កូរ៉េខាងត្បូង ៖ ប្រទេសកូរ៉េខាងត្បូង នឹងបិទកន្លែងកម្សាន្តដូចជា ក្លឹបកម្សាន្តរាត្រី ខារ៉ាអូខេ និងហាងកាហ្វេអ៊ីនធើរណេត និងហាមមិនឱ្យមានអ្នកចូលទស្សនាព្រឹត្តិការណ៍កីឡា បន្ទាប់ពីករណីថ្មីរបស់ជំងឺកូវីដ១៩ ត្រូវបានគេរាយការណ៍នៅទូទាំងប្រទេសកាលពីថ្ងៃសៅរ៍។ ឆ្នេរនៅទូទាំងប្រទេស ក៏នឹងត្រូវបានបិទដោយគ្មានកំណត់ដែរ។
រដ្ឋមន្ត្រីក្រសួងសុខាភិបាលប្រទេសកូរ៉េ Park Neung-hoo បានប្រកាសថា ការរឹតបន្តឹងនឹងកំណត់រាល់ការជួបជុំនៅក្នុងកន្លែងបិទជិតមិនឱ្យលើសពី៥០នាក់ និងការជួបជុំនៅខាងក្រៅមិនឱ្យលើសពី១០០នាក់។ ការកំណត់នេះ នឹងត្រូវចាប់ផ្តើមអនុវត្តចាប់ពីថ្ងៃអាទិត្យនេះ។
ប្រទេសកូរ៉េខាងត្បូង បានរកឃើញករណីឆ្លងថ្មីនៃកូវីដ១៩ ចំនួន ៣៣២ករណី កាលពីថ្ងៃសុក្រ។ ករណីឆ្លងដែលជាការនាំចូលពីក្រៅប្រទេស មានចំនួន១៧ករណី។ ច្រើនជាង ៧៥% នៃករណីឆ្លងក្នុងសហគមន៍ ត្រូវបានរកឃើញនៅក្នុងតំបន់ទីក្រុងសេអ៊ូល។ រដ្ឋមន្ត្រីក្រសួងសុខាភិបាលកូរ៉េ បាននិយាយកាលពីថ្ងៃសៅរ៍ថា មិនមានករណីបាត់បង់ជីវិតត្រូវបានរកឃើញនៅកាលពីថ្ងៃសុក្រទេ។
វិធានការណ៍នេះ ត្រូវបានដាក់ឱ្យប្រើប្រាស់នៅពេញផ្ទៃប្រទេស ដែលរួមមានទីក្រុងសេអ៊ូល ដែលបានអនុវត្តតាំងពីថ្ងៃទី១៦ ខែសីហា។ ខេត្តផ្សេងៗ ដែលមានចំនួនឆ្លងតិចក៏ត្រូវធ្វើការរឹតបន្តឹងផងដែរ។
គួរបញ្ជាក់ផងដែរថា កូរ៉េខាងត្បូង ត្រូវបានគេទទួលស្គាល់ថា ជាប្រទេសមួយដែលមានការឆ្លើយតបយ៉ាងម៉ឺងម៉ាត់ និងមានផែនការត្រឹមត្រូវបំផុតក្នុងពិភពលោកចំពោះការគ្រប់គ្រងការរីករាលដាលជំងឺកូវីដ១៩៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ