ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា កណ្តាប់ដៃដែករបស់សមត្ថកិច្ចនគរបាលខេត្តព្រះសីហនុ កាលពីថ្ងៃទី២២ ខែសីហា ឆ្នាំ២០២០ បានបើកកិច្ចប្រតិបត្តិការស្រាវជ្រាវ បង្ក្រាបលើជនសង្គមងងឹតមួយក្រុម ក្នុងករណីអំពើលួចមានស្ថានទម្ងន់ទោស…
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា កណ្តាប់ដៃដែករបស់សមត្ថកិច្ចនគរបាលខេត្តព្រះសីហនុ កាលពីថ្ងៃទី២២ ខែសីហា ឆ្នាំ២០២០ បានបើកកិច្ចប្រតិបត្តិការស្រាវជ្រាវ បង្ក្រាបលើជនសង្គមងងឹតមួយក្រុម ក្នុងករណីអំពើលួចមានស្ថានទម្ងន់ទោស (ប្រើកាំបិតភ្ជង់ប្លន់) និងចាប់ជំរិតរវាងជនជាតិចិន និងជនជាតិចិនដូចគ្នា រហូតឈានដល់ការឃាត់ខ្លួនបានជនសង្ស័យ៣នាក់ និងរំដោះជនរងគ្រោះបានម្នាក់ ។
សេចក្តីរាយការណ៍បន្តថា ជនសង្ស័យទាំង៣នាក់ខាងលើមាន ១-ឈ្មោះ NANG LIFU ភេទប្រុស អាយុ៣៨ឆ្នាំ ជាជនជាតិចិន មុខរបរបុគ្គលិកសណ្ឋាគារផ្នែកគិតលុយ គ្មានលិខិតឆ្លងដែនជាប់ខ្លួន ស្នាក់នៅរាជធានីភ្នំពេញ ។ ២-ឈ្មោះ CHENG LIANG PING ភេទប្រុស អាយុ៣៨ឆ្នាំ ជាជនជាតិចិន មុខរបរបុគ្គលិកហាងបាយ គ្មានលិខិតឆ្លងដែនជាប់ខ្លួន ស្នាក់នៅរាជធានីភ្នំពេញ ។ ៣-ឈ្មោះ ZHENG XIAN JIN ភេទប្រុស អាយុ៣៨ឆ្នាំ ជាជន ជាតិចិន មុខរបរបុគ្គលិកផ្សារទំនើប គ្មានលិខិតឆ្លងដែនជាប់ខ្លួន ស្នាក់នៅកោះពេជ្រ ។ចំណែកជនរងគ្រោះឈ្មោះ HE JIN ភេទប្រុស អាយុ២៨ឆ្នាំ ជាជនជាតិចិន មុខរបរម៉ៅការសាងសង់ ស្នាក់នៅភូមិ៤ សង្កាត់៤ ក្រុង-ខេត្តព្រះសីហនុ ។
បើតាមសមត្តកិច្ចឲ្យដឹងថា មុនកើតហេតុ នៅវេលាម៉ោង៥និង៣០នាទីល្ងាច កាលថ្ងៃទី២២ ខែសីហា ឆ្នាំ២០២០ កម្លាំងជំនាញផែនការងារនគរបាលព្រហ្មទណ្ឌ បានទទួលព័ត៌មានពីប្រជាពលរដ្ឋថា នៅចំណុចធនាគារ ABA ស្ថិតនៅភូមិ២ សង្កាត់២ ក្រុង-ខេត្តព្រះសីហនុ មានជនជាតិចិន៣នាក់ កំពុងធ្វើសកម្មភាពប្រើកាំបិតភ្ជង់ប្លន់បុរសជនជាតិចិនម្នាក់ ។ ខណៈពេលនោះកម្លាំងជំនាញកំពុងជិះម៉ូតូល្បាតនៅចំណុចនោះស្រាប់ផង ក៏បានចុះប្រតិបត្តិការទៅរំដោះជនរងគ្រោះភ្លាមៗ រីឯជនសង្ស័យពេលឃើញកម្លាំងសមត្ថកិច្ចទៅដល់ភ្លាម ក៏បាននាំគ្នារត់គេចខ្លួនបាត់អស់ ។
សមត្ថកិច្ចបន្តទៀតថា ក្រោយពេលកើតហេតុ កម្លាំងជំនាញបាននាំជនរងគ្រោះទៅការិយាល័យនគរបាលព្រហ្មទណ្ឌកម្រិតស្រាល ដើម្បីដាក់ពាក្យបណ្តឹង និងធ្វើការស្រាវជ្រាវយ៉ាងយកចិត្តទុកដាក់ ដើម្បីតាមចាប់ខ្លួនជនសង្ស័យ ។ បន្ទាប់ពីមានពាក្យបណ្តឹងរបស់ជនរងគ្រោះហើយ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ដែលមហាជនជឿទុកចិត្តថា ជាស្នងការកណ្តាប់ដៃដែក បានប្រើប្រាស់កម្លាំងជំនាញឲ្យចុះស្រាវជ្រាវលើករណីនេះជាបន្ទាន់ រហូតដល់ម៉ោង៧យប់ថ្ងៃដដែល ទើបបំបែកសំបុកជនសង្ស័យដែលកំពុងលាក់ខ្លួននៅចំណុចកាស៊ីណូ «ប៉ាវជីន» ស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ បានទាំង៣នាក់តែម្តង ។
កិច្ចបង្ក្រាបខាងលើនេះ ក៏មានសហការជាមួយកម្លាំងអធិកាដ្ឋាននគរបាលក្រុងព្រះសីហនុ និងកម្លាំងអន្តរាគមន៍ពិសេស ក្រោមការសម្របសម្រួលពីស្ថាប័នអយ្យការអមសាលាដំបូងខេត្តផងដែរ ។ ហើយពេលឃាត់ខ្លួនជនសង្ស័យរួច សមត្ថកិច្ចបានធ្វើការដកហូតវត្ថុតាងមាន ៖ ១-កូនកាំបិតស្នៀត២ដើម (ឧបករណ៍ប្រព្រឹត្តិបទល្មើស) និង២-ទូរស័ព្ទដៃ៤គ្រឿង ។ ចំណែកជនសង្ស័យទាំង៣នាក់ កំពុងកសាងសំណុំរឿង ដើម្បីបញ្ជូនទៅសាលាដំបូងខេត្តចាត់ការតាមនីតិវិធី ៕
ចែករំលែកព័តមាននេះ