ប្រទេសឥណ្ឌា ៖ ក្នុងសេចក្ដីប្រកាសមួយកងកម្លាំងឆ្លើយតបចំពោះគ្រោះមហន្តរាយឥណ្ឌាគូសបញ្ជាក់ថា មនុស្សយ៉ាងតិច៣០នាក់អាចនៅជាប់ក្រោមគំនរបាក់បែក ដោយសារការបាក់អគារកម្ពស់៥ជាន់មួយ កាលពីថ្ងៃទី២៤សីហា ក្នុងទីក្រុងម៉ាហាដភាគខាងលិចឥណ្ឌា។
ក្រុមអ្នកជួយសង្គ្រោះត្រូវបានបញ្ជូនទៅកាន់កន្លែងរងគ្រោះ។ មនុស្សជាង៦០នាក់ដែលរងរបួសត្រូវបានជួយសង្គ្រោះ ហើយបញ្ជូនទៅមន្ទីរពេទ្យ។ មនុស្សម្នាក់បានបាត់បង់ជីវិត ហើយមនុស្សយ៉ាងតិច៣០នាក់អាចជាប់ក្នុងគំនរបាក់បែក។ អគារនោះរួមមានផ្ទះ៤៧ល្វែង។ ការបាក់អគារនេះអាចបណ្ដាលមកពីភ្លៀងធ្លាក់ខ្លាំងដែលនាំឲ្យគ្រឺះរបស់វារងការប៉ះពាល់។
ទោះបីយ៉ាងណាមូលហេតុពិតប្រាកដនៃការបាក់អគារនេះ នៅមិនទាន់អាចកំណត់បាននៅឡើយ។ ការបាក់អគារតែងកើតមានញឹកញាប់នៅឥណ្ឌាក្នុងរដូវភ្លៀង។ ភ្លៀងធ្លាក់ខ្លាំងបំផ្លាញគ្រឹះអគារ។
ភ្លៀងមានតួនាទីសំខាន់សម្រាប់កសិកម្មនៅអាស៊ីខាងត្បូង តែវាក៏បណ្ដាលឲ្យមនុស្សបាត់បង់ជីវិតមនុស្សច្រើន ព្រមទាំងបណ្ដាលឲ្យមានគ្រោះមហន្តរាយធ្ងន់ធ្ងរនានា ពិសេសដោយសារទឹកជំនន់ ការបាក់ដី និងបាក់អគារនានា។ ក្នុងឆ្នាំ២០២០នេះភ្លៀងធ្លាក់ខ្លាំង បណ្ដាលឲ្យមនុស្សបាត់បង់ជីវិត ប្រមាណជា១.២០០នាក់រួចហើយនៅតំបន់នោះ ក្នុងនោះជាង៨០០នាក់នៅឥណ្ឌាតែមួយគត់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ