ខេត្តកណ្តាល ៖ យុវជន២នាក់ បានយកដំបងវាយយុវជនម្នាក់ទៀតពីក្រោយ ខណៈកំពុងជិះម៉ូតូ បណ្តាលអោយរងរបួសធ្ងន់ ដោយសារខឹងជនរងគ្រោះឌឺដងដាក់ខ្លួន។ ហេតុការណ៌ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២១ ខែសីហា ឆ្នាំ២០២០…
ខេត្តកណ្តាល ៖ យុវជន២នាក់ បានយកដំបងវាយយុវជនម្នាក់ទៀតពីក្រោយ ខណៈកំពុងជិះម៉ូតូ បណ្តាលអោយរងរបួសធ្ងន់ ដោយសារខឹងជនរងគ្រោះឌឺដងដាក់ខ្លួន។
ហេតុការណ៌ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២១ ខែសីហា ឆ្នាំ២០២០ ស្ថិតនៅចំណុចលើផ្លូវជាតិលេខ១១០ ក្នុងភូមិបារ៉ែនលើ ឃុំស្វាយប្រទាលស្រុកស្អាង ខេត្តកណ្ដាល ។
ជនរងគ្រោះឈ្មោះ សាឃី វ៉ាន់សូត្រ ភេទប្រុស អាយុ១៥ឆ្នាំ ជាសិស្ស មានទីលំនៅភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល ចំណែកជនសង្ស័យចំនួន២នាក់ ក្នុងនោះម្នាក់ឈ្មោះ ប៊ុង ម៉េងហុង ភេទប្រុស អាយុ១៥ឆ្នាំ មុខរបរកសិករ មានទីលំនៅភូមិព្រែកតាជ័រ ឃុំស្វាយប្រទាល ស្រុកស្អាង ខេត្តកណ្តាល និងម្នាក់ទៀតឈ្មោះ ផេង លីហេង ភេទប្រុស អាយុ១៦ឆ្នាំ មុខរបរកសិករ មានទីលំនៅភូមិព្រែកតាជ័រ ឃុំស្វាយប្រទាល ស្រុកស្អាង ខេត្តកណ្តាល ។
លោកវរសេនីយ៌ លន ចន្ថារ អធិការរងនគរបាលស្រុកស្អាង បានអោយដឹងថា នៅវេលាម៉ោងកើតហេតុខាងលើ ឈ្មោះ សាឃី វ៉ាន់សូត្រ បានជិះម៉ូតូ មួយគ្រឿង ម៉ាកគុបជ្រុង ពណ៌ខៀវ ធុនសេ៥០ ជាមួយឈ្មោះ ហាក់ ហាគីម និងមិត្តភក្ដិពីរម៉ូតូផ្សេងទៀត មានគ្នា៥នាក់ ចេញពីរមណីដ្ឋានភូមិផ្កាត្រកួន ស្ថិតនៅភូមិឫស្សីជ្រោយ ឃុំស្វាយប្រទាល ត្រឡប់មកផ្ទះវិញ ដោយឈ្មោះ ហាក់ ហាគីម ជាអ្នកឌុប ឈ្មោះ សាឃី វ៉ាន់សូត្រ ។
តាមប្រភពដដែលបានបន្តថា លុះពេលជិះម៉ូតូមកដល់ចំណុចកើតហេតុ ភូមិបារ៉ែនលើ ឃុំស្វាយប្រទាល ក៏ស្រាប់តែមានជនសង្ស័យចំនួន២នាក់ (ឈ្មោះ ប៊ុង ម៉េងហុង និងឈ្មោះ ផេង លីហេង) បានជិះម៉ូតូមួយគ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ជិះតាមពីក្រោយ រួចបានយកដំបងឈើមួយប្រវែងប្រហែលជិតមួយម៉ែត្រ វាយទៅលើឈ្មោះ សាឃី វ៉ាន់សូត្រ ចំក្បាលផ្នែកខាងក្រោយ បណ្តាលឲ្យរបួសធ្ងន់ រួចបានជិះម៉ូតូគេចខ្លួនបាត់ ។ ចំណែកជនរងគ្រោះត្រូវបានក្រុមគ្រួសារដឹកយកទៅសង្គ្រោះ នៅឯមន្ទីរពេទ្យ រាជធានីភ្នំពេញ ។
បន្ទាប់ពីក្រុមគ្រួសារជនរងគ្រោះបានពាក្យបណ្ដឹងរួចមក កម្លាំងផ្នែកនគរបាលយុត្តិធម៌ស្រុកសហការជាមួយកម្លាំងប៉ុស្តិរដ្ឋបាលស្វាយប្រទាល បានធ្វើការស្រាវជ្រាវនិងកំណត់មុខសញ្ញាបាន ហើយក៏នាំខ្លួនជនសង្ស័យឈ្មោះ ប៊ុន ម៉េងហុង និងឈ្មោះ ផេង លីហេង មកធ្វើការសាកសួរ ។ នៅចំពោះមុខសមត្ថកិច្ច ជនសង្ស័យទាំងពីរបានឆ្លើយសារភាពថា ខ្លួនពិតជាបានយកដំបងវាយទៅលើជនរងគ្រោះប្រាកដមែន ហើយដំបងដែលពួកខ្លួនយកទៅធ្វើសកម្មភាពនោះ បានបោះចោលនៅក្នុងព្រែកតាឃុត ដែលមានទឹកហូរ ។
បច្ចុប្បន្ន កម្លាំងជំនាញកំពុងកសាងសំណុំរឿងចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ