ខេត្តបន្ទាយមានជ័យ ៖ គ្រួសារជនរងគ្រោះដោយឧបទ្ទវហេតុបាក់ដងសន្ទូចក្នុងការដ្ឋានសំណង់អគារ បណ្តាលឱ្យសង្កត់លើមនុស្សបាត់បង់ជីវិតចំនួន៥នាក់ និងរបួសធ្ងន់ស្រាលចំនួន៤នាក់ បានទទួលអំណោយពីកាកបាទក្រហមកម្ពុជាកាលពីថ្មីៗនេះ។ គួររំលឹកថា សោកនាដកម្មបាក់ដងសន្ទូច ឆក់យកជីវិត៥នាក់ របួសធ្ងន់៣នាក់…
ខេត្តបន្ទាយមានជ័យ ៖ គ្រួសារជនរងគ្រោះដោយឧបទ្ទវហេតុបាក់ដងសន្ទូចក្នុងការដ្ឋានសំណង់អគារ បណ្តាលឱ្យសង្កត់លើមនុស្សបាត់បង់ជីវិតចំនួន៥នាក់ និងរបួសធ្ងន់ស្រាលចំនួន៤នាក់ បានទទួលអំណោយពីកាកបាទក្រហមកម្ពុជាកាលពីថ្មីៗនេះ។ គួររំលឹកថា សោកនាដកម្មបាក់ដងសន្ទូច ឆក់យកជីវិត៥នាក់ របួសធ្ងន់៣នាក់
លោក អ៊ុយ សំអាត អគ្គនាយក នៃអគ្គនាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជាបានមានប្រសាសន៍ថា ជាការយកចិត្តទុកដាក់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ហើយកាកបាទក្រហមកម្ពុជាបានចុះសួរសុខទុក្ខដល់ជនរងគ្រោះចំនួន៤នាក់ ដែលកំពុងសម្រាកព្យាបាលនៅមន្ទីពេទ្យ និងគ្រួសារជនរងគ្រោះដែលបាត់បង់ជីវិតចំនួន៥នាក់នៅក្រុងប៉ោយប៉ែត។
លោកបានបញ្ជាក់ថា ក្នុងឱកាសចុះសួរសុខទុក្ខ ក៏បាននាំយកអំណោយកាកបាទក្រហមកម្ពុជាប្រគល់ជូនគ្រួសាររងគ្រោះដោយឧបទ្ទវហេតុបាក់ដងសន្ទូច បណ្តាលឱ្យបាត់បង់ជីវិតចំនួន៥គ្រួសារ ក្នុង១គ្រួសារទទួលបាន អង្ករចំនួន៤ការ៉ុង ស្មើនឹង១០០គីឡូក្រាម, ទឹកក្រូច៥កេស, ត្រីខ៥យួរ, មី៥កេស ថវិការមួយចំនួន ។ ដោយឡែកអ្នករងគ្រោះចំនួន៤នាក់ដែលកំពុងសម្រាកព្យបាលនៅមន្ទីពេទ្យ ក្នុងម្នាក់ៗទទួលបាន ទឹកដោះគោឆៅ ២កេស ទឹកបរិសុទ្ធ២កេស អំបិលអ៊ីយ៉ូត និងឃីត១កញ្ចប់រួមមានភួយ មុង ក្រម៉ា អាវយឺត និងថវិកាមួយចំនួនផងដែរ។
សូមបញ្ជាក់ថា ឧបទ្ទវហេតុបាក់ដងសន្ទូចក្នុងអគារការដ្ឋានសំណង់សង្កត់លើមនុស្ស បណ្តាលឱ្យបាត់បង់ជីវិតចំនួន៥នាក់ និងរបួសធ្ងន់ស្រាលចំនួន៤នាក់ ដែលហេតុការណ៍នេះបានកើតឡើងកាលពីរសៀលថ្ងៃទី១២ ខែសីហា ឆ្នាំ២០២០ ស្ថិតភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ៕ (កែសម្រួលដោយ ៖ ធីតា)
ចែករំលែកព័តមាននេះ