រាជធានីភ្នំពេញ ៖ បុរសម្នាក់ស្រវឹងធ្លាក់ភ្នែកបើករថយន្តឡិចស៊ីសRX350 ក្នុងល្បឿនលឿនបានបុកបង្គោលដែក ដែលដាក់ហាមមិនឲ្យរថយន្តបើកឆ្លងកាត់ផ្សាររាត្រីទីក្រុងកោះពេជ្រ ហើយមិនព្រមឈប់ទេ បានព្យាយាមបើករត់គេចទៅបុករនាំងដែករបស់សន្តិសុខទីក្រុងកោះពេជ្រ ដែលដាក់បាំងតាមដងផ្លូវខ្ទាតរាយប៉ាយរងការខូចខាត ។
ចំណែករថយន្តនោះក៏នៅតែបន្តបើករត់គេច រហូតជ្រុលទៅបុកទម្លុះខឿនដែលគេរៀបលម្អបាំងតាមមាត់ច្រាំងទន្លេ បណ្តាលឲ្យរថយន្តហោះផ្លោងចូលទៅក្នុងទឹកទន្លេ ត្រង់ចំណុចក្បែរស្ពានឥន្ទធនូក្នុងទីក្រុងកោះពេជ្រដដែល កាលពីវេលាម៉ោង១១និង៥០នាទីយប់ថ្ងៃទី២១ ខែសីហា ឆ្នាំ២០២០ ។
តាមប្រភពព័ត៌មានពីកន្លែងកើតហេតុបានឲ្យដឹងថានៅពេលកើតហេតុ ខណៈពេលកម្លាំងសន្តិសុខទីក្រុងកោះពេជ្រដល់វេលាដែលត្រូវធ្វើការបិទច្រក ផ្អាកឈប់ឲ្យចេញ-ចូលទៅលេងកម្សាន្តនៅក្នុងបរិវេណទីក្រុងកោះពេជ្រទៅហើយ ។ គេឃើញបុរសម្នាក់បើកបររថយន្តមួយគ្រឿងម៉ាកឡិចស៊ីស RX350 ពណ៌ស ពាក់ផ្លាកលេខ ភ្នំពេញ2AF-9666 ក្នុងស្ថានភាពស្រវឹងជោកតាមបណ្តោយផ្លូវវរជន ទិសដៅពីជើងទៅត្បូង និងក្នុងល្បឿនយ៉ាងលឿន ព្រោះអាងយប់ស្ងាត់ ។
លុះមកដល់ចំណុចកើតហេតុដែលជាផ្លូវតម្រូវឲ្យបត់ឆ្វេងស្របតាមមាត់ទន្លេ ពេលនោះស្រាប់តែរថយន្តខាងលើខ្វះការប្រុងប្រយ័ត្ន ដោយបើកបរសំដៅឆ្ពោះទៅត្រង់ ។ រួចក៏ជ្រុលទៅបុកទម្លុះខឿនថ្មដែលគេរៀបលម្អបាំងមាត់ទន្លេ បណ្តាលឲ្យបែកបាក់ខ្ទាតរាយប៉ាយរងការខូចខាតអស់ទំហំប្រវែងប្រមាណប្រាំម៉ែត្រ ។ រីឯរថយន្តក៏បានជ្រុលធ្លាក់ចូលទៅក្នុងទឹកទន្លេរងការខូចខាតយ៉ាងដំណំ ។ តែមិនបង្កឲ្យមាននរណាម្នាក់រងរបួសនោះទេ ។
ក្រោយមក ក៏មានកម្លាំងសន្តិសុខដែលយាមនៅក្នុងទីក្រុងកោះពេជ្របានមកដល់ និងបានបញ្ជាក់ថា រថយន្តបង្កនេះគឺបានព្យាយាមបើករត់គេចពីពួកគាត់ដែលជិះម៉ូតូដេញតាមពីក្រោយ ។ នៅមុនពេលកើតហេតុ រថយន្តនោះបានបើកទៅបុកបង្គោលដែកដែលដាក់បាំងហាមមិនរថយន្តបើកឆ្លងកាត់ នៅត្រង់ចំណុចច្រកចូលផ្សាររាត្រីទីក្រុងកោះពេជ្រ បណ្តាលឲ្យខូចខាតមួយបង្គោល ។
បន្ទាប់មកពួកគាត់ក៏បម្រុងហៅម្ចាស់រថយន្តឲ្យចុះមកដោះស្រាយគ្នា ប៉ុន្តែពេលនោះរថយន្តបង្កបែរជាព្យាយាមបើករត់គេចខ្លួន ភ្លាមនោះពួកគាត់ក៏បានជិះម៉ូតូដេញតាមពីក្រោយ។ ពេលដែលបើករត់គេចខ្លួនរថយន្តនោះបានរេចង្កូតទៅបុកនឹងរនាំងដែកដែលសម្រាប់ដាក់បិទផ្លូវបណ្ដាលឲ្យខូចខាតបន្តិច បន្តួច ។ ចំណែករថយន្តនៅតែបន្តបើករត់គេចទៅមុខជាបន្តទៀត រហូតជ្រុលទៅបុកធ្លាក់ចូលទឹកទន្លេតែម្ដង ។ ចំណែកអ្នកបើកបរគេឃើញបើកទ្វាររថយន្តចេញដើរយ៉ាងទ្រេតទ្រោត ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកអន្តរាគមន៍និងរាយការណ៍ទៅសមត្ថកិច្ចជំនាញឲ្យមកធ្វើការវាស់វែងនិងស្ទូចយករថយន្តបង្ករួមទាំងអ្នកបើកបរទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីរង់ចាំធ្វើការដោះស្រាយទៅតាមផ្លូវច្បាប់ជាបន្តទៀតនៅពេលក្រោយ ៕
ចែករំលែកព័តមាននេះ