រាជធានីភ្នំពេញ ៖ ក្រសួងសុខាភិបាលកម្ពុជា នៅថ្ងៃទី២៣ ខែសីហា ឆ្នាំ២០២០នេះ នៅបន្តក្រើនរម្លឹកដល់ពលរដ្ឋខ្មែរឲ្យអនុវត្តនូវវិធានការអនាម័យ និងប្រុងប្រយ័ត្នខ្ពស់ ព្រោះជំងឺកូវីដ ១៩…
រាជធានីភ្នំពេញ ៖ ក្រសួងសុខាភិបាលកម្ពុជា នៅថ្ងៃទី២៣ ខែសីហា ឆ្នាំ២០២០នេះ នៅបន្តក្រើនរម្លឹកដល់ពលរដ្ឋខ្មែរឲ្យអនុវត្តនូវវិធានការអនាម័យ និងប្រុងប្រយ័ត្នខ្ពស់ ព្រោះជំងឺកូវីដ ១៩ នៅតែបន្តគំរាមគំហែងកម្ពុជា និងពិភពលោកទាំងមូល ។
ក្រសួងសុខាភិបាលបានបញ្ជាក់ថា គិតត្រឹមព្រឹកថ្ងៃទី២២ សីហា ២០២០ ពុំមានការរកឃើញករណីជំងឺកូវីដ-១៩ ថ្មី និងពុំមានករណីជាសះស្បើយនោះទេ ។ ដូច្នេះចំនួនសរុប ២៧៣នាក់ ដដែល មានជាសះស្បើយចំនួន ៤នាក់ (ខ្មែរទាំងអស់) ចំនួនសំរាកនៅពេទ្យនៅសល់ ១០នាក់ ចំនួនជាសះស្បើយសរុប ចំនួន ២៦៣នាក់ និងស្លាប់គ្មាន ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានមានប្រសាសន៍បញ្ជាក់ផងដែរថា «ជំងឺកូវីដ-១៩ នៅតែបន្តគំរាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ» ។
ជារឿយៗ ក្រសួងតែងតែបន្តណែនាំថា យើងត្រូវបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំ។ ល។ យើងត្រូវបន្តគម្លាតបុគ្គលបន្តទៀត ដូចជា អង្គុយគម្លាតពីគ្នា ឈររង់ចាំគម្លាតពីគ្នា ឈរជជែកគ្នាគម្លាតពីគ្នា ។ ល។ យើងត្រូវបន្តពាក់ម៉ាស់នៅពេលចាំបាច់ និងឧស្សាហ៍លាងដៃជាមួយសាប៊ូ អាល់កុល ឬជែល ។
សូមបញ្ជាក់ថា ប្រទេសយើងរកឃើញករណីជំងឺកូវីដ១៩ ដំបូងបំផុតនៅថ្ងៃទី២៧ មករា ២០២០។ កម្ពុជាបានធ្វើតេស្តចំនួន ៨៦៦០៦ ស្មើនឹង ៥២១៦ ក្នុង១លាន នាក់៕
ចែករំលែកព័តមាននេះ