កូរ៉េខាងត្បូង ៖ យោងតាមសេចក្តីថ្លែងការណ៍មួយពីក្រសួងអប់រំប្រទេសកូរ៉េខាងត្បូង កាលពីថ្ងៃច័ន្ទ បានឱ្យដឹងថា សាលារៀនជិត ២,០០០កន្លែង បានផ្អាកថ្នាក់រៀនដោយផ្ទាល់ ដោយសារតែការកើនឡើងនៃករណីឆ្លងវីរុសកូវីដ១៩។
ក្រសួងបាននិយាយថា ការប្រកាសនេះ គឺសំដៅលើសាលារៀនចំនួន ១,៨៤៥កន្លែង នៅទូទាំងប្រទេស ដែលនេះជាលើកទី១ ចាប់តាំងពីខែឧសភា ដែលសាលាចំនួនជាង ១,០០០ នឹងត្រូវបិទទ្វារ។
យោងតាមក្រសួងបានឱ្យដឹងថា សិស្សសរុបចំនួន ២៨៣នាក់ និង បុគ្គលិកសាលាចំនួន ៧៩នាក់បានធ្វើតេស្តវិជ្ជមានថា មានកូវីដ១៩ ចាប់តាំងពីថ្ងៃទី២០ ខែឧសភា នៅពេលដែលប្រទេសកូរ៉េខាងត្បូង បានចាប់ផ្តើមបញ្ជូនសិស្សទៅថ្នាក់រៀនវិញ។
បណ្តាប្រទេសនៅជុំវិញពិភពលោក បច្ចុប្បន្នកំពុងរិះរកវិធី ដើម្បីធ្វើឱ្យកុមាររៀនសូត្រក្នុងពេលមានជំងឺរាតត្បាត។ អគ្គលេខាធិការអង្គការសហប្រជាជាតិ លោក Antonio Guterres បានព្រមាននៅដើមខែសីហាថា ពិភពលោកកំពុងប្រឈមមុខនឹងគ្រោះមហន្តរាយលើមនុស្សជំនាន់ក្រោយ ដោយសារតែការបិទទ្វារសាលារៀនអំឡុងពេលមានជំងឺរាតត្បាតឆ្លងរាលដាល។
លោក Guterres បានបន្ថែមថា ៖ «ការនាំសិស្សត្រឡប់ទៅសាលារៀននិងស្ថាប័នសិក្សាប្រកបដោយសុវត្ថិភាពតាមដែលអាចធ្វើទៅបាន ត្រូវតែជាអាទិភាព នៅពេលការឆ្លងកូវីដ១៩ ត្រូវបានគ្រប់គ្រង»៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ