ខេត្តសៀមរាប ៖ មានករណីក្មេងប្រុសម្នាក់ និងក្មេងស្រីម្នាក់ត្រូវជាបងប្អូនជីដូនមួយនឹងគ្នា បានលង់ទឹកស្រះ បណ្តាលឱ្យបាត់បង់ជីវិតទាំង២នាក់ ខណៈក្មេងរងគ្រោះទាំង២នាក់ទៅរកជីកក្តាមនៅវាលស្រែក្រោយផ្ទះ ជាមួយឪពុក និងត្រូវជាឪពុកមា ។…
ខេត្តសៀមរាប ៖ មានករណីក្មេងប្រុសម្នាក់ និងក្មេងស្រីម្នាក់ត្រូវជាបងប្អូនជីដូនមួយនឹងគ្នា បានលង់ទឹកស្រះ បណ្តាលឱ្យបាត់បង់ជីវិតទាំង២នាក់ ខណៈក្មេងរងគ្រោះទាំង២នាក់ទៅរកជីកក្តាមនៅវាលស្រែក្រោយផ្ទះ ជាមួយឪពុក និងត្រូវជាឪពុកមា ។
ហេតុការណ៍ខាងលើនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២០ ខែសីហា ឆ្នាំ២០២០ ស្ថិតនៅចំណុចភូមិព្រលឹត ឃុំរើល ស្រុកពួក ខេត្តសៀមរាប។
បើតាមការបញ្ជាក់ពីលោកវរសេនីយ៍ ឯក ទេព ពុំសែន អធិការនគរបាលស្រុកពួក បាន ឱ្យដឹងថា ក្មេងរងគ្រោះទាំង២នាក់ខាងលើ ក្នុងនោះម្នាក់ឈ្មោះ ខា បូរផាន់ ភេទស្រី អាយុ១០ឆ្នាំ ជាសិស្ស មានឪពុកឈ្មោះ ដុក ខា ភេទប្រុស អាយុ៤១ឆ្នាំ មុខរបរកសិករ និង ម្ដាយឈ្មោះ ឈង់ សុផាត ភេទស្រី អាយុ៣៤ឆ្នាំ មុខរបរកសិករ រស់នៅភូមិ-ឃុំកើតហេតុ ខាងលើ ចំណែកក្មេងរងគ្រោះម្នាក់ទៀតឈ្មោះ កុសល សាន ភេទប្រុស អាយុ៦ឆ្នាំ ជាសិស្សមត្តេយ្យ មានឪពុកឈ្មោះ សែប កុសល អាយុ៣៣ឆ្នាំ មុខរបរកសិករ និងម្ដាយឈ្មោះ ឈង់ យា អាយុ២៩ឆ្នាំ មុខរបរកសិករ រស់នៅភូមិ-ឃុំកើតហេតុ ។ គ្រួសារទាំងពីរនេះជាសាច់ញាតិបង្កើតនឹងគ្នា។
លោកអធិការស្រុកពួកបានបញ្ជាក់ទៀតថា បើតាមការបំភ្លឺពីឈ្មោះ សែប កុសល ត្រូវជាឪពុករបស់ក្មេងរងគ្រោះឈ្មោះកុសល សាន បានប្រាប់សមត្ថកិច្ចឱ្យដឹងថា មុនពេលហេតុការណ៍កើតឡើង កាលពីវេលាម៉ោង៨ព្រឹកថ្ងៃកើតហេតុ គាត់បានចេញពីផ្ទះទៅរកជីកក្ដាមនៅវាលស្រែខាងលិចឆៀងខាងជើងផ្ទះចម្ងាយប្រហែល៣០០ម៉ែត្រ ពេលនោះកូនរបស់គាត់ឈ្មោះ កុសល សាន និងឈ្មោះ ខា បូផាន់ ត្រូវជាក្មួយស្រីបានសុំទៅជាមួយគាត់ផងដែរ ។
តាមប្រភពដដែលបានបន្តថា លុះដល់ម៉ោងប្រហែល១០និង៣០នាទីព្រឹកថ្ងៃដដែល ក៏បានត្រឡប់មកផ្ទះវិញ នៅពេលគាត់ដើរដល់ចំណុចស្រះកន្លែងកើតហេតុ គាត់ប្រាប់កូន និងក្មួយឱ្យដើរម្ខាងផ្លូវម្នាក់ ព្រោះឃើញទឹកជ្រៅ ចំណែកគាត់មិនបានចាប់អារម្មណ៍មើលកូននិងក្មួយទេ ដោយរវល់ដើររកជីកក្ដាមបន្ថែមទៀត លុះគាត់រកក្ដាមបណ្ដើរៗជិតដល់ផ្ទះ ស្រាប់តែមិនឃើញកូននិងក្មួយមកដល់ផ្ទះឡើយ ទើបគាត់ក៏ត្រឡប់ទៅរកនៅម្ដុំទឹកស្រះវិញ តែមិនឃើញ ដោយមានការសង្ស័យកូននិងក្មួយលង់ទឹកស្រះ គាត់ក៏បានចុះរាវ រកក្នុងទឹកស្រះ ទើបប្រទះឃើញកូន និងក្មួយបានបាត់បង់ជីវិតទាំងពីរនាក់ទៅហើយ បន្ទាប់មកគាត់ក៏បានយកសពកូន និងក្មួយមកផ្ទះ ព្រមទាំងរាយការណ៍ជូនសមត្ថកិច្ចឱ្យចុះមកពិនិត្យ ។
លោកអធិការនគរបាលស្រុកពួក បានបញ្ជាក់ឱ្យដឹងទៀតថា ក្រោយពីទទួលបានព័ត៌មានខាងលើភ្លាម លោកបានចាត់កម្លាំងផ្នែកជំនាញអធិការដ្ឋាននគរបាលស្រុក និងនគរបាលប៉ុស្តិ៍ ដឹកនាំដោយលោក វរសេនីយ៍ ទោ នឹម សារ៉ាត់ អធិការរងព្រហ្យទណ្ឌ និងដោយមានការសហការចូលរួមពីគ្រូពេទ្យ ឈ្មោះ សៀង ខេង ជាប្រធានបច្ចេកទេសមន្ទីរពេទ្យបង្អែកពួក ចុះស្រាវជ្រាវ និងពិនិត្យសពដល់កន្លែងកើតហេតុ ដែលស្ថិតនៅខាងលិចផ្ទះរបស់ឈ្មោះ ដុក ខា ភេទប្រុស អាយុ៤១ឆ្នាំ ចម្ងាយប្រហែល៣០០ម៉ែត្រ ស្រះមានទំហំ៤ម៉ែត្រគុណនឹង៩ម៉ែត្រ ទឹកមានជំរៅ៣ម៉ែត្រ។
តាមការសន្និដ្ឋានរបស់លោកគ្រូពេទ្យបង្អែកស្រុក បានឱ្យដឹងថា សពក្មេងរងគ្រោះទាំងពីរពិតជាបានបាត់បង់ជីវិតដោយសារលង់ទឹកប្រាកដមែន។
ចំពោះការសន្និដ្ឋានរបស់សមត្ថកិច្ចបានឱ្យដឹងថា សពក្មេងរងគ្រោះទាំង២នាក់ពុំមានឃើញស្លាកស្នាមអ្វីគួរឱ្យសង្ស័យពាក់ព័ន្ធនឹងបទឃាតកម្មនោះទេ។ ដោយផ្អែកលើការពិនិត្យកន្លែងកើតហេតុ និងពិនិត្យសព ព្រមទាំងការបំភ្លឺរបស់ឪពុកក្មេងរងគ្រោះប្រាប់សមត្ថកិច្ចថា ហេតុការណ៍ខាងលើនេះជាករណីលង់ទឹកស្រះ បណ្តាលឱ្យក្មេងរងគ្រោះទាំង២នាក់បាត់បង់ជីវិតប្រាកដមែន ហើយក្រុមគ្រួសាររបស់ក្មេងរងគ្រោះពុំបានដាក់ពាក្យប្ដឹងមកសមត្ថកិច្ចនោះទេ។
បច្ចុប្បន្ន សពក្មេងរងគ្រោះទាំងពីរត្រូវបានកម្លាំងជំនាញ និងក្រុមគ្រូពេទ្យធ្វើការប្រគល់ ឱ្យក្រុមគ្រួសារទាំងសងខាងយកទៅធ្វើបុណ្យតាមប្រពៃណីរួចរាល់អស់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ