ចាម៉ៃកា ៖ ម្ចាស់កំណត់ត្រារត់លឿនបំផុតពិភពលោក និងជាម្ចាស់មេដាយមាសអូឡាំពិក ៨សម័យកាល Usain Bolt បានធ្វើតេស្តវិជ្ជមានកូវីដ១៩ ហើយបច្ចុប្បន្នកំពុងដាក់ខ្លួនឯងនៅដាច់ដោយឡែកពីគេក្នុងផ្ទះនៅឯប្រទេសចាម៉ៃកា បន្ទាប់ពីបានប្រារព្ធពិធីខួបកំណើតគម្រប់ ៣៤ឆ្នាំរបស់ខ្លួនកាលពីពេលកន្លងទៅ។
ក្រសួងសុខាភិបាលចាម៉ៃកា បានបញ្ជាក់កាលល្ងាចថ្ងៃច័ន្ទថា Usain Bolt ដែលកាន់កំណត់ត្រាពិភពលោករត់ចម្ងាយ ១០០ម៉ែត្រនិង ២០០ម៉ែត្របានធ្វើតេស្តវិជ្ជមាន បន្ទាប់ពីលោកបានបង្ហោះវីដេអូនៅលើបណ្តាញសង្គមនៅពេលថ្ងៃត្រង់ថា លោកត្រូវបានគេធ្វើតេស្ត៍ ហើយកំពុងរង់ចាំលទ្ធផល។
កំពូលស្តេចរត់ប្រណាំងរូបនេះ បាននិយាយនៅក្នុងសារលើបណ្តាញសង្គមរបស់ខ្លួនថា «ដើម្បីឱ្យមានសុវត្ថិភាព ខ្ញុំបានដាក់ខ្លួនខ្ញុំនៅដោយឡែកពីគេ ដោយធ្វើវាឱ្យងាយស្រួលបំផុត»។
Bolt ក៏បាននិយាយថា គេបានធ្វើតេស្តនៅថ្ងៃសៅរ៍ ពោលគឺមួយថ្ងៃបន្ទាប់ពីប្រារព្ធពិធីខួបកំណើតរបស់ខ្លួននៅឯពិធីជប់លៀងមួយ ដែលមានការចូលរួមពីមិត្តភក្តិមួយចំនួនផងដែរ៕ (ដកស្រង់ចេញពី Aljazeera)
ចែករំលែកព័តមាននេះ