ខេត្តកំពង់ស្ពឺ ៖ ចំណាយពេលវេលាសឹងតែកន្លះជីវិតនឹងអាជីវកម្មភ្ញាស់កូនត្រី បន្ទាប់ពីបានខាតបង់ ម្តងរួចហើយ តែមិនរាថយនៅតែបន្តអនុវត្ត និងរៀនបន្ថែមពីបច្ចេកទេសនានារហូតបានទៅរៀន ពីក្រៅប្រទេសផងដែរ។ ក្នុងវ័យ៦៦ឆ្នាំ លោក កែន ហេង បានចាប់អាជីព និងបានចំណាយពេលជាច្រើន ឆ្នាំក្នុងការបើកសិដ្ឋានភ្ញាស់កូនត្រីទាំងនោះ។ កាលដំបូងនៃអាជីវកម្មនេះលោក មានត្រឹមតែស្រះភ្ញាស់ កូនត្រីត្រឹមតែ៤ស្រះប៉ុណ្ណោះ ប៉ុន្តែបច្ចុប្បន្នលោកមានស្រះទឹកដល់ទៅ២០ស្រះឯនោះ និងមានពូជកូនត្រីប្រហែលជា៥ប្រភេទ ដើម្បីធ្វើការបង្កាត់ពូជ និងភ្ញាស់។
កូនត្រីដែលលោកភ្ញាស់ហើយ លោកលក់កូន១ក្បាល តម្លៃត្រឹមតែ១០០រៀល ហើយលោកបានណែរនាំពីវិធីចិញ្ចឹមផងដែរ។ បច្ចុប្បន្ន ក្នុងអំឡុងកូវីដ-១៩ ចាប់តាំងពីខែឧសភាមក លោកលក់បានជាមធ្យម៥ពាន់ទៅ៦ពាន់ក្បាលក្នុងមួយថ្ងៃ ដោយចំនួននេះប្រៀបធៀបនឹងឆ្នាំមុនៗគឺការលក់បានច្រើនជាងឆ្ងាយ។ លោកពូបានបន្តថា ក៏ព្រោះគេ មិនដឹងជាទៅណា និងរកអ្វីក្នុងអំឡុងពេលនេះ ដូច្នេះគេនាំគ្នាចិញ្ចឹមត្រី និងដាំដំណាំផ្សេងក្នុង ចម្ការគេទៅ អ្នកខ្លះចិញ្ចឹមជាលក្ខណៈគ្រួសារក៏មាន។ លោក កែន ហេង បានមានប្រសាសន៍ បញ្ជាក់យ៉ាងដូច្នេះថា «កាលពីមុន មួយថ្ងៃខ្ញុំលក់បាន២០ម៉ឺនរៀលក្នុងមួយថ្ងៃ ប៉ុន្តែបច្ចុប្បន្នខ្ញុំអាច លក់បានពី៤០ម៉ឺនទៅ៥០ម៉ឺនរៀលក្នុងមួយថ្ងៃ»។
លោកបានបន្តថា ទម្រាំលោកទទួលបានជោគជ័យ ដូចពេលនេះគឺលោកបានដួលជាច្រើនដង។ លោកបានថ្លែងឲ្យដឹងអំពីការបរាជ័យមុនៗថា «ខ្ញុំបានបរាជ័យម្តង កាលពីឆ្នាំ១៩៩៧ ក្នុងការប្រកបអាជីវកម្មនេះ ដោយខ្ញុំចិញ្ចឹមដាក់បូកឡូក ចូលជាមួយត្រីធំៗ (ត្រីផ្ទក់) ដូចនេះត្រីធំៗស៊ីកូនតូចៗ និងពងត្រីផ្សេងៗអស់។ ពេលនោះខ្ញុំខាតបង់ ១០០ដុល្លារអាមេរិក ដែលជាដើមទុនដែលខ្ញុំបានទិញកូនពូជត្រីយកមកចិញ្ចឹម ដោយកូនត្រីទាំងនោះ មានចំនួន ៤០០០ក្បាល»។
បើទោះបីជាខាតបង់ក៏ដោយ ប៉ុន្តែម្ចាស់កសិដ្ឋានមួយនេះមិនបោះបង់ទេ ដូចនេះលោកបានព្យាយាមរកមធ្យោបាយថ្មី មិនយូរប៉ុន្មាន លោកបានការណែនាំ និងបង្ហាត់បង្រៀនពី ក្រុមការងារជលផល និងបានបន្តទិញកូនត្រី ដើម្បីចិញ្ចឹមម្តងទៀត ក្នុងឆ្នាំ១៩៩៨ ក្នុងចំនួនកូនត្រីដដែល។ ចាប់ពីពេលនោះលោកមានបទពិសោធន៍ ហើយក៏មិនមានបញ្ហាអ្វីកើតឡើង បន្តទៀតទេ។ ហើយក្នុងឆ្នាំ២០០០ លោកត្រូវបានបន្តណែនាំឱ្យរៀនបង្កាត់ពូជត្រី និងភ្ញាស់ផងដែរ លោកត្រូវបានលើកទឹកចិត្តឱ្យទៅរៀននៅប្រទេសផ្សេងទៀត។
ដូចនេះក្នុងឆ្នាំ២០០៤ លោកបានទៅរៀន នៅក្នុងប្រទេសថៃ និងបន្តទៅរៀននៅក្នុងប្រទេសឥណ្ឌូនេស៊ីផងដែរ។ បច្ចុប្បន្ន លោកលក់តែកូនត្រីដែល លោកបានបង្កាត់នោះទេ ពូជត្រីខ្លះយកមកពីក្រៅប្រទេស ហើយយកមកបង្កាត់ជាមួយពូជក្នុងស្រុក។ លោកបានបន្ថែមថា កូនត្រីដែលបង្កាត់ហើយនិងភ្ញាស់ ទម្រាំបានលក់ទាល់តែមានអាយុ ពីរខែឡើងទៅទើបលោកលក់ឱ្យអតិថិជន និងត្រីដែលវាធំអស់ និងអាចលក់បានត្រូវចិញ្ចឹម យ៉ាងតិចណាស់ក៏៥ខែឡើងទៅទើបអាចលក់បាន។ អតិថិជនរបស់លោក ភាគច្រើនមកពីបណ្តាខេត្តជិតៗ ដូចជាតាកែវ កំពង់ឆ្នាំ កំពង់ស្ពឺ និងកំពតជាដើម៕ ដោយ ៖ ស្រី គំនិត
ចែករំលែកព័តមាននេះ