ខេត្តឧត្តរមានជ័យ ៖ បន្ទាប់ពីមានឧបសគ្គជាច្រើនសម្រាប់ប្រជាកសិករ ក្នុងខេត្តឧត្តរមានជ័យក្នុងការទិញគ្រាប់ពូជបន្លែផ្កាខាត់ណា យកដាំខ្លួនឯងនោះ ឥឡូវក្នុងខេត្តនេះបាននឹងកំពុងមានកសិដ្ឋានបណ្តុះកូនផ្កាខាត់ណា និងប៉េងប៉ោះ ដើម្បីឱ្យមានភាពងាយស្រួលដល់កសិករ ដោយមិនចាំបាច់ក្នុងការដាក់ដាំគ្រាប់ពូជទៀតនោះទេ ។…
ខេត្តឧត្តរមានជ័យ ៖ បន្ទាប់ពីមានឧបសគ្គជាច្រើនសម្រាប់ប្រជាកសិករ ក្នុងខេត្តឧត្តរមានជ័យក្នុងការទិញគ្រាប់ពូជបន្លែផ្កាខាត់ណា យកដាំខ្លួនឯងនោះ ឥឡូវក្នុងខេត្តនេះបាននឹងកំពុងមានកសិដ្ឋានបណ្តុះកូនផ្កាខាត់ណា និងប៉េងប៉ោះ ដើម្បីឱ្យមានភាពងាយស្រួលដល់កសិករ ដោយមិនចាំបាច់ក្នុងការដាក់ដាំគ្រាប់ពូជទៀតនោះទេ ។
ម្ចាស់កសិដ្ឋានម្នាក់ក្នុងខេត្តមួយនេះបានប្រាប់សារព័ត៌មានកោះសន្តិភាព នៅថ្ងៃទី២៤ ខែសីហា ឆ្នាំ២០២០នេះថា លោកចាប់ផ្តើមកសិដ្ឋានបណ្តុះកូនផ្កាខាត់ណា និងប៉េងប៉ោះ ដើម្បីជាភាពងាយស្រួលដល់កសិករមិនព្រួយបារម្ភថា គ្រាប់វានឹងមិនដុះនោះទេ ដោយលោកបានបណ្តុះជាកូនហើយ ចឹងគាត់គ្រាន់តែបន្តដាំទៅបានហើយ ។ លោកបានបន្តថា ក្នុងខេត្តនេះមិនទាន់មានកសិដ្ឋានបណ្តុះកូនផ្កាខាត់នោះទេ ដោយលោកជាមនុស្សដំបូងក្នុងរៀនបណ្តុះ និងបើកកសិដ្ឋានបណ្តុះនេះផងដែរ ។
លោក អ៊ឹម ឈាន ដែលជាម្ចាស់កសិដ្ឋា ដែលមានទីតាំងក្នុងឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យបានបន្តថា «ខ្ញុំទើបតែបានចាប់ផ្តើម បណ្តុះកូនផ្កាខាត់ណា និងប៉េងបោះសុទ្ធក្នុងឆ្នាំនេះឯង ដោយមើលឃើញថា កសិករទិញគ្រាប់ពូជហើយយកទៅដាំខូចគ្រាប់ច្រើន មិនសូវបានផល អ៊ីចឹងវាធ្វើឱ្យគាត់ខាតបង់ និងចំណាយពេលច្រើន ។ ដូចនេះខ្ញុំក៏សម្រេចចិត្តចំណាយដើមទុន ១ម៉ឺនដុល្លារអាមេរិកសម្រាប់ធ្វើរោង២បន្ថែមទៀត ដោយបំពាក់ឧបករណ៍នានា ដែលជាប្រព័ន្ធទាំងអស់ ដែលត្រូវតាមស្តង់ដាបច្ចេកទេស ដើម្បីបណ្តុះឱ្យចេញជាកូនឱ្យប្រជាកសិករវិញ»។
លោកបានបន្ថែម «នៅពេលដែលយើងផលិតកូនឱ្យចេញមកហើយ នោះ កសិករគាត់មិនចាំបាច់ព្រួយបារម្ភថា ការដាក់ដាំគ្រាប់មិនដុះនោះទេ ។ ជាធម្មតាកសិករតែងតែទិញគ្រាប់ពូជយកទៅដាំ ដើម្បីបានផ្លែផ្កា ប៉ុន្តែគ្រាប់ខ្លះវាមិនដុះចេញជាពន្លកដូចដែលកសិកររំពឹងទុកនោះទេ ដូចនេះវាអាចខ្ជះខ្ជាយពេលវេលា និងដីឬទីកន្លែងរបស់កសិករ ។ ដូចនេះ ខ្ញុំបានរៀនដើម្បីបណ្តុះពូជចេញ គ្រាប់ ហើយចេញជាកូនមក ដូចនេះកសិករមិនភ័យខ្លាច បន្លែមិនដុះនោះទេ។ ហើយវាមានភាពងាយស្រួលទៀត បន្ទាប់ពីមានកូនហើយស្រេច ។ នៅពេលគាត់បានទិញហើយ ខ្ញុំបានពីបច្ចេកទេសដាំ និងខ្ញុំតែងតែទៅជួយមើលថា តើវាបញ្ហាអ្វីខ្លះ នៅពេលកសិករដាំ»។
ម្ចាស់កសិដ្ឋានវ័យ ៣៥ ឆ្នាំ រូបនេះបានបន្ថែមថា លោកបានទិញគ្រាប់ពូជពីក្រុមហ៊ុន ក្នុង២០ក្រាមមានតំលៃ ៥០០០ ម៉ឺនរៀល ហើយក្នុងគ្រាប់ពូជ២០ក្រាម (១កញ្ជប់) នេះ អាចដុះបាន ៨០ ភាគរយ ដែលវាអាចដុះបានកូនប្រមាណជា ៣៣ទៅ៣៥ ថាស (ក្នុងគ្រាប់ពូជ២០ក្រាម)។ នៅពេលលោកបណ្តុះបានកូនហើយ លោកលក់ក្នុងតំលៃកូនមួយដើម លោកលក់ក្នុងតំលៃ ២០០រៀលឡើងទៅ ហើយក៏អាស្រ័យទៅទំហំ ទៅឱ្យកសិករ។ ហើយក្នុងមួយខែ លោកអាចលក់បានជាង ១០ម៉ឺនកូន ។ លោកបានបន្តថា «ជាធម្មតាខ្ញុំមើលទៅលើផ្ទៃដី របស់ពួកគាត់ដែរ បើសិនជាផ្ទៃដីធំ ខ្ញុំណែរនាំឱ្យប៉ុណ្នេះ ព្រោះខ្ញុំចង់ឱ្យគាត់ដាំដើម្បី ដុះមិនបានចង់តែឱ្យគាត់ទិញទៅ ដាំចេះតែប្រជ្រៀត នុះអាចខុសបច្ចេកទេស នៅពេលយើងបណ្តុះហើយ ទាល់តែអាយុ២០ថ្ងៃទើបអាចលក់វាបាន ហើយជាធម្មតា កសិករដាំត្រូវប្រើរយៈពេល ២ខែ អាចលក់បានហើយ»។
ពីមុនលោកបានដាំបន្លែចំរុះ សម្រាប់លក់ទីលើទីផ្សា ក្នុងឆ្នាំ២០១៤ ប៉ុន្តែក្រោយមកក្នុងឆ្នាំ២០២០នេះ លោកបានសិក្សា ហើយសាកល្បង ក្នុងការដាំដើម្បីបណ្តុះពូជផ្កាខាត់ណានេះតែម្តង ដើម្បីលក់ទៅឱ្យកសិករ ដែលនៅក្នុងខេត្តរបស់លោក។
បច្ចុប្បន្នលោក មានរោង ១ ដែលមានប្រវែង ៥០ ការ៉េ ចំណែកឯរោងពីរបន្ថែមទៀត ក្នុងរោងនីមួយៗ មានប្រវែង ៣០០ ការ៉េ (២រោងចំណាយដើមទុន ១ម៉ឺន ដុល្លារអាមេរិក) សម្រាប់បណ្តុះកូនផ្កាខាត់ណា និងប៉េងប៉ោះសុទ្ធ ដែលនឹងរួចរាល់នៅចុងឆ្នាំនេះផងដែរ។ គួរបញ្ជាក់ផងដែរ បន្ទាប់ពីកសិករទិញកូនខាត់ណាហើយ នៅពេលធំល្មមលក់ កសិករបានលក់ឱ្យក្រុមហ៊ុន ដើម្បីក្រុមហ៊ុនលក់ទៅក្នុងទីផ្សាវិញ៕
ចែករំលែកព័តមាននេះ