ខេត្តព្រះសីហនុ ៖ លោក តាំង សុចិត្រគ្រឹស្នា ប្រធានមន្ទីទេសចរណ៍ខេត្តព្រះសីហនុ បានឲ្យដឹងថា ក្នងឱកាសឈប់សម្រាកសងថ្ងៃបុណ្យចូលឆ្នាំប្រពៃណីជាតិខ្មែរក្នុងរយៈពេល០៥ថ្ងៃ (១៧-២១ ខែសីហា…
ខេត្តព្រះសីហនុ ៖ លោក តាំង សុចិត្រគ្រឹស្នា ប្រធានមន្ទីទេសចរណ៍ខេត្តព្រះសីហនុ បានឲ្យដឹងថា ក្នងឱកាសឈប់សម្រាកសងថ្ងៃបុណ្យចូលឆ្នាំប្រពៃណីជាតិខ្មែរក្នុងរយៈពេល០៥ថ្ងៃ (១៧-២១ ខែសីហា ឆ្នាំ២០២០) ភ្ញៀវទេសចរទៅលេងកម្សាន្តនៅខេត្តព្រះសីហនុ មានសរុបប្រមាណ ១១៦,៥២៩នាក់ ក្នុងនោះភ្ញៀវជាតិប្រមាណ ១១១,៦៥១នាក់ ស្មើនឹង៩៥,៤៤% ភ្ញៀវអន្តរជាតិប្រមាណ៤,៨៧៨នាក់ ស្មើនឹង៤,៣៦%។
លោកបន្តថា ភ្ញៀវទេសចរចូលតាមព្រលានយន្តហោះ០៣ជើង មានភ្ញៀវសរុប ២៩១នាក់ជាភ្ញៀវអន្តរជាតិភាគច្រើនចិន។ លោក តាំង សុចិត្រគ្រឹស្នា បានឲ្យដឹងទៀតថា ភ្ញៀវទេសចរកម្សាន្ដតាមបណ្តាកោះនានាសរុបប្រមាណ ៣,៧៥២នាក់ ក្នុងនោះភ្ញៀវជាតិប្រមាណ ២,៧១០នាក់ ស្មើនឹង៧២,២៣% ភ្ញៀវអន្តរជាតិប្រមាណនាក់ ១,០៤២ស្មើនឹង២៧,៧៧%។ ភ្ញៀវកម្សាន្តតាមរណីយដ្ឋាននានាក្នុងខេត្តមានភ្ញៀវ សរុប២២,១៤៦នាក់ ក្នុងនោះភ្ញៀវជាតិ ២១,០៧៣នាក់ ស្មើនឹង៩៥,១៥% ភ្ញៀវអន្តរជាតិ ១,០៧៣នាក់ ស្មើនឹង៤,៨៥%។
ចំណែកឯភ្ញៀវកម្សាន្ត តាមបណ្តាឆ្នេរនានាសរុប៨៨,៧១០នាក់ ក្នុងនោះភ្ញៀវជាតិ ៨៦,៩២៧នាក់ ស្មើនឹង៩៧,៩៩% ភ្ញៀវអន្តរជាតិ ១,៧៨៣នាក់ ស្មើនឹង២,០១%។ ចំពោះការគ្រប់គ្រង និងការអនុវត្តវិធានសុវត្ថិភាពទេសចរណ៍ មុនពេលឈប់សម្រាកមន្ទីរបានសហការជាមួយរដ្ឋបាលខេត្ត ប្រជុំផ្សព្វផ្សាយវិធានការសុវត្ថិភាពទេសចរណ៍ទាំង៦ ការដាក់តម្លៃជូនភ្ញៀវ ការពង្រឹងគុណភាពសេវាកម្ម សណ្តាប់ធ្នាប់ បរិស្ថានអនាម័យដល់ម្ចាស់មូលដ្ឋានអាជីវកម្មទេសចរណ៍ដែលមានអ្នកចូលរួម៨២នាក់ អាជីវករ៥៦នាក់។
មន្ត្រីមន្ទីរបានចុះចែកសេចក្ដីណែនាំការពង្រឹងគុណភាពសេវាកម្ម, អនាម័យ និងការដាក់តម្លៃសេវាជូនភ្ញៀវ។ លោកបន្តថា មន្ទីទេសចរណ៍បានចុះត្រួតពិនិត្យណែនាំ និងជំរុញឲ្យភ្ញៀវទេសចរក៏ដូចជាម្ចាស់មូលដ្ឋានអាជីវកម្ម ទេសចរណ៍រួមទាំងភ្ញៀវនៅតាមឆ្នេរ ឲ្យចូលរួមអនុវត្តវិធានសុវត្ថិភាពទេសចរណ៍ទាំង៦ ដែលក្រសួងទេសចរណ៍បានដាក់ចុះក្នុងការទប់ ស្កាត់ការឆ្លងរីករាលដាលជំងឺកូវីដ-១៩ និងបានសហការជាមួយនគរបាលទេសចរណ៍ និងនគរបាលជើងទឹកក្នុងការត្រួតពិនិត្យវិធានសុវត្ថិភាពទេសចរណ៍ និងពោងដល់ភ្ញៀវទៅកម្សាន្ត នៅកោះនានា។ រីឯស្ថានភាពទូទៅ ជាពិសេសបញ្ហាសន្តិសុខ និងសុវត្ថិភាពភ្ញៀវមានលក្ខណៈល្អប្រសើរ មានករណីបាត់ក្មេង៤នាក់ ស្រី២នាក់ សមត្ថកិច្ចបានរកឃើញ និងប្រគល់ជូនឪពុកម្តាយវិញ។
ប្រជាពលរដ្ឋ និងភ្ញៀវទេសចរមានភាពសប្បាយរីករាយដែលសេវាស្នាក់នៅ និងម្ហូបអាហារ មានតម្លៃសមរម្យមិនដំឡើងថ្លៃហួសហេតុពេក ,មានឆ្នេរសាធារណៈស្អាត ទូលាយអាចសម្រាក កម្សាន្តព្រមទាំងមានបន្ទប់ទឹកសាធារណៈនៅតាមឆ្នេរ និងតំបន់កម្សាន្តមួយចំនួនដោយមិនមានការ បង់ថ្លៃសេវា, ដោយឡែកអាជីវកម្មជួលពោងតាមឆ្នេរមួយចំនួន ដំឡើងថ្លៃខ្ពស់ មន្ទីរទេសចរណ៍ បានចុះធ្វើការណែនាំនិងបព្ឈប់ការធ្វើសេវាកម្ម។
ចំពោះបញ្ហាប្រឈមវិញ លោកប្រធានមន្ទីរទេសចរណ៍ ខេត្តព្រះសីហនុ បានអះអាងថា ភ្ញៀវទេសចរភាគច្រើនមិនសូវយកចិត្តទុកដាក់ប្រើប្រាស់ម៉ាស់ និង រក្សាគម្លាតឲ្យបានត្រឹមត្រូវ។ អាជីវកម្មមួយចំនួនមិនបានយកចិត្តទុកដាក់អនុវត្តវិធាន សុវត្ថិភាពទេសចរណ៍ទាំង៦ ដែលក្រសួងទេសចរណ៍បានដាក់ចុះក្នុងការទប់ ស្កាត់ការឆ្លងរីករាលដាល ជំងឺកូវីដ-១៩ ការចូលរួមទុកដាក់សំរាម និងសម្អាតបរិស្ថានអនាម័យនៅពុំទាន់បានល្អប្រសើរនៅឡើយ៕ ដោយ ៖ ចន ណារិទ្ធ
ចែករំលែកព័តមាននេះ