រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាប្តីម្នាក់បានវាយប្រពន្ធ២ទៅ៣ដៃ រួចយកកាបូបលុយរបស់ប្រពន្ធទៅបាត់ ដោយក្នុងកាបូបនោះមានលុយ6ទៅ7រយដុល្លារ និងឯកសារផ្សេងៗជាច្រើនទៀត បង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋានចុះមកអន្តរាគមន៍ កាលពីម៉ោង2រំលងអធ្រាត្រឈានចូលថ្ងៃទី20 ខែសីហា ឆ្នាំ2020 តាមបណ្តោយផ្លូវ2002 ស្ថិតនៅក្នុងសង្កាត់អូរបែកក្អម ខណ្ឌសែនសុខ ។
ជនរងគ្រោះសូមមិនបញ្ចេញឈ្មោះបានឱ្យដឹងថា មុនពេលកើតហេតុនេះ គឺប្តីគាត់មានឈ្មោះអឹម សុគន្ធ បានរស់នៅជាមួយគ្នារយៈពេល4ឆ្នាំមកហើយ ប៉ុន្តែមិនទាន់នឹងបានរៀបការជាមួយគ្នានោះទេ គ្រាន់តែបានសែនឱ្យចាស់ទុំដឹងឮតែប៉ុណ្ណោះ និងមិនមានចំណងដៃកូនចៅនោះឡើយ។
ជនរងគ្រោះបន្តថា ជារៀងរាល់ថ្ងៃនេះ គាត់គ្រាំគ្រាចិត្តខ្លាំងណាស់ ព្រោះតែប្តីចេះតែរករឿងប្រច័ណ្ឌជាមួយនឹងប្រុសៗ រួមនឹងមិត្តភក្តិស្រីៗ ហើយតែងតែប្រើអំពើហិង្សាជាច្រើនដងមកលើរូបគាត់ ។ លុះនៅថ្ងៃកើតហេតុ គាត់មកលេងហាងបងស្រីនៅឯផ្លូវ2002 ស្រាប់តែប្តីគាត់បើករថយន្តមួយគ្រឿងមករករឿង និងវាយរូបគាត់ចំនួន2ទៅ3ដៃចំក្បាល ហើយក៏លួចយកកាបូបលុយរបស់គាត់ដែលមានលុយ6ទៅ7រយដុល្លារ និងឯកសារដែលមានតម្លៃមួយចំនួន រួមនឹងអត្តសញ្ញាប័ណ្ណទៅបាត់ទៀត ក៏បង្កឱ្យផ្អើលទៅមុខភោជនីយដ្ឋានតែម្តរង ហើយក៏មានសមត្ថកិច្ចមូលដ្ឋានចុះមកជួយអន្តរាគមន៍ តែបុរសជាប្តីបានបើករថយន្តរត់គេចខ្លួនបាត់ស្រមោលទៅហើយ ។
ក្រោយពេលកើតហេតុខាងលើនេះ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលអូរបែកក្អម ដើម្បីរកយុត្តិធម៌ឱ្យរូបគាត់ផង ៕
ចែករំលែកព័តមាននេះ