រាជធានីភ្នំពេញ ៖ ជីវិត និងវាសនាមនុស្សមើលមិនឃើញទេ ជួនកាលអ្នកក្រក៏អាចក្លាយជាមាន ហើយអ្នកក៏អាចក្លាយជាអ្នកក្រវិញក៏ថាបាន ទាំងនេះសុទ្ធតែបានមកពីការមានគំនិត ។ ប្រសិនបើមានគំនិតមិនថា អ្នកជាអ្នកណានោះទេ…
រាជធានីភ្នំពេញ ៖ ជីវិត និងវាសនាមនុស្សមើលមិនឃើញទេ ជួនកាលអ្នកក្រក៏អាចក្លាយជាមាន ហើយអ្នកក៏អាចក្លាយជាអ្នកក្រវិញក៏ថាបាន ទាំងនេះសុទ្ធតែបានមកពីការមានគំនិត ។ ប្រសិនបើមានគំនិតមិនថា អ្នកជាអ្នកណានោះទេ សុទ្ធតែអាចមានបានទៅបាន ហើយ បើគេជាអ្នកមានស្រាប់ មានគំនិតបន្ថែមទៀតនោះគេរឹតតែមានឡើង ។ ប៉ុន្តែបើទោះជាមានប៉ុណ្ណាក៏ដោយ បើមិនមានគំនិត នោះក៏អាចក្លាយជាអ្នកក្រវិញបាន ។
លោក សោម សម្បត្តិ អគ្គនាយកថ្នាំពណ៌ជាតិ ខាំផេង (Cam-Paint) បានចែលរំលែកបទពិសោធន៍ដូចនេះថា «បើសួរថា តើមនុស្សគ្រប់គ្នាអាចក្លាយជាអ្នកមានទេ ខ្ញុំសូមឆ្លើយថាមនុស្សទាំងអស់សុទ្ធតែមានឱកាសក្លាយជាអ្នកមាន ។ សំនួរមួយទៀត តើយើងទាំងអស់គ្នា សុទ្ធតែមានឱកាសរៀនសូត្រទេ? ខ្ញុំសូមឆ្លើយថាមាន។ ហើយបើគិតទៅនៅក្នុងសម័យទំនើបនេះ ជាការពិត គ្រប់ទីកន្លែង គ្រប់វេលា សុទ្ធតែយើងអាចរៀនបាន ឱ្យតែយើងនឹងពិតជាមានការតាំងចិត្តខ្ពស់ » ។
លោក សោម សម្បត្តិ បានបន្តទៀតថា «ហើយអ្វីដែលយើងគួរឱ្យស្តាយគឺមនុស្សកាន់ស្មាតហ្វូន ប៉ុន្តែពួកគាត់មិនដឹងថាស្មានហ្វូននោះជាឧបករណ៍ដែលអាចរៀនសូត្របាន។ យើងមើល គ្រប់សម័យកាលទាំងអស់ គ្មានសម័យណាមានសៀវភៅច្រើនជាងសម័យនេះទេ ។ មនុស្សខ្លះ មិនហ៊ានទិញសៀវភៅក្នុងតំលៃ ១២ដុល្លារអាមេរិកទេ គេគិតថាថ្លៃ ប៉ុន្តែបើស្រាបៀរមួយកេស តំលៃ ១២ ដុល្លារ គេរកលុយទិញទាល់តែបានផឹក ។ តែសៀវភៅ ១២ ដុល្លារ អានឱ្យយើងឆ្លាតយើងថា ថ្លៃ បើស្រាបៀរមួយកេស តំលៃ ១២ ដុល្លារធ្វើឱ្យយើងល្ងង់ យើងថាថោក ។ អ៊ីចឹងការពិតស្រាបៀរនោះវាថោក ឬមនុស្សនោះវាថោក ។
អ៊ីចឹងយើងបើដាក់ចិត្តរៀនសូត្រ វាចាប់ផ្តើមមានហើយ ព្រោះមានចាប់ផ្តើមពីមានចំណេះ មានគំនិតទៅមុន»។ លោកក៏បានលើកយកអំពីមនុស្សឧស្សាហ៍ និងមនុស្សខ្ជិលដូចនេះថា មានចំណេះហើយមិនប្រាកដថា មនុស្សជោគជ័យ ឬអាចក្លាយជាអ្នកមានបានទេ អ្នកខ្លះមើលទៅ ឃើញប្រាក់ខែតិច ចឹងគាត់គិតថា ធ្វើតិចៗទៅបានហើយ ចាំគេឱ្យប្រាក់ខែរៀងច្រើនបន្តិចចាំយើងធ្វើការឱ្យខ្លាំង គ្រាន់តែការគិតបែបនេះ យើងដឹងថាជាគំនិតអ្នកក្របាត់ទៅហើយ ចឹងបើយើងដូរតែបន្តិចអាចចូលមកផ្លូវអ្នកមានបាត់ទៅហើយ ។
លោក បន្តដូចនេះថា «ចឹងអ្នកមាន កាលគេនៅក្រគេខំធ្វើការណាស់ គេមិនដែលខ្វល់ថាប្រាក់ខែឱ្យប៉ុន្មានត្រូវធ្វើប៉ុណ្ណឹងនោះទេ ពីព្រោះថាបើគេឱ្យប៉ុណ្ណាធ្វើប៉ុណ្ណឺង ចឹងមានន័យយើងជាខ្ញុំកញ្ជះរបស់លុយហើយនឹង គេចាយលុយឱ្យយើងធ្វើការហើយនឹង យើងអត់មានម្ចាស់ការផងនឹង តែលុយជាម្ចាស់របស់យើងទៅវិញ»។ លោកបានបន្ថែមនូវបទពិសោធន៍ថា ដើម្បីឱ្យក្លាយខ្លួនជាអ្នកមានស្រួលណាស់ កុំឱ្យធ្វើខ្ញុំលុយ ធ្វើមិនមែនដោយសារលុយ ធ្វើការដើម្បីធ្វើខ្លួនឱ្យក្លាយជាម្ចាស់លុយ ធ្វើការឱ្យប្រែរខ្លួនដែលមានសិទ្ធមានអំណាច ក្នុងការប្រើប្រាស់លុយ ដូចនេះវាទាមទាធ្វើការឱ្យខ្លាំង ធ្វើការដោយយកចិត្តទុកដាក់ ធ្វើការដោយស្មោះត្រង់ ។
លោកបន្តថា «ម្យ៉ាងវិញទៀត ពេលខ្លះយើងខ្ជីខ្ជារណាស់ ប៉ុន្តែបើយើងប្តូរវាតែបន្តិច ពីទំលាប់ខ្ជីខ្ជារទៅជាទំលាប់ចេះសន្សំ សន្សំក្នុងន័យនេះ គឺការសន្សំបទពិសោធន៍ពីអ្នកដទៃ សន្សំទំលាប់ល្អដែលអ្នកមានគេចូលចិត្តធ្វើ ។ នៅពេលដែលយើងជាមនុស្សឧស្សាហ៍ ការគិតក្នុងការធ្វើការមិនខ្លាចនឿយហត់ មិនគិតពីប្រាក់ខែ នោះយើងនឹងមានឳកាសបានទទួលដំណែងថ្មី ឡើងខ្ពស់ជាងមុន ដូចនេះយើងនឹងមានជាងមុន»។
ងាកមកមើល ប្រភេទមនុស្សមួយទៀត ចង់ប្តូរខ្លួនឱ្យទៅជាអ្នកមាន ហើយគិតចាំទាល់តែមានលុយច្រើនចាំរកស៊ីតែម្តង នោះជាការមិនត្រឹមត្រូវទេ បើយើងនៅតែចាំគ្រប់ដើមបានរកស៊ីនោះគឺគិតខុសហើយ ពីព្រោះការរកស៊ីយើងមិនអាចប៉ាន់ស្មានថា ត្រូវមានដើមទុនប៉ុន្មានដែលអាចរកស៊ីបាននោះទេ មុខរបរឬអាជីវកម្មទាំងអស់មិនដូចគ្នាទេ។ យើងគិតតែត្រឹមប៉ុណ្ណេះ អ្នកខ្លះគេមាន ១០០លាន ដុល្លារអាមេរិកហើយ ចុះហេតុអ្វីគេត្រូវចាំបាច់ទៅខ្ចីលុយធនាគារមករកស៊ីធ្វើអ្វីទៀត អានឹងមានន័យថាគេខ្វះលុយមែន គេមិនបានខ្វះលុយទេ ប៉ុន្តែគេពង្រីកអាជីវកម្មគេឱ្យធំជាងមុន។
ដូចនេះឱ្យតែចាប់ផ្តើមអាជីវកម្ម គឺអាចមានឳកាសកាន់តែធំបាន ដូចនេះយើងមិនត្រូវរងចាំទាល់តែមានលុយធំ លុយច្រើនចាំបើកនោះទេ។ គ្រាន់តែថាដំបូងយើងត្រូវរៀនរកស៊ីអ្វីតូចៗទៅមុន ឬក៏ចូលហ៊ុនជាមួយអ្នកណាម្នាក់ដែលយើងទុកចិត្តបាន នេះគេហៅថាយើងសន្សំក្បាច់គុណ មុនប្រឡូកអាជីវកម្មដោយខ្លួនឯង៕
ចែករំលែកព័តមាននេះ