រាជធានីភ្នំពេញ ៖ សមាជិកក្រុមរាំស្រីរបស់ OMG ស្រីស្អាត តែ ស៊ុនសុដាលីកា បានធ្វើអោយមហាជនអ្នកគាំទ្ររបស់នាងមានការសប្បាយរីករាយយ៉ាងខ្លាំង ក្រោយពីឃើញស្ថានភាពជំងឺរបស់នាងបន្ទាប់ពីការវះកាត់ឆ្អឹងខ្នងមានការល្អប្រសើរកាន់តែខ្លាំងឡើង ។
ក្រោយពីប្រកាសទៅដល់មហាជនអ្នកគាំទ្ររបស់ខ្លួន កាលពីខែឧសភា ឆ្នាំ២០២០កន្លងទៅនេះ ជុំវិញរឿងរ៉ាវនៃការគ្មានវត្តមានរបស់នាងនៅក្នុងសមាជិកក្រុមរាំតទៅទៀត ដោយសារតែត្រូវសម្រាកព្យបាលជំងឺរបស់ខ្លួនពេលនេះស្រីស្អាតរូបនេះមានសុខភាពល្អកាន់តែខ្លាំងជាងមុន រហូតអាចក្រោកឈរថតរូបបាន ។ នេះបើយាងតាមការបង្ហោះរបស់លីកា តាមរយៈបណ្តាញសង្គម Instagram កាលពីពេលថ្មីៗនេះ ។
យ៉ាងណាមិញ បើទោះបីជារូបនាងអាចមានលទ្ធភាពក្រោកឈរ ដើម្បីថតរូបមួយសន្លឹកដែលនាងបានបង្ហោះក៏ដោយ តែស្រីស្អាត លីកា បានប្រាប់អោយមហាជនបានដឹងថា រូបនាងមិនអាចឈរបានយូរនោះទេ រហូតទល់តែមានអ្នកជួយទប់នាងនៅពីក្រោយទើបរូបនាងអាចឈរថតរូបបានដូចដែលមហាជនបានឃើញ ។
គួរបញ្ចាក់ផងដែរថា មកទល់ពេលនេះសុខភាពជំងឺរបស់ស្រីស្អាតសមាជិកក្រុម OMG រូបនេះកាន់តែល្អប្រសើរឡើងជាងមុនក៏ពិតមែន ប៉ុន្តែប្រហែលជាប្រើរយៈពេលជាយូរបន្ថែមទៀត ទើបរូបនាងអាចត្រឡប់មករាំដូចដើមវិញបាន ៕
ចែករំលែកព័តមាននេះ