អាមេរិក ៖ TikTok បាននិយាយកាលពីថ្ងៃសៅរ៍ថា ខ្លួនគ្រោងនឹងទៅតុលាការ ដើម្បីប្រឆាំងនឹងបទបញ្ជារបស់រដ្ឋបាល លោក Trump ដែលព្យាយាមហាមឃាត់កម្មវិធីវីដេអូខ្លីៗមិនឱ្យដំណើរការនៅសហរដ្ឋអាមេរិក លុះត្រាតែក្រុមហ៊ុន…
អាមេរិក ៖ TikTok បាននិយាយកាលពីថ្ងៃសៅរ៍ថា ខ្លួនគ្រោងនឹងទៅតុលាការ ដើម្បីប្រឆាំងនឹងបទបញ្ជារបស់រដ្ឋបាល លោក Trump ដែលព្យាយាមហាមឃាត់កម្មវិធីវីដេអូខ្លីៗមិនឱ្យដំណើរការនៅសហរដ្ឋអាមេរិក លុះត្រាតែក្រុមហ៊ុន ByteDance ដែលជាក្រុមហ៊ុនមេរបស់ TikTok រកឃើញអ្នកទិញ TikTok ជាក្រុមហ៊ុនអាមេរិក។
នៅក្នុងសេចក្តីថ្លែងការណ៍មួយទៅកាន់ទូរទស្សន៍ CNN ថ្នាក់ដឹកនាំ TikTok បានមានប្រសាសន៍ថា ៖ «ដើម្បីធានាថា ច្បាប់មានភាពប្រាកដប្រជា ហើយក្រុមហ៊ុន និងអ្នកប្រើប្រាស់របស់យើង យើងមិនមានជម្រើសអ្វី ក្រៅពីការប្រឆាំងនឹងបទបញ្ជាប្រតិបត្តិតាមរយៈប្រព័ន្ធយុត្តិធម៌នោះទេ នៅក្នុងពេលឆាប់ៗនេះក្នុងសប្តាហ៍ខាងមុខនេះ»។
TikTok បានបន្ថែមទៀតថា ខណៈដែលខ្លួនបានព្យាយាមធ្វើការជាមួយរដ្ឋាភិបាលសហរដ្ឋអាមេរិក ដើម្បីរកដំណោះស្រាយចំពោះបញ្ហាសន្តិសុខជាតិរបស់ខ្លួន។ អ្វីដែលខ្លួនបានជួបប្រទះ គឺកង្វះខាតនីតិវិធីត្រឹមត្រូវ ព្រោះរដ្ឋបាលមិនបានយកចិត្តទុកដាក់លើអង្គហេតុ និងព្យាយាមបញ្ចូលខ្លួនទៅក្នុងការចរចារវាងឯកជនអាជីវកម្ម។
ByteDance បានប្រកាសជាផ្លូវការកាលពីថ្ងៃអាទិត្យថា ខ្លួននឹងប្តឹងរដ្ឋាភិបាលអាមេរិក ដើម្បីប្រឆាំងនឹងបទបញ្ជាប្រតិបត្តិរដ្ឋបាល របស់លោក Trump ។
នៅក្នុងសេចក្តីថ្លែងការណ៍មួយដែលត្រូវបានចេញផ្សាយនៅលើគណនី WeChat ផ្លូវការរបស់ក្រុមហ៊ុនបាននិយាយថា ៖ «ដើម្បីធានាថា ច្បាប់មិនត្រូវបានគេបោះបង់ចោល ហើយដើម្បីធានាថា ក្រុមហ៊ុន និងអ្នកប្រើប្រាស់ត្រូវបានគេគោរពដោយយុត្តិធម៌ យើងនឹងការពារសិទ្ធិ និងផលប្រយោជន៍របស់យើងតាមរយៈការប្តឹង»។
សេតវិមានមិនបានឆ្លើយតបភ្លាមៗចំពោះសំណើរបស់ CNN ក្នុងការសុំធ្វើអត្ថាធិប្បាយទេ។ ក្រសួងយុត្តិធម៌ក៏បានបដិសេធមិនធ្វើអត្ថាធិប្បាយ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ