អាមេរិក-គុយបា ៖ ព្យុះត្រូពីកាល់ឈ្មោះ LAURA ដែលត្រូវក្លាយជាព្យុះសង្ឍរាមួយនាថ្ងៃទី២៥សីហា បានបោកបក់ដល់ប្រទេសគុយបាហើយ កាលពីយប់ថ្ងៃទី២៣ មកថ្ងៃទី២៤ សីហា បន្ទាប់ពីបណ្ដាលឲ្យមនុស្សបាត់បង់ជីវិតយ៉ាងតិច១២នាក់…
អាមេរិក-គុយបា ៖ ព្យុះត្រូពីកាល់ឈ្មោះ LAURA ដែលត្រូវក្លាយជាព្យុះសង្ឍរាមួយនាថ្ងៃទី២៥សីហា បានបោកបក់ដល់ប្រទេសគុយបាហើយ កាលពីយប់ថ្ងៃទី២៣ មកថ្ងៃទី២៤ សីហា បន្ទាប់ពីបណ្ដាលឲ្យមនុស្សបាត់បង់ជីវិតយ៉ាងតិច១២នាក់ នៅហៃទី និងនៅសាធារណរដ្ឋដូមីនិក ខណៈព្យុះសង្ឃរាឈ្មោះ MARCO កំពុងតែបោកបក់សំដៅទៅភាគខាងត្បូងសហរដ្ឋអាមេរិក។
យោងតាមបណ្ដាសារព័ត៌មានអាមេរិកថា ការកើតមានព្យុះដល់ទៅ២ស្ទើរដំណាលគ្នា ក្នុងឈូងសមុទ្រម៉ិកស៊ិក ពិតជាកម្រមានណាស់។ ព្យុះ MARCO ក្លាយជាព្យុះសង្ឃរាមួយនាថៃ្ងទី២៣សីហា ជាមួយកម្លាំងខ្យល់ដល់ទៅ១២០គីឡូម៉ែត្រក្នុង១ម៉ោង ដែលបោកបក់លើមួយផ្នែកនៃឆ្នេរសមុទ្រអាមេរិកនៃឈូងសមុទ្រម៉ិកស៊ិក។ ព្យុះនោះត្រូវបោកបក់កាត់ក្បែរឆ្នេរសមុទ្រភាគអាគ្នេយ៍នៃរដ្ឋល្វីហ្សាណា នាថ្ងៃទី២៤ សីហា និងចាប់ផ្ដើមចុះថមថយកម្លាំងពេលបោកបក់កាត់ដែនដី។
ព្យុះ LAURA ដែលបណ្ដាលឲ្យមានទឹកជំនន់ នៅហៃទី និងនៅសាធារណរដ្ឋដូមីនិក ដោយសម្លាប់មនុស្សយ៉ាងតិច១២នាក់ ក៏ត្រូវប្រែក្លាយទៅជាព្យុះសង្ឍរាមួយនាថ្ងៃទី២៥ សីហា ហើយអាចវាយប្រហារតំបន់ដដែលនោះរបស់អាមេរិក។ ព្យុះ LAURA ក៏ត្រូវបោកបក់លើភាគកណ្ដាល និងភាគពាយព្យនៃឈូងសមុទ្រម៉ិកស៊ិកនាយប់ថ្ងៃទី២៥ សីហា និងនាថ្ងៃទី២៦ សីហា៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ