សិង្ហបូរី៖ ចំណង់ចំណូលចិត្តរបស់មនុស្សម្នាក់ៗគឺមិនដូចគ្នាទេ ខ្លះចូលចិត្តចិញ្ចឹមឆ្មា ឬសុនខ ឬក៏ទន្សាយ ហើយខ្លះឈានដល់ចិញ្ចឹមកូនខ្លា ជាសត្វចិញ្ចឹមនៅជាមួយគ្នាក្នុងផ្ទះ ។ ក៏ប៉ុន្តែនេះជាករណីមួយដ៏ចម្លែក និងមានតែមួយ…
សិង្ហបូរី៖ ចំណង់ចំណូលចិត្តរបស់មនុស្សម្នាក់ៗគឺមិនដូចគ្នាទេ ខ្លះចូលចិត្តចិញ្ចឹមឆ្មា ឬសុនខ ឬក៏ទន្សាយ ហើយខ្លះឈានដល់ចិញ្ចឹមកូនខ្លា ជាសត្វចិញ្ចឹមនៅជាមួយគ្នាក្នុងផ្ទះ ។ ក៏ប៉ុន្តែនេះជាករណីមួយដ៏ចម្លែក និងមានតែមួយ នោះគឺបុរសមួយរូបបានស្រលាញ់ និងចិញ្ចឹមស្រមោចជាសត្វចិញ្ចឹម ហើយជាងនេះទៅទៀតបុរសរូបនេះឈានដល់បើកហាងលក់ស្រមោចទៀតផង ។
អ្នកខ្លះចាត់ទុកស្រមោចត្រឹមជាសត្វល្អិតដ៏គួរឲ្យរំខាន ក៏ប៉ុន្តែបុរសវ័យក្មេងមួយរូប បែរជាចាត់ទុកស្រមោចជាសត្វចិញ្ចឹមដូចជាឆ្មា ឬសុនខ ផងដែរ រហូតលោកបានបើកហាងលក់ស្រមោចជាសត្វចិញ្ចឹមនៅតំបន់ Yishun នៃប្រទេសសិង្ហបូរី ។
លោក ចន (John) បុរសដែលស្រលាញ់ស្រមោចរហូតបើកហាងលក់ស្រមោចជាសត្វចិញ្ចឹមនោះបាននិយាយថា មនុស្សជាច្រើនរួមទាំងសាច់ញាតិ មិត្តភ័ក្ត្រ និងអ្នកដែលស្គាល់លោក ក៏ដូចជាមនុស្សទូទៅដែលបានលឺថា លោកនឹងបើកហាងលក់ស្រមោចនោះ បានបង្ហាញនូវការភ្ញាក់ផ្អើល និងបង្ហាញប្រតិកម្មរបស់ពួកគេផ្សេងៗពីគ្នា ខ្លះថាលោកលេងសើចទេដឹង ខណៈខ្លះទៀតក៏លាន់មាត់ថា «ពិតមែនដែលចង់បើកហាងលក់ស្រមោច» ខ្លះទៀតក៏លាន់មាត់ថា «ឆ្កួតទេដឹង»។
លោកបានរៀបរាប់ថាដំបូងឡើយ លោកគ្រាន់តែមានចំណង់ចំណូលចិត្តជាមួយនឹងស្រមោច តែក្រោយពីលោកបានរៀនសូត្រអំពីដំណើរជីវិតរបស់ស្រមោច វាបានធ្វើឲ្យលោកកាន់តែច្បាស់ក្នុងចិត្តថា លោកចូលចិត្តស្រមោច ហើយក៏មានគំនិតថា នៅសិង្ហបូរី គឺពុំទាន់មានហាងលក់ស្រមោចជាសត្វចិញ្ចឹមនោះទេ ដូច្នេះលោកយល់ឃើញថា វាជាឱកាសបើកមុខរបរមួយនេះ ជាពិសេសដើម្បីឲ្យគ្រប់គ្នាបានជ្រាបអំពីអ្វីដែលពួកគេគួរយល់ដឹងអំពីស្រមោចថា ជាសត្វចិញ្ចឹមគួរឲ្យស្រលាញ់ ។
លោកបានបន្តថា ដំបូងឡើយ លោកសាកល្បងត្រឹមចិញ្ចឹមស្រមោចតែមួយសំបុកសិនប្រមាណជាងមួយឆ្នាំកន្លះ ហើយរហូតមកដល់ពេលនេះនៅក្នុងហាងរបស់លោក គឺមានពូជស្រមោចរហូតដល់ទៅ ៣៥ ប្រភេទ ។
លោកចន បានបញ្ជាក់ថា ប្រាកដណាស់មិនមែនគ្រប់គ្នាសុទ្ធតែមានទស្សនៈបើកចំហរទទួលយកនូវចំណង់ចំណូលចិត្តប្លែកបែបនេះទេ ព្រោះបងប្អូនខ្លះមានទសន្សៈថា ស្រមោចជាសត្វល្អិតគួរឲ្យខ្ពើមរអើម ។ តែចំពោះលោកចន បាននិយាយបន្ថែមថា លោកចង់ឲ្យមនុស្សមានផ្នត់គំនិតផ្សេងពីនេះពាក់ព័ន្ធនឹងស្រមោច ទើបលោកបើកហាងស្រមោចដើម្បីអប់រំ និងបញ្ជ្រាបការយល់ដឹងអំពីជីវិតរបស់ស្រមោចថា ជាសត្វដ៏អស្ចារ្យយ៉ាងណា ។
សូមរម្លឹកថា កន្លងមក លោកបណ្ឌិតអេដវ៉ដអូ វីលសុន សាស្ត្រាចារ្យសត្តសាស្ត្រដ៏ល្បីល្បាញនៅមហាវិទ្យាល័យហាវ៉ដ សហរដ្ឋអាមេរិក ដែលបានចំណាយពេលស្រាវជ្រាវពីស្រមោចអស់រយៈពេល៥០ឆ្នាំ នៅពាសពេញពិភពលោក បានចាត់ទុក «ស្រមោចជាសត្វល្អិតប្រកបដោយអារ្យធម៌» ។ លោកសាស្ត្រាចារ្យវីលសុនបានឱ្យដឹងថា សត្វស្រមោចចេះចាត់តាំង «សហការពលកម្ម» ល្អបំផុតដែលគេអាចនិយាយបានថា «ប្រកបដោយអារ្យធម៌» និង «សាមគ្គីភាព» ដាច់ឆ្ងាយពីឃ្មុំ ឬកណ្តៀរ ព្រមទាំងស្មោះត្រង់បំផុតរវាងគ្នានឹងគ្នា ។ ក្នុងភាសាជប៉ុនពាក្យ «ស្រមោច» មានន័យ «សត្វល្អិត» ផង «ស្មោះត្រង់» ផង ។
តាមការស្រាវជ្រាវរបស់លោកសាស្ត្រាចារ្យវីលសុន លើពិភពលោកមានស្រមោច១២.០០០ប្រភេទខុសគ្នា តែមានលក្ខណៈពិសេសរួមដូចគ្នាគឺ «សហការ» និង«សាមគ្គី» ។ សត្វស្រមោចមាននៅគ្រប់ទីកន្លែងលើពិភពលោក វៀរលែងតែនៅប៉ូលខាងជើង និងខាងត្បូង ព្រមទាំងកំពូលភ្នំខ្ពស់ ដែលគ្របដណ្តប់ដោយទឹកកក ៕ ដកស្រង់ចេញពីវេបសាយ ៖ channelnewsasia
ចែករំលែកព័តមាននេះ