ខេត្តស្វាយរៀង ៖ នរណានឹកស្មានដល់ថា វិបត្តិជំងឺកូវីដ ១៩ កំពុងតែធ្វើឲ្យវិស័យសំខាន់ៗលើពិភពលោករង្គោះរង្គើ រួមទាំងកម្ពុជាផងក៏មិនអាចគេចផុតពីការប៉ះពាល់ធ្ងន់ធ្ងរលើវិស័យទេសចរណ៍ អាកាសចរណ៍ សណ្ឋាគារ និងវិស័យសំណង់នោះ បែរជាវិបត្តិជំងឺឆ្លងមួយនេះផ្តល់ឱកាសដល់វិស័យកសិកម្មនៅកម្ពុជា ។
ជាក់ស្តែងក្នុងអំឡុងវិបត្តិកូវីដ១៩ នេះកូនង្កែបមានទីផ្សារខ្ពស់ភ្ញាស់មិនទាន់អ្នកទិញយកទៅចិញ្ចឹម ។ ប្រាកដណាស់ បទពិសោធន៍តែងតែធ្វើឱ្យមនុស្សម្នាក់មានភាពរីកចំរើន និងអភិវឌ្ឍអ្វីមួយឱ្យបានល្អប្រសើជាងមុន ។
តួយ៉ាងការបើកកសិដ្ឋាន ឬការប្រកបអាជីពជាកសិករជាលើកដំបូងរបស់យើងម្នាក់ៗ សុទ្ធតែមានឧបសគ្គក៏ដូចជា ការបរាជ័យផងដែរ ។ ប៉ុន្តែអ្វីដែលធ្វើឱ្យប្រជាកសិករទទួលបានភាពជោគជ័យក្នុងអាជីពមួយនេះ គឺការតាំងចិត្តនិងមិនរាថយក្នុងការបន្តធ្វើវា បើទោះបីបរាជ័យម្តងហើយក៏ដោយ ។
លោក សុខ សាវន មានទីលំនៅ ក្នុងភូមិប្រសូត្រ ឃុំប្រសូត្រ ស្រុកស្វាយទាប ខេត្តស្វាយរៀង កំពុងមមាញឹកក្នុងការភ្ញាស់ និងលក់កូនកង្កែប ហើយពេលខ្លះភ្ញាស់មិនទាន់អ្នកមកទិញនោះទេ ។
ក្នុងវ័យ ៧៦ឆ្នាំ លោក សុខ សាវន បានប្រាប់សារព័ត៌មានកោះសន្តិភាព នៅថ្ងៃទី ២៥ ខែ សីហា នេះថា «បច្ចុប្បន្ន ខ្ញុំភ្ញាស់កូនកង្កែបមិនទាន់អ្នកទិញទេ ហើយទើបតែមួយរយៈកូវីដ១៩នេះ ខ្ញុំលក់បានច្រើនជាពេលណាទាំងអស់។ នេះប្រហែលជាប្រទេសវៀតណាមគេបិទព្រំដែន ដូចនេះគេចេញចូលមិនបាន អ៊ីចឹងប្រជាជនក្នុងស្រុកទិញរបស់ក្នុងស្រុកយើង។
ចំពោះប្រាក់ចំណូល ក្នុង១វគ្គៗ អាចរកចំណូលបាន ៨លានរៀល»។ កូនកង្កែបដែលលោកលក់ គឺមានអាយុចាប់ពី ១ខែកន្លះឡើងទៅ ទើបអាចលក់បាន ហើយកូនកង្កែបមួយក្បាលលោកលក់ក្នុងតំលៃ ៥០០រៀល ឡើងទៅ។ ចំពោះការចិញ្ចឹមដើម្បីលក់វិញ គេអាចចិញ្ចឹមក្នុងរយៈពេល៣ខែអាចលក់បានហើយ។ មួយវិញទៀតបើលក់យកសាច់ អាចចាប់ពី ១ម៉ឺនរៀលក្នុង ១គីឡូ គ្រាមឡើងទៅ។
លោកបន្តថាកង្កែបរបស់លោក បានទិញពូជ ពីប្រទេសវៀតណាម និងប្រទេសថៃ ប៉ុន្តែលោកថា កង្កែបមកពីប្រទេសថៃ ធំយឺតជា កង្កែបមកពីប្រទេសវៀតណាម ។ ចំពោះចំណីសត្វកង្កែប លោកបានទិញពីក្រុមហ៊ុន ដោយក្នុងមួយការ៉ុង ប្រមាណ ៥០ គីឡូរក្រាម ក្នុងតំលៃ ១១ម៉ឺនរៀល។
លោក សុខ សាវន បានបន្តថាក្នុងការចាប់ផ្តើមដំបូងក្នុងឆ្នាំ ២០១៩ លោកមានត្រឹមតែ ៤ទៅ៥ទ្រុងនោះទេ ដោយឡែកនាពេលបច្ចុប្បន្ន លោកមានជាង ២០ទ្រុង ក្នុងការបង្កាត់និងភ្ញាស់កូនកង្កែប ដែលក្នុងនោះលោកបានភ្ញាស់កូនកង្កែប ជាង១០ម៉ឺនក្បាលហើយ ប៉ុន្តែលោកក៏បានលក់ទៅវិញបានជាង ៧ទៅ៨ម៉ឺនក្បាលផងដែរ ។
ថ្មីៗនេះលោកលក់ក៏បានជាង ១ម៉ឺនកូន និងខាងមន្ត្រីកសិកម្មក៏បានទិញពីលោក ១ម៉ឺនក្បាលផងដែរ។ លោកបន្តថា «សត្វកង្កែបស្រួលចិញ្ចឹមជាងសត្វត្រី ហើយពីមុនខ្ញុំចិញ្ចឹមទាំងត្រីនិងកង្កែប ប៉ុន្តែបច្ចុប្បន្នខ្ញុំផ្តោតសំខាន់តែលើការបង្កាត់ និងភ្ញាស់កូនកង្កែប ហើយខ្ញុំក៏មានកម្មករ ៤ទៅ៥នាក់សម្រាប់ជួយផងដែរ»។
មុនទទួលបានភាពជោគជ័យ លោក សុខ សាវន បានជួបនូវភាពបរាជ័យម្តងរួចមកហើយ ដោយការសាកល្បងចិញ្ចឹមសត្វកង្កែប ដើម្បីយកសាច់ ប៉ុន្តែត្រូវបានងាប់អស់ រាប់ពាន់ក្បាល ដោយពេលនោះលោកមិនទាន់មានបទពិសោធន៍ក្នុងការចិញ្ចឹម។ លោកថា លោកមើលតែក្នុង youtube ហើយក៏ចាប់ផ្តើមចិញ្ចឹម ប៉ុន្តែការអនុវត្តមិនមែនបែបនោះទេ។ លោកបានបន្តថា «កង្កែបរបស់ខ្ញុំងាប់រាប់ពាន់ក្បាលដោយសារ ខ្វះចំណី និងមិនឧស្សាហ៍ប្តូរទឹកជាដើម ដូចនេះបន្ទាប់ពីមានបទពិសោធន៍នេះហើយ ខ្ញុំរៀនជាក់ស្តែងពីអ្នកមុនៗ ហើយនឹងរៀនបន្ថែមទៀតពី youtube។ បន្ទាប់ពីការចេះចិញ្ចឹមមក ខ្ញុំក៏បានអភិវឌ្ឍខ្លួន ដើម្បីឱ្យចេះ បង្កាត់ និងភ្ញាស់កូនបង្កែបតែម្តង»។
ដោយឃើញថា វាមានតម្រូវការទីផ្សាច្រើន លោកពូ កំពុងរៀបចំពង្រីកអាជីវកម្មនេះជាបណ្តើរៗផងដែរ។ ថ្មីៗនេះលោករដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ក៏បានលើកទឹកចិត្ត និងគាំទ្រចំពោះគម្រោងពង្រីកផលិតកម្មភ្ញាស់កូនកង្កែប ព្រោះវានឹងជួយផ្គត់ផ្គង់កូនកង្កែបឲ្យបានគ្រប់គ្រប់ មានតម្លៃសមរម្យសម្រាប់អ្នកចង់ចិញ្ចឹមក្នុង និងក្រៅតំបន់នេះ និងសុំជួយចែករំលែកបទពិសោធន៍ល្អៗ ដល់កសិករដែលមកទិញកូន យកទៅចិញ្ចឹមផងដែរ ដើម្បីរួមគ្នាផលិតកង្កែបសាច់ឲ្យបានគ្រប់គ្រាន់តាមសេចក្តីត្រូវការទីផ្សារ៕
ចែករំលែកព័តមាននេះ