រាជធានីភ្នំពេញ ៖ ក្លិបកម្សាន្ត KTV ដែលជាកន្លែងប្រមូលផ្តុំផឹកស៊ីបំភាន់ភ្នែក ធ្វើជាភោជនីយដ្ឋានចំនួន១០ទីតាំង ដែលលួចបើកអាជីវកម្មក្នុងពេលរាត្រី ស្ថិតនៅក្នុងផ្សារសូរិយាម៉ល ហើយចាក់ឧបករណ៍បំពងសំឡេងរំខាន ត្រូវបានគណៈបញ្ជាការឯកភាពខណ្ឌដូនពេញ កម្លាំងចម្រុះចុះទៅបិទផ្អាកអាជីវកម្ម និងធ្វើការអប់រំ កាលពីវេលាម៉ោង១រំលងអធ្រាត្រចូលថ្ងៃទី១៧ ខែសីហា ឆ្នាំ២០២០ កន្លងមកនេះ ដែលជាថ្ងៃទី១នៃការឈប់សម្រាក ។
តាមអាជ្ញាធរបានឲ្យដឹងថា ដោយអនុវត្តតាមគោលកាណ៍ដឹកនាំ របស់ឯកឧត្តម ឃួង ស្រេង អភិបាលរាជធានីភ្នំពេញ ទើបនៅរាត្រីថ្ងៃទី១៧ ខែសីហា កម្លាំងចម្រុះខណ្ឌដូនពេញដឹកនាំដោយ លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានដឹកនាំក្រុមការងារចម្រុះធ្វើការចុះត្រួតពិនិត្យទីតាំងខារ៉ាអូខេ (KTV) ក្លិបឌីស្កូ នៅក្នុងភូមិសាស្ត្រខណ្ឌដូនពេញរួមមាន ភោជនីយដ្ឋានយីហោហេភីណេស ស្ថិតនៅសង្កាត់បឹងរាំង បានកែប្រែពីខារ៉ាអូខេ ទៅបើកអាជីវកម្មភោជនីយដ្ឋានវិញ បានសម្រេចបិទអាជីវកម្មភោជនីយដ្ឋានចំនួន១០ទីតាំង ជាក្លិបឌីស្កូ ស្ថិតនៅក្នុងផ្សារសូរិយាម៉ល សង្កាត់ផ្សារថ្មីទី៣ ខណ្ឌដូនពេញ ។
ក្រុមការងារបានធ្វើកំណត់ហេតុផ្អាកអាជីកម្មជាបណ្តោះអាសន្ន និងដកហូតឧបករណ៍សម្រាប់ចាក់បំពងសំឡេង ព្រមទាំងបានធ្វើការឃាត់ម្ចាស់ទីតាំងយកទៅធ្វើកិច្ចសន្យាអប់រំណែនាំបន្តនៅអធិការដ្ឋាននគរបាលខណ្ឌដូនពេញ ។
អាជ្ញាធរបន្តទៀតថា ប្រតិបត្តិការខាងលើ ក្នុងហេតុផល៖
១-មិនអនុវត្តតាមការណែនាំរបស់ក្រសួងសុខាភិបាលពីការបង្ការ និងទប់ស្កាត់ជំងឺកូវីដ១៩ ដោយមិនរក្សាគម្លាតសង្គម១,៥ម៉ែត្រ ទៅ២.០០ម៉ែត្រ ។
២-ចាក់សំឡេងឮខ្លាំងៗ បង្កឱ្យបាត់បង់សណ្តាប់ធ្នាប់ និងប៉ះពាល់ដល់ការស្នាក់នៅរបស់ប្រជាពលរដ្ឋនៅពេលយប់ ។
៣-មិនគោរពតាមកាណែនាំ និងកិច្ចសន្យារបស់អាជ្ញាធរខណ្ឌចំនួន៣លើក និងបង្កឱ្យកកស្ទះចរាចរណ៍ ជាប្រចាំនៅបណ្តោយផ្លូវលេខ៥១ (ការឈប់ចតគ្មានសណ្តាប់ធ្នាប់)។
ការងារអនុវត្តគោលការសុវត្តិភាពរបស់អាជ្ញាធរខណ្ឌដូនពេញ ប្រតិបត្តិការតែមួយយប់ បិទបាន១០ទីតាំងជាបណ្តោះអាសន្ន ក្នុងភូមិសាស្ត្រដើម្បីធ្វើការអប់រំ ៕
ចែករំលែកព័តមាននេះ