ប្រទេសអាហ្វ្រិកខាងត្បូង ៖ យោងតាមឯកសារនានារបស់គាត់ថា លោកតា FREDIE BLOMកើតក្នុងឆ្នាំ១៩០៤ នៅអាហ្វ្រិកខាងត្បូង។ គាត់បានទទួលមរណភាពហើយ កាលពីថ្ងៃទី២២ខែសីហា ឆ្នាំ២០២០…
ប្រទេសអាហ្វ្រិកខាងត្បូង ៖ យោងតាមឯកសារនានារបស់គាត់ថា លោកតា FREDIE BLOMកើតក្នុងឆ្នាំ១៩០៤ នៅអាហ្វ្រិកខាងត្បូង។ គាត់បានទទួលមរណភាពហើយ កាលពីថ្ងៃទី២២ខែសីហា ឆ្នាំ២០២០ ដោយជរាទុំជ្រុះក្នុងទីក្រុងកាប។
លោកតា FREDIE BLOM ដែលចាត់ទុកថា ជាមនុស្សមានវ័យចំណាស់ជាងគេបំផុតនៃមនុស្សជាតិ បានទទួលមរណភាពហើយក្នុងជន្មាយុ១១៦ឆ្នាំ នៅទីក្រុងកាប អាហ្វ្រិកខាងត្បូង។ តាមBBC ថា គាត់បានទទួលមរណភាពដោយធម្មជាតិ។ កាលពី២សប្ដាហ៍មុនតាមសាច់ញាតិរបស់គាត់ថា លោកតានៅអាចកាប់ឈើបាននៅឡើយ។ គាត់នៅមានកម្លាំងខ្លាំងក្លា និងពោរពេញដោយមោទនភាព។
យោងតាមបណ្ដាឯកសារផ្លូវការថា លោកតា FREDIE BLOM កើតក្នុងឆ្នាំ១៩០៤នៅADELAIDE ខេត្តកាបខាងកើត។ ពេលគាត់មានវ័យជំទង់ គាត់បានបាត់បង់សមាជិកគ្រួសារទាំងអស់ ដោយសារជំងឺគ្រុនផ្ដាសាយអេស្ប៉ាញ ឆ្នាំ១៩១៨។ ក្នុងជីវិតគាត់ជាអ្នកបានឆ្លងកាត់សង្គ្រាមលោក២ និងរបបអាប៉ាថេតផងដែរ។
ពេលសួរគាត់កាលពីឆ្នាំ២០១៨ ពីអាយុវែងរបស់គាត់ គាត់បានពន្យល់ថា គាត់គ្មានអាថ៌កំបាំងអ្វីទេពីអាយុវែងរបស់គាត់។ ក្នុងឆាកជីវិត គាត់ធ្វើការក្នុងកសិដ្ឋានមួយ បន្ទាប់មកចូលធ្វើការក្នុងរោងចក្រមួយ មុនពេលចូលនិវត្តិន៍ពេលគាត់មានអាយុ៨៦ឆ្នាំ។ ទោះជាគាត់ជាមនុស្សមានអាយុវែងជាងគេបែបនេះក្ដី តែមិនត្រូវបានបញ្ចូលក្នុងសៀវភៅ GUINESS BOOK ឡើយ។
កាលពីខែមីនាកន្លងទៅនេះ លោកតាអង់គ្លេស BOB WEIGHION អាយុ១១២ឆ្នាំ ជាមនុស្សមានអាយុវែងជាងគេបំផុត នៃមនុស្សជាតិតែគាត់បានទទួលមរណភាព កាលពីថ្ងៃទី២៨ ឧសភា ដោយជំងឺមហារីក៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ