រាជធានីភ្នំពេញ ៖ ក្រសួងសាធារណការ និងដឹកជញ្ចូនបានចេញសេចក្ដីណែនាំស្ដីពីការបិទស្លាកសញ្ញាចាំងពន្លឺលើយានជំនិះធុនធ្ងន់ (១) រថយន្តដឹកទំនិញធុនធ្ងន់ (២)យានយន្តុបករណ៍ (៣)រ៉ឺម៉ក និង(៤)សឺមីរ៉ឺម៉ក ដែលមានទម្ងន់សរុបអតិបរមាលើសពី…
រាជធានីភ្នំពេញ ៖ ក្រសួងសាធារណការ និងដឹកជញ្ចូនបានចេញសេចក្ដីណែនាំស្ដីពីការបិទស្លាកសញ្ញាចាំងពន្លឺលើយានជំនិះធុនធ្ងន់ (១) រថយន្តដឹកទំនិញធុនធ្ងន់ (២)យានយន្តុបករណ៍ (៣)រ៉ឺម៉ក និង(៤)សឺមីរ៉ឺម៉ក ដែលមានទម្ងន់សរុបអតិបរមាលើសពី ៣,៥តោន ។
ក្រសួងបានបន្តថា យានជំនិះធុនធ្ងន់ទាំងនោះត្រូវបិទស្លាកសញ្ញាចាំងពន្លឺ ដើម្បីឱ្យយានយន្តដទៃទៀតមើលឃើញច្បាស់នៅពេលយប់ សំដៅទប់ស្កាត់គ្រោះថ្នាក់ចរាចរណ៍ផ្លូវគោក ។
លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូន នៅថ្ងៃទី២៥ ខែសីហានេះ បានឱ្យដឹងថា យានជំនិះធុនធ្ងន់ ដែលត្រូវបិទស្លាកសញ្ញាចាំងពន្លឺមានរថយន្តដឹកទំនិញធុនធ្ងន់ យានយន្តុបករណ៍ រ៉ឺម៉ក និងសឺមីរ៉ឺម៉ក មានទម្ងន់សរុបអតិបរមាលើសពី៣,៥តោន ។ លោកបានពន្យល់ថា ស្លាកសញ្ញាចាំងពន្លឺបិទនៅលើយានជំនិះត្រូវមានពីរពណ៌ គឺក្រហម និងលឿងដែលមានទទឹងមិនតិចជាង៥០មីលីម៉ែត្រ និងកម្រិតចាំងពន្លឺស្របតាមបទដ្ឋានបច្ចេកទេស VC104+ ។
សម្រាប់ស្លាកសញ្ញាចាំងពន្លឺពណ៌លឿង ត្រូវបិទនៅផ្នែកសងខាងតាមបណ្ដោយយានជំនិះ ដែលមានប្រវែងមិនតិចជាង៨០ភាគរយនៃប្រវែងបណ្តោយរបស់យានជំនិះ និងបិទនៅគែមខ្ពស់បំផុតតាមទម្រង់យាន ប៉ុន្តែមិនតិចជាង៤០០មីលីម៉ែត្រពីគែម និងមានប្រវែងមិនតិចជាង២៥០មីលីម៉ែត្រ ។
ដោយឡែកសម្រាប់ស្លាកសញ្ញាចាំងពន្លឺពណ៌ក្រហម ត្រូវបិទនៅផ្នែកខាងក្រោយតាមទទឹងយានជំនិះ និងបិទនៅគែមខ្ពស់បំផុតតាមទម្រង់យាន ប៉ុន្តែមិនតិចជាង៤០០មីលីម៉ែត្រពីគែម ។ ទទួលបានសេចក្តីណែនាំនេះ ក្រសួងណែនាំឱ្យនាយកដ្ឋានដឹកជញ្ជូនផ្លូវគោក មន្ទីរសាធារណការ និងដឹកជញ្ជូនខេត្តក៏ដូចជា ក្រុមហ៊ុននានា ត្រូវចាត់ចែងអនុវត្តទៅតាមភារកិច្ចរៀងៗខ្លួនឱ្យមានប្រសិទ្ធភាព និងដោយស្មារតីទទួលខុសត្រូវ ៕
ចែករំលែកព័តមាននេះ