នំពេញ ៖ នាព្រឹកថ្ងៃទី២៥ ខែសីហា ឆ្នាំ២០២០ សវនាការបានបញ្ចប់ បន្ទាប់ពី ការសាកសួរដេញដោលអស់រយៈពេលច្រើនម៉ោងលើជនជាប់ចោទក្នុងសំណុំរឿង«រំលោភលើទំនុកចិត្តពិសេសដោយអភិបាល» តាមមាត្រា៣៩៣នៃក្រមព្រហ្មទណ្ឌ ប្រព្រឹត្តកាលពីឆ្នាំ២០១៣ ដល់ឆ្នាំ២០១៩ ដែលមានទំហំទឹកប្រាក់បាត់បង់ប្រមាណ៥៩.៧៣៦ដុល្លារអាមេរិក ។ ប៉ុន្តែបន្ទាប់ពីបញ្ចប់សវនាការ ចៅក្រមជំនុំជម្រះបានលើក
ពេលប្រកាសសាលក្រមពីជោគវាសនាជនជាប់ចោទដែលជាអតីតអគ្គលេខាធិការរងសហព័ន្ធកីឡាបាល់ទាត់ទៅថ្ងៃទី១ ខែកញ្ញា ឆ្នាំ២០២០។
សូមរំឭកថា លោក រស់ ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី៩ខែឧសភា ឆ្នាំ២០២០ បានសម្រេចចេញដីកាឃុំខ្លួនអតីតអគ្គលេខាធិការរងសហព័ន្ធកីឡាបាល់ទាត់កម្ពុជា លោក ម៉ៃ តុលា ដាក់ពន្ធនាគារជាបណ្តោះអាសន្នពីបទ«រំលោភលើទំនុកចិត្តពិសេសដោយអភិបាល» យោងតាមមាត្រា៣៩៣នៃក្រមព្រហ្មទណ្ឌ ។ លោក ម៉ៃ តុលា ដែលជាជនត្រូវចោទ បច្ចុប្បន្នមានអាយុ៤៨ឆ្នាំ និងមានទីលំនៅក្នុងរាជធានីភ្នំពេញ ។
សូមបញ្ជាក់ថា នារសៀលថ្ងៃទី៨ ខែឧសភា ឆ្នាំ២០២០ អង្គភាពប្រឆាំងអំពើពុករលួយបានចាត់បញ្ជូនលោក ម៉ៃ តុលា ទៅសាលាដំបូងរាជធានីភ្នំពេញ ដែលពាក់ព័ន្ធនឹងសំណុំរឿងពុករលួយ ។ សំណុំរឿងនោះស្ថិតនៅដៃលោក ប្លង់ សុផល ព្រះរាជអាជ្ញាអមសាលាដំបូងរាជធានីភ្នំពេញធ្វើការស៊ើបសួរ ។ ក្រោយពីស៊ើបសួរអស់រយៈពេលជាច្រើនម៉ោង តំណាងអយ្យការបានសម្រេចធ្វើការចោទប្រកាន់ជនសង្ស័យជាផ្លូវការ ក្រោមបទ«រំលោភលើទំនុកចិត្តពិសេសដោយអភិបាល» បន្ទាប់មកសំណុំរឿងនេះត្រូវបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
ប៉ុន្តែ ដោយសារល្ងាចហើយ និងផុតម៉ោងរដ្ឋបាល ទើបជនសង្ស័យត្រូវបានផ្ញើទៅអង្គ ភាពប្រឆាំងអំពើពុករលួយវិញ និងតម្រូវឲ្យព្រឹកថ្ងៃទី៩ ខែឧសភា នាំទៅសាកសួរម្តង ទៀត រហូតដល់វេលាថ្ងៃត្រង់ ចៅក្រមស៊ើបសួរបានសម្រេចចេញដីកាឲ្យឃុំខ្លួន ។
លោក ម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជា បានត្រូវកងរាជអាវុធ ហត្ថលើផ្ទៃប្រទេសចាប់ឃាត់ខ្លួនកាលពីថ្ងៃទី៧ ខែឧសភា ឆ្នាំ២០២០ និងបានបំពេញ បែបបទបញ្ជូនទៅអង្គភាពប្រឆាំងអំពើពុករលួយដើម្បីបន្តនីតិវិធី ។
យោងតាមសេចក្តីប្រកាសព័ត៌មានរបស់សហព័ន្ធកីឡាបាល់ទាត់កម្ពុជា កាលពីថ្ងៃទី៦ ខែឧសភា ឆ្នាំ២០២០ បានបញ្ជាក់ថា អតីតនិងមន្ត្រីសហព័ន្ធកីឡាបាល់ទាត់កម្ពុជាមួយចំនួនដែលបានប្រព្រឹត្តកំហុសខុសឆ្គងធ្ងន់ធ្ងរ ផ្ទុយនឹងក្រមសីលធម៌ចំនួន៤នាក់ដែលមាន លោក ម៉ៃ តុលា លោក ទុយវិច្ឆិកា លោក ឆាំង ពិសិដ្ឋ និងលោក គល់ សុភារម្យ ត្រូវបានសហព័ន្ធកីឡាបាល់ទាត់កម្ពុជាព្យួរគ្រប់សកម្មភាពកីឡាបាល់ទាត់អស់មួយជីវិត ។
ដោយឡែក លោក ម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ត្រូវបានបញ្ជូនសំណុំរឿងពាក់ព័ន្ធនឹងបទប្រព្រឹត្តអំពើពុករលួយទៅតុលាការ ដើម្បីចាត់វិធានការតាមផ្លូវច្បាប់ជាធរមានរបស់ព្រះរាជាណាចក្រកម្ពុជា ។
ទាក់ទងនឹងករណីខាងលើនេះ លោក កែវសារ៉េត អគ្គលេខាធិការសហព័ន្ធកីឡាបាល់ ទាត់កម្ពុជា(FFC)បានថ្លែងថា អំឡុងការសហការរវាងមន្ត្រីសហព័ន្ធ និងក្រុមហ៊ុនស្រាបៀរថៃហ្គ័ររៀបចំការប្រកួតរបស់ Tiger Street football តាំងពីឆ្នាំ២០១៣មកដល់ឆ្នាំ២០១៩ បានរកឃើញថា មន្ត្រីសហព័ន្ធទាំង៤រូបខាងលើនេះ មានការកិបកេងប្រាក់ប្រមាណជាង៣០% ដោយគ្មានមូលហេតុ និងមិនបានចូលមកសហព័ន្ធសោះ ។ ក្រោយពីការបង្កើតគណៈកម្មការវិន័យសហព័ន្ធបានរកឃើញបន្ថែមទៀតថា ត្រឹមអំឡុងឆ្នាំ២០១៥ ដល់ឆ្នាំ២០១៩ មានការកិបកេងប្រាក់ចំនួន៥៩.៧៣៦ដុល្លារដុល្លារអាមេរិកឯណោះ ។
ដោយសារអំពើនេះហើយ ទើបបានជាសហព័ន្ធកីឡាបាល់ទាត់កម្ពុជាបើកការប្រជុំជាច្រើនលើក រហូតឈានដល់ការដាក់វិន័យ និងព្យួរសកម្មភាពបាល់ទាត់របស់ពួកគេទាំង៤នាក់ រហូតមួយជីវិតតែម្ដង ដែលសាមីខ្លួនទាំង៤រូបក៏បានសារភាពចំពោះទោសកំហុសនោះដែរ ៕
ចែករំលែកព័តមាននេះ