រាជធានីភ្នំពេញ ៖ កន្លងមកក្នុងកិច្ចសហប្រតិបត្តិការរវាងប្រទេសទាំងពីរសាធារណរដ្ឋប្រជាមានិតចិន និងប្រទេសកម្ពុជា ប្រទេសចិនក៏ដូចជា ប្រជាជនខ្លួនតែងតែផ្តល់កិច្ចសហប្រតិបត្តិការយ៉ាងល្អប្រសើរមកកម្ពុជាលើគ្រប់វិស័យ ជាពិសេស វិស័យកសិកម្ម ដោយភាគីចិនបានបង្កើនបរិមាណនៃការនាំចូលអង្ករកម្ពុជារហូតដល់ ៥០០ពាន់តោន និងថ្មីៗនេះបានអនុញ្ញាតឱ្យកម្ពុជានាំចេញចេកអំបូងលឿង និងស្វាយស្រស់ឆ្ពោះត្រង់ទៅកាន់ប្រទេសចិនផងដែរ។
ដំណឹងល្អមួយទៀតនោះ គឺថា ក្រោយពីកិច្ចព្រមព្រាងពាណិជ្ជកម្មសេរីកម្ពុជា-ចិន បានបញ្ចប់ការតាក់តែង និងគ្រោងចុះហត្ថលេខាដោយប្រមុខដឹកនាំនៃប្រទេសទាំងពីរនាពេលខាងមុខនោះក៏ស្រាប់តែមានក្រុមហ៊ុនចិនមួយបានបង្ហើបគម្រោងទៅកាន់ថ្នាក់ដឹកនាំក្រសួងកសិកម្មរុក្ខាប្រមាញ់ និងនេសាទ ក្នុងការវិនិយោគនៃការនាំចេញដំណាំហូបផ្លែផ្សេងទៀតរបស់កម្ពុជាមានដូចជា ទុរេន មៀន ខ្នុរ ដូងក្រអូប និងក្រូចថ្លុងជាដើម ទៅកាន់ទៅផ្សារប្រទេសចិន ។
ថ្លែងនៅក្នុងកិច្ចប្រជុំនៅទីស្តីការក្រសួងកសិកម្ម រុក្ខាប្រមាញ់ និងនេសាទ នាថ្ងៃទី២៤ ខែសីហា ឆ្នាំលោក Wang Bingham អគ្គនាយកក្រុមហ៊ុនធៀន ធៀន និងសហការី បានថ្លែងប្រាប់លោក លោករដ្ឋមន្ត្រី វេង សាខុន ពាក់ព័ន្ធនឹងគម្រោងវិនិយោគរបស់ក្រុមហ៊ុនក្នុងវិស័យកសិកម្មនៅព្រះរាជាណាចក្រកម្ពុជា ។
លោក Wang Bingham បានបញ្ជាក់ថា បន្ទាប់ពីបានទស្សនកិច្ចសិក្សាស្វែងយល់អំពីផលិតផល និងគុណភាពនៃផ្លែស្វាយ មៀន ខ្នុរ ទុរេន ដូងក្រអូប និងក្រូចថ្លុងរបស់កម្ពុជា លោកពិតជាមានការជឿជាក់ថានឹងទទួលការគាំទ្រ និងមានទីផ្សារខ្ពស់នៅប្រទេចិន នាពេលដែលក្រុមហ៊ុន ដាក់លក់នៅលើប្រព័ន្ធទីផ្សារពាណិជ្ជកម្មព័ត៌មានវិជ្ជាផ្ទាល់របស់ក្រុមហ៊ុន ។ ហើយដើម្បីឱ្យគម្រោងនេះទទួលបានជោគជ័យ លោកអគ្គនាយកក៏បានស្នើសុំយោបល់ និងអនុសាសន៍ពីឯកឧត្តមរដ្ឋមន្ត្រី និងមន្ត្រីជំនាញពាក់ព័ន្ធនឹងទីផ្សារប្រមូលទិញ និងនីតិវិធីនៃការនាំចេញផលិតផលខាងលើទៅប្រទេសចិន ។
លោករដ្ឋមន្ត្រីបានថ្លែងថាបន្តថា ពាក់ព័ន្ធនឹងគម្រោងវិនិយោគ ប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់ ពីកម្ពុជាចេញទៅ ប្រទេសចិន របស់ក្រុមហ៊ុន លោករដ្ឋមន្ត្រី បានស្វាគមន៍ និងគាំទ្រ ហើយលោកក៏បានបញ្ជាក់ផងដែរថា គម្រោងវិនិយោគនេះគឺពិតជាស្របតាមផែនការអភិវឌ្ឍវិស័យកសិកម្មរបស់ក្រសួងក្នុងការជំរុញផលិតកម្មកសិកម្មក្នុងស្រុកតាមរយៈការធ្វើទំនើបកម្មកសិកម្ម ការកែច្នៃ វេចខ្ចប់ និងនាំចេញ ដែលទាំងអស់នេះនឹងជួយជំរុញសេដ្ឋកិច្ចជាតិ ។
ក្នុងនោះផងដែរ លោក វេង សាខុន ក៏បានណែនាំដល់ ក្រុមហ៊ុនសហការជាមួយស្ថានទូតចិនប្រចាំកម្ពុជា អគ្គនាយកដ្ឋានកសិកម្ម នាយកដ្ឋានសហប្រតិបត្តិកាអន្តរជាតិ និងនាយកដ្ឋានកសិឧស្សាហកម្ម សិក្សាស្វែងយល់បន្ថែមអំពីសក្តានុពុលនៃផលិតកម្មឈើហូបផ្លៃខាងលើ រួចរៀបចំចុះអនុស្សារណៈនៃការយោគយល់គ្នាជាមួយក្រសួង ដើម្បីក្រសួងមានលទ្ធភាពអាចជួយសម្របសម្រួលក្នុងការធ្វើផលិតកម្មកសិកម្មតាមកិច្ចសន្យាជាមួយសហគមន៍ និងជាពិសេសនីតិវិធីនៃការនាំចេញ ៕
ចែករំលែកព័តមាននេះ