រាជធានីភ្នំពេញ ៖ តារាចម្រៀងចាស់វស្សាដែលពោរពេញដោយទេពកោសល្យក្នុងវិស័យសិល្បៈចម្រៀង រួមទាំងសមត្ថភាពនៃការតែងនិពន្ធបទចម្រៀងសម័យ និងបុរាណ អ្នកនាង ម៉េង កែវពេជ្ជតា ថ្មីៗនេះបើទោះបីជាជួបប្រទះព្យុះបក់បោកជាច្រើន ទាំងរឿងស្នាដៃសិល្បៈត្រូវគេបំពានផង ទាំងបណ្តឹងបរិហារកេរ្តិ៍នៅសាលាដំបូងរាជធានីភ្នំពេញក្តី តែអ្នកនាងនៅតែបន្តបង្ហាញនូវទឹកដៃសិល្បៈថ្មីស្រឡាងមួយទៀត តាមរយៈការតែងនិពន្ធបទចម្រងថ្មីមួយបទ ដែលមានលក្ខណៈអប់រំដល់យុវវ័យអំពីរបៀបបែបបទនៃការស្លៀកពាក់ឲ្យត្រូវតាមពេលវេលា និងទីអារាម ។
អ្វីដែលកាន់តែគួរឲ្យចាប់អារម្មណ៍មួយកម្រិតទៀតនោះ គឺអ្នកម្តាយកូនពីរដែលនៅតែមានរូបសម្រស់ស្រស់សោភាក្មេងជាងវ័យ បានដឹកដៃកូនស្រីបណ្តូលចិត្តសម្តែងក្នុង MV បទចម្រៀងថ្មីរបស់អ្នកនាងថែមទៀតផង ធ្វើឲ្យមហាជនភ្ញាក់ផ្អើល និងបង្ហាញការគាំទ្រអ្នកនាងដែលបានបង្ហាត់បង្ហាញតម្រង់ផ្លូវកូនបានយ៉ាងល្អក្នុងវិថីសិល្បៈ ។
បន្ថែមពីលើនេះ ទេពកោសល្យសម្តែង និងការលេងទឹកមុខរបស់កូនស្រីពៅរបស់អ្នកនាង ម៉េង កែវពេជ្ជតា គឺនាងតូច ពេជ្ជតា សង្វាពេជ្រ ក៏មិនធម្មតាដែរ គឺពិតជាមានដុងពីកំណើតតែម្តង ជាពិសេសមហាជនអ្នកគាំទ្រតែងតែពោលថា នាងតូចរូបនេះ គឺមាននិស្យ័យ និងទេពកោសល្យខ្ពស់ខាងសិល្បៈ ដូចអ្នកម្តាយរបស់នាង ព្រោះនាងតូចមានសមត្ថភាពទាំងច្រៀង និងកាន់ឧបករណ៍តន្ត្រីបុរាណ សម័យ ដូចជា លេង វីយូឡុង និងទ្រសោ ដែលនេះសបញ្ជាក់ថា នាងគឺជាគ្រាប់ពូជសិល្បៈរបស់ខ្មែរ ហើយនាងតូចក៏ធ្លាប់បានចូលរួមសម្តែងជាមួយម្តាយ និងបងប្រុសរបស់នាងទាំងលើឆាកជាតិ និងអន្តរជាតិផងដែរ ។
យ៉ាងណាមិញ ក្រឡេកទៅមើលស្នាដៃសិល្បៈថ្មីស្រឡាងរបស់អ្នកនាងម៉េង កែវពេជ្ជតា ដែលមានចំណងជើងថា «ទៅវត្តស្លៀកអី» ដែលអ្នកនាងបានដឹកដៃកូនស្រីចូលរួមសម្តែងក្នុងវីដេអូចម្រៀងជាមួយនឹងសិល្បករផ្សេងៗទៀតនោះ គឺបង្កប់អត្ថន័យយ៉ាងជ្រាលជ្រៅជុំវិញវប្បធម៌ និងសិល្បៈនៃការស្លៀកពាក់របស់បុរស ស្ត្រី និងយុវវ័យ ។
ផ្នែកខ្លះនៃប៉ារ៉ូលចម្រៀងរបស់អ្នកនាងម៉េង កែវពេជ្ជតា បានពោលឡើងពិរោះរណ្តំថា «ពួកយើងស្រីៗទៅវត្តស្លៀកអីទើបសម ចូលឆ្នាំ ឬបុណ្យភ្ជុំ កម្លោះក្រមុំគួរតែដឹង ។ ប្រពៃណីខ្មែរមានចែងហូរហែរណាពៅព្រលឹង ដូច្នេះគួរតែដឹង នឹងត្រូវស្លៀកពាក់ឲ្យត្រូវវេលា សំពត់ហូលអាវប៉ាក់ សមជាកុលស្ត្រីនៃខេមរា» ។
អ្វីដែលគួរឲ្យកត់សម្គាល់ គឺអត្ថន័យនៃបទចម្រៀងបានណែនាំដល់មហាជនឲ្យយល់ច្បាស់ថា « ខោរឹប សំពត់ខ្លី នាងអើយខុសក្បួនតម្រា កុំស្លៀកណានាងណាចំពោះព្រះសង្ឃ និងទីអារាម» ក្នុងនោះផងដែរ «អាវខើច.កធំ ក្រមុំនាងក៏ត្រូវហាម កុំឲ្យក្មេងធ្វើតាម នោះខូចសីលធម៌ថ្លាថ្លៃ » របស់ខ្មែរ ។
បើនិយាយពីបទចម្រៀងរបស់អ្នកនាង គឺពិតជាមានខ្លឹមសារអប់រំយ៉ាងល្អ ព្រោះអ្នកនាងបានបញ្ជាក់ក្នុងបទចម្រៀងថា តោងស្លៀកពាក់ឲ្យត្រូវកាល និងពេលវេលា មិនមែនចង់ស្លៀកអីក៏បាននោះទេ បើសិនអ្នកទៅកាន់ទីអារាម សំពះព្រះសង្ឃនោះ ៕
ចែករំលែកព័តមាននេះ