ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្ត កាលពីថ្ងៃទី២១ ខែសីហា ឆ្នាំ២០២០ បានបញ្ជាឱ្យឈ្មួញដែលកាយដីចំណីមាត់ស្ទឹងដោយគ្មានច្បាប់អនុញ្ញាតរហូតកាយដល់សសរស្ពានដែក…
ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្ត កាលពីថ្ងៃទី២១ ខែសីហា ឆ្នាំ
២០២០ បានបញ្ជាឱ្យឈ្មួញដែលកាយដីចំណីមាត់ស្ទឹងដោយគ្មានច្បាប់អនុញ្ញាតរហូតកាយដល់សសរស្ពានដែក ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ឱ្យចាក់ដីលុបហើយកិនបង្ហាប់ដូចដើមវិញ ។ ឯកឧត្តមអភិបាលខេត្ត ថ្លែងថា កាលពីថ្ងៃទី
២០ ខែសីហា ឆ្នាំ២០២០ ឯកឧត្តមបានទទួលព័ត៌មានថា មានឈ្មួញលួចកាយដីចំណីមាត់ស្ទឹងហើយថ្លើមធំហ៊ានកាយរហូតដល់ជើងស្ពានដែកពីសម័យបារាំង និងប៉ះពាល់ដល់ប្រព័ន្ធធារាសាស្គ្រ ដែលបង្កការប្រឈមគ្រប់បែបយ៉ាង ។
ឯកឧត្តមបានដឹកនាំកម្លាំងសមត្ថកិច្ច ដែលមានកងរាជអាវុធហត្ថនិងនគរបាលចុះទៅហាមឃាត់និងឃាត់ចាប់គ្រឿងចក្រមានអេស្កាវ៉ាទ័រ៣គ្រឿង រថយន្តដឹកដី៩គ្រឿង និងប៊ុលដូហ្សែ៊រ១គ្រឿង នាំយកទៅទុកនៅប៉ុស្តិ៍នគរបាលសង្កាត់ទឹកថ្លាដើម្បីមានវិធានការតាមច្បាប់ ។ឯកឧត្តម អ៊ុំ រាត្រី បញ្ជាក់ថា ក្រោយពេលឃាត់ចាប់គ្រឿងចក្រដែលកាយដីចំណីមាត់ស្ទឹងទឹកថ្លាដោយគ្មានច្បាប់អនុញ្ញាត នៅថ្ងៃទី២១ ខែសីហា ឆ្នាំ២០២០ ឯកឧត្តមបានដឹកនាំមន្ត្រីជំនាញទៅពិនិត្យនិងពិភាក្សា និងបានតម្រូវឱ្យឈ្មួញដែលកាយដីចំណីមាត់ស្ទឹងនៅចំណុចខាងលិចជាប់ស្ពានទឹកថ្លា និងកាយរហូតដល់សសរស្ពានដែកសម័យបារាំង ដោយសម្រេចឱ្យឈ្មោះ អុឹង ប៊ុនហួរ ថៅកែឡឥដ្ឋ ដែលកាយដីចំណីមាត់ស្ទឹងគ្មានច្បាប់អនុញ្ញាតនេះ ចាក់លុបចំណីមាត់ស្ទឹងនិងសសរជើងស្ពានឱ្យដូចដើមវិញហើយកិនបង្ហាប់ ។
ចំណែកម្ចាស់ឡឥដ្ឋឈ្មោះ អុឹង ប៊ុនហួរ និយាយថា ជាការពិត គាត់ធ្វើឡឥដ្ឋនៅក្បែរមាត់ស្ទឹងទឹកថ្លាដែលជាដីកម្មសិទ្ធិរបស់គាត់ជាច្រើនឆ្នាំមកហើយ ដោយកាយដីចំណីមាត់ស្ទឹងយកមកធ្វើឥដ្ឋរហូតមក មិនដែលមានបញ្ហាទេ ដោយគ្រាន់តែអាជ្ញាធរភូមិ សង្កាត់បានដឹង ។លុះក្រោយមក ដោយឃើញថាចំណីមាត់ស្ទឹងចំណុចខាងលិចស្ពានទឹកថ្លាគោករាក់ ទើបគាត់កាយដីយកទៅដាក់នៅចំណុចដីល្វែង តែដោយក្រុមអ្នកកាយដីបានកាយដល់ជើងសសរស្ពានដែលបង្កផលប៉ះពាល់ ហើយអាជ្ញាធរក្រុងសិរីសោភ័ណ និងខេត្ត បានមកពិនិត្យឃើញខុសឱ្យចាក់ដីលុបវិញ គឺគាត់ធ្វើតាមការណែនាំដោយគ្មានជំទាស់ឡើយ ។
លោក ហ៊ឹល រ៉ាយ៉ា អភិបាលក្រុងសិរីសោភ័ណបានឲ្យដឹងថា កន្លងមកលោកបានដឹកនាំមន្ត្រីរដ្ឋបាលក្រុង ទៅណែនាំលោកអុឹង ប៊ុនហួរ ម្តងហើយព្រោះគាត់បានឲ្យកម្មករនិងគ្រឿងចក្ររបស់គាត់កាយយកអាចម៍ដីពីមាត់ស្ទឹង និងចំណីស្ទឹងសិរីសោភ័ណត្រង់ក្បាលស្ពានទឹកថ្លាក្នុងទំហំប្រមាណជិត៣០.០០០ម៉ែត្រក្រឡា ដើម្បីយកធ្វើជាកម្មសិទ្ធិឯកជនម្តងរួចមកហើយ ។ ប៉ុន្តែទោះបីមានការហាមឃាត់ក្តី ក៏លោក អុឹង ប៊ុនហួរ នៅតែបន្តឲ្យកម្មករនិងគ្រឿងចក្ររបស់គាត់បន្តកាយយកអាចម៍ដីពីមាត់ស្ទឹងដដែលដោយមិនញញើតនឹងច្បាប់ឡើយ ។
លោក ហ៊ឹល រ៉ាយ៉ា ឲ្យដឹងទៀតថា អាជ្ញាធរនិងមន្ត្រីជំនាញ បានត្រូតពិនិត្យលម្អិតបន្ថែមទៀតលើសកម្មភាពរំលោភខាងលើ ហើយនឹងប្រើឧបករណ៍និយាមការភូមិសាស្ត្រ(GPS)ចុចផ្ទៀងផ្ទាត់ឲ្យបានជាក់លាក់ ។លោកអភិបាលក្រុង បានបញ្ជាក់ថា លើកទី១-លោកចុះទៅឲ្យបញ្ឈប់ការកាយ លើកទី២-លោកចុះទៅឃាត់រថយន្តដឹកដី៩គ្រឿង ត្រាក់ទ័រ១គ្រឿង និងអេស្កាវ៉ាទ័រ៣គ្រឿង ធ្វើកិច្ចសន្យា បើមានលើកក្រោយទៀតនឹងបញ្ជូនទៅតុលាការតាមនីតិវិធីច្បាប់ ។
ស្ពានដែកដែលកសាងពីសម័យបារាំងមានអាយុកាលជិត៩០ឆ្នាំ
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានប្រាប់ថា ស្ពានដែកដែលត្រូវបានកសាងនៅសម័យបារាំង មកដល់បច្ចុប្បន្នមានអាយុកាលជិត៩០ឆ្នាំហើយ ។ ក្រោយពេលចាត់វិធានការឱ្យឈ្មួញកាយដីលុបសសរស្ពានវិញ លោកជំទាវ ម៉ៅ ម៉ាល័យ ភរិយាឯកឧត្តមឧបនាយករដ្ឋមន្ត្រី កែ គឹមយ៉ាន បានណែនាំឱ្យមន្ត្រីរាជការនិងកងកម្លាំង យកថ្នាំពណ៌ច្រែះឬពណ៌ឈាមជ្រូកទៅលាប ដើម្បីលម្អស្ពានដែកដែលកសាងពីសម័យបារាំងនេះរក្សាទុកឱ្យកូនចៅជំនាន់ក្រោយបានស្គាល់ ។
លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្ត ថ្លែងថា ស្ពានដែកនេះត្រូវបានកសាងនិងជាកេរដំណែលសម័យអាណានិគមនិយមបារាំងនៅឆ្នាំ១៩៣១ ដែលជាដែកប្រភេទ UVHL ធ្វើឆ្លងស្ទឹងទឹកថ្លាតាមបណ្តោយផ្លូវជាតិលេខ៥ តភ្ជាប់ពីក្រុងសិរីសោភ័ណទៅក្រុងប៉ោយប៉ែត ។លោកប្រធានមន្ទីរបញ្ជាក់ថា ក្រោយពេល
ដែលរាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោនាយករដ្ឋមន្ត្រី ហ៊ុន សែន បានអភិវឌ្ឍន៍ផ្លូវជាតិលេខ៥ និងកសាងស្ពានបេតុងថ្មី ។
ឯកឧត្តមឧបនាយករដ្ឋមន្ត្រី កែ គឹមយ៉ាន បានស្នើសុំទុកស្ពានដែកដែលកសាងពីសម័យបារាំងដែលមានអាយុកាលរហូតពេលនេះ៨៩ឆ្នាំហើយ ដើម្បីរក្សាទុកឱ្យកូនចៅជំនាន់ក្រោយបានស្គាល់។ស្ពានដែកនេះជាអនុស្សារីយ៍ដែលឯកឧត្តម កែ គឹមយ៉ាន ធ្លាប់នៅការពារនាសម័យសាធារណរដ្ឋប្រជាមានិតកម្ពុជាផងដែរ ៕
ចែករំលែកព័តមាននេះ