ប្រទេសបេឡារុស ៖ បាតុករប្រឆាំងរដ្ឋាភិបាលច្រើនសិបពាន់នាក់ កាលពីថ្ងៃទី២៣ សីហា
បានលើកគ្នាហែក្បួន តាមដងវិថីនានានៃទីក្រុងមីនស្ក៍ ខណៈកងយោធាត្រូវបានដាក់ពង្រាយ ពេលកំពុងមានវិបត្តិនយោបាយនៅបេឡារុស ដោយគូសបញ្ជាក់ថា កងទ័ពនឹងធានាដោយផ្ទាល់
ហើយពុំមែនប៉ូលិសទេ ក្នុងការថែរក្សារបៀបរៀបរយនិងការពារវិមាននានា ។
បាតុកម្មធំៗកើតមានជាប់រដឹកក្នុងរដ្ឋធានីបេឡារុស ចាប់តាំងពីការជាប់ឆ្នោតជាថ្មីទៀតរបស់
ប្រធានាធិបតី លោកអាឡិចសង់ដ្រ៏លូកាឆេនកូក្នុងការបោះឆ្នោតប្រធានាធិបតីកាលពីថ្ងៃទី៩
សីហា ដោយពួកប្រឆាំងចោទថាពោរពេញដោយការក្លែងបន្លំ ។
លោកលូកាឆេនកូដែលដឹកនាំប្រទេសក្នុងកណ្ដាប់ដៃដែក ចាប់តាំងពី២៦ឆ្នាំមកហើយបាន
បដិសេធមិនឲ្យមានការបោះឆ្នោតឡើងវិញដែលជាហេតុនាំឲ្យគូប្រឆាំងសំខាន់ លោកស្រីស្វេតឡាណាស៊ីខាណូស្កាអ៊ីយ៉ា ដែលរត់ភៀសខ្លួនទៅកាន់លីទុយអានី អំពាវនាវឲ្យមានបាតុកម្មប្រឆាំង ។
វិថីនានានៃទីក្រុងមីនស្ក៍នាថ្ងៃទី២៣ សីហា ពេញប្រៀបដោយពួកបាតុករ ដែលនាំគ្នាលើកទង់ពណ៌ក្រហមនិងស ជានិមិត្តរូបនៃការប្រឆាំងរបស់ពួកគេចំពោះរបបលោកលូកាឆេនកូ ។ក្រសួងការពារប្រទេសបេឡារុសបានព្រមានថា ខ្លួនត្រូវបានបញ្ជាឲ្យការពារបណ្ដាវិមានក្នុងរដ្ឋធានីនិងថា រាល់ការប៉ុនប៉ងរបស់ពួកបាតុករ ដើម្បីលើកគ្នាទៅកាន់កាប់វិមានទាំងនេះនឹងត្រូវកងយោធាបង្ក្រាប ។
ដោយចាត់ទុកពួកបាតុករដូចជាពួកហ្វាស៊ីស្ត ក្រសួងការពារប្រទេសបេឡារុសថ្លែងថា វិមាន
ទាំងនេះជាពិសេសបណ្ដាវិមានដែលជាទីតាំងគោរពវិញ្ញាណក្ខ័ន្ធបណ្ដាជនរងគ្រោះក្នុងសម័យសង្គ្រាមលោកលើកទី២ គឺជាទីតាំងគោរពបូជាដែលមិនត្រូវឲ្យមានការប៉ះពាល់បានឡើយ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ